ຈົບເກມ!!! ພາດໂອກາດຮັບໃບປະລິນຍາ ຍ້ອນຂາຍຢາບ້າ…

ທ້າວ ວັນສີ ອາຍຸ 22 ປີ ເປັນນັກສຶກສາລະດັບປະລິນຍາຕີປີທີ 4, ພັກເຊົາຢູ່ບ້ານໜອງໜ້ຽວ ເມືອງສີໂຄດຕະບອງ ຕ້ອງພາດໂອກາດຂຶ້ນປ້ອງກັນບົດນິພົນ ເພື່ອຮັບໃບປະລິນຍາໃນທ້າຍປີນີ້ ຍ້ອນໄປພົວພັນຄ້າຂາຍຢາເສບຕິດ ແລ້ວຖືກເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງສີໂຄດຕະບອງ ນວ ກັກຕົວໄດ້ໃນວັນທີ 05 ສິງຫາ 2020, ໃນເວລາ 15:30 ໂມງ, ຢູ່ເສັ້ນທາງບ້ານຈັນສະຫວ່າງ ພ້ອມຂອງກາງຢາບ້າ 2.000 ເມັດໃນຖົງເສື້ອຂອງຜູ້ກ່ຽວ.

ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ກອງບັນຊາການ ປກສ ເມືອສີໂຄດຕະບອງ ໃຫ້ຮູ້ວ່າ: ພາຍຫຼັງໄດ້ກັກຕົວພ້ອມຂອງກາງຢາບ້າ 2.000 ເມັດໃນຖົງເສື້ອຂອງ ທ້າວ ວັນສີ ເຈົ້າໜ້າທີ່ໄດ້ເປີດການສືບສວນ-ສອບສວນ; ເຊີ່ງຜູ້ຖຶກຫາໄດ້ໃຫ້ການຮັບສາລະພາບວ່າ: ໄດ້ເລີ່ມພົວພັນຂາຍຢາບ້າມາແຕ່ເດືອນພຶດສະພາ 2020 ໂດຍຊື້ນໍາຊາຍຄົນໜື່ງທີ່ຮູ້ຈັກກັນ; ເຊີ່ງຊື້ຄັ້ງທໍາອິດໃນຈໍານວນ 200 ເມັດ ພໍໄດ້ຢາບ້າມາແລ້ວກໍເອົາໄປຂາຍໃຫ້ໄວລຸ້ນຢູ່ພາຍໃນບ້ານ ແລະ ບ້ານໃກ້ຄຽງ.

ຫຼັງຈາກຂາຍຢາບ້າໝົດແລ້ວກໍໄດ້ພົວພັນຊື້ຢາບ້າກັບຊາຍຄົນນັ້ນອີກ 170 ເມັດ ເພື່ອເອົາໄປຂາຍ ແລະ ໃນຄັ້ງສຸດທ້າຍວັນທີ 05 ສິງຫາ 2020 ຕົນເອງໄດ້ໄປຊື້ຢາອີກ 2.000 ເມັດ. ພໍໄດ້ຢາບ້າມາແລ້ວກໍຂີ່ລົດອອກມາຮອດເສັ້ນທາງບ້ານຈັນສະຫວ່າງ ເມືອງສີໂຄດຕະບອງ, ຈື່ງຖືກເຈົ້າໜ້າທີ່ເຂົ້າກັກຕົວພ້ອມກວດຄົ້ນຕົວພົບຢາບ້າຈໍານວນ 2.000ເມັດ,ໃນຖົງເສື້ອຂອງຕົນເອງ.

ຕໍ່ກັບຄະດີລາຍນີ້ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ສືບຕໍ່ເປີດກ້ວາງສືບສວນ-ສອບສວນຂະຫຍາຍຜົນ.

ຄລິບຂ່າວ