👉©ເປັນຫຍັງຕ້ອງເຮັດບຸນເຂົ້າປະດັບດິນ?
ຫໍ່ເຂົ້າປະດັບດິນ ໝາຍເຖິງ ການນໍາເອົາອາຫານຫວານຄາວ ຊີ້ນແຫ້ງປາຕາຍ, ເຂົ້າຕົ້ມເຂົ້າໜົມ, ໝາກໄມ້ນານາຊະນິດ ແລະ ວັດຖຸທານຕ່າງໆມາລວມກັນ ເຮັດເປັນຫໍ່ນ້ອຍຫໍ່ໃຫຍ່ຕາມຄວາມຕ້ອງການ ໂດຍການຫໍ່ໃສ່ໃບຕອງກ້ວຍ ຫຼື ໃບຕອງອື່ນໆ ຢໍ້າອີກເທື່ອໜຶ່ງວ່າຫໍ່ໃສ່ໃບຕອງ (ບໍ່ແມ່ນກ່ອງໂຟມ ແລະ ຖົງຢາງ) ແລ້ວກໍເອົາໄປວາງປະດັບໄວ້ຕາມດິນ ໃນມື້ເດືອນ 9 ດັບ ເອີ້ນວ່າຫໍ່ເຂົ້າປະດັບດິນ.
ເຊິ່ງມີຄວາມສໍາຄັນຫຼາຍ ໃນການເຮັດຄວາມດີຄືບຸນ ເພື່ອຕອບແທນຄຸນແຜນດິນ, ບັນພະບູລຸດ ແລະ ສັບພະສັດພວກຜີເຜດທັງຫຼາຍ ຕາມຄວາມເຊື່ອຖືມາຍາວນານ.
©ເຮັດເພື່ອຫຍັງ?
- ເພື່ອບູຊາເທບພະເຈົ້າຂອງແຜ່ນດິນ ທີ່ມີບຸນຄຸນຕໍ່ທຸກໆຊີວິດ
- ເພື່ອອຸທິດແຜ່ຜົນບຸນ ໃຫ້ແກ່ສັບພະສັດທັງຫລາຍ ທີ່ມີຍາດ ແລະ ບໍ່ມີຍາດ ຫຼື ເປັນການເຮັດບຸນໃຫ້ຜີເຜດ (ເຮັດບຸນໃຫ້ເປດ)
- ເປັນເທດສະການເຮັດບຸນອຸທິດຫາບັນພະບຸລຸດ ຕາມຮີດ 12 ຂອງປະເພນີລາວເຮົາ.
—————————————————————————-©ມີຄວາມເປັນມາຄືຢ່າງໃດ?
ມູນເຫດຄວາມເປັນມາ
ບຸນຫໍ່ເຂົ້າປະດັບດິນ ອາດມີຄວາມເປັນມາຢູ່ 3 ປະການ ຄື:
☝️#ເປັນປະເພນີອັນນີ້ສືບເນື່ອງຈາກຮີດຄອງຂອງພາມ ເປັນການເຮັດພິທິກັມ ເພື່ອໃຫ້ເປດ ຫຼື ຜີເຜດ ມາຮັບເອົາ ຕາມຄວາມເຊື່ອຖືຂອງຄົນບູຮານ ກ່ອນການນັບຖືພຣະພຸດທະສາສະໜາ ເອີ້ນວ່າຫໍ່ເຂົ້າປະດັບດິນ.
ເລື່ອງມີຢູ່ວ່າ ມີພາມຄອບຄົວໜື່ງ ມີລູກຊາຍຄົນດຽວ ພໍ່ແມ່ຮັກເໝືອນແກ້ວຕາດວງໃຈ ເມື່ອລູກຊາຍ ອາຍຸ 16 ປີ ກໍມາຕາຍຈາກໄປ, ພໍ່ແມ່ໂສກເສົ້າເສຍໃຈຫຼາຍ ກິນບໍ່ໄດ້ນອນບໍ່ຫຼັບ ເພາະຄິດຮອດລູກ ຫຼັງຈາກຕາຍ ແລ້ວກໍນຳໄປຝັງໄວ້ທີ່ປ່າຊ້າ ປູກເຮືອນໃຫ້ຫຼັງໜື່ງພ້ອມທັງເຄື່ອງໃຊ້ສອຍທີ່ຢູ່ທີ່ນອນຄົບ, ແລ້ວແຕ່ງຄົນໃຊ້ ໄປສົ່ງເຂົ້າທຸກໆວັນ ຢູ່ມາວັນໜື່ງຝົນຕົກແຮງນໍ້າຫຼາຍ ຄົນໃຊ້ຂ້າມໄປສົ່ງເຂົ້າບໍ່ໄດ້ ເລີຍກັບມາເຫັນພິກຂຸ ໄປບິນທະບາດ ຈິ່ງເອົາເຂົ້າໃສ່ບາດແລ້ວອຸທິດສ່ວນບຸນໄປໃຫ້ລູກຊາຍຂອງພາມ ໃນຄືນວັນນັ້ນ ພາມຜູ້ເປັນພໍ່ ຝັນເຫັນລູກຊາຍມາບອກວ່າ ຕັ້ງແຕ່ລູກຕາຍໄປກໍ່ໄດ້ມາກິນເຂົ້າແຕ່ມື້ວານນີ້ເທົ່ານັ້ນ ພາມຕື່ນຂື້ນນຶກປະຫຼາດໃຈ ໃນຄວາມຝັນນັ້ນ ຈຶ່ງເອີ້ນຄົນໃຊ້ນັ້ນມາຖາມວ່າ ຂ້າພະເຈົ້າໃຫ້ໄປສົ່ງເຂົ້າໃຫ້ລູກຊາຍຢູ່ໃນປ່າຊ້າ ເຈົ້າໄດ້ໄປທຸກມື້ ບໍ່? ຄົນໃຊ້ກໍຕອບວ່າໄປທຸກມື້ເວັ້ນໄວ້ແຕ່ມື້ວານນີ້ໄປບໍ່ໄດ້ ເພາະຝົນຕົກແຮງນໍ້າຫຼາຍ ຂ້າມໄປສົ່ງເຂົ້າບໍ່ໄດ້ ຂ້ານ້ອຍກັບມາພົບພິກຂຸໄປບິນທະບາດ ຂ້ານ້ອຍຈິ່ງໄດ້ເອົາເຂົ້າໃສ່ບາດໃຫ້ພິກຂຸ ແລ້ວອຸທິດສ່ວນບຸນກຸສົນ ໄປໃຫ້ລູກຊາຍຂອງທ່ານ ເມື່ອພາມໄດ້ຟັງຄົນໃຊ້ຕອບເຊັ່ນນັ້ນກໍນຶກປະຫຼາດໃນໃຈ ຈຶ່ງເຂົ້າໄປເຝົ້າພຣະພຸດທະເຈົ້າ ຂາບທູນເລື່ອງນັ້ນໃຫ້ຊົງຊາບ ພຣະພຸດທະເຈົ້າກໍໄດ້ຕັດເທດສະນາແກ່ພາມວ່າ ທ່ານພາມເຮັດຢ່າງນີ້ບໍ່ແມ່ນແນວທາງທີ່ຖືກຕ້ອງ ເຮົາຈະສະແດງໃຫ້ທ່ານຟັງ ຜູ້ມີສັດທາຢາກຈະອະນຸເຄາະແກ່ເຜດ ທີ່ລ່ວງລັບໄປແລ້ວ ໃຫ້ທຳບຸນຖວາຍທານແກ່ພຣະສົງຜູ້ມີສິນ ມີກັນລະຍານະທັມແລ້ວອຸທິດສ່ວນບຸນໄປໃຫ້ຜູ້ຕາຍໄປ ຍ່ອມໄດ້ຮັບ ຜົນທານນັ້ນເໝືອນດັ່ງຄົນໃຊ້ຂອງທ່ານ ທີ່ເອົາເຂົ້າໃສ່ບາດໃຫ້ພຣະສົງແລ້ວອຸທິດສ່ວນບຸນໄປໃຫ້ລູກຂອງທ່ານ ຈຶ່ງໄດ້ຮັບປະທານອາຫານ ເຊິ່ງປະກົດໃນຄວາມຝັນຂອງທ່ານນັ້ນ ເມື່ອພາມໃດ້ຟັງແລ້ວກໍເຂົ້າໃຈ ເກີດສັດທາ ເຫຼື່ອມໃສສະແດງຕົນເປັນພຸດທະມາມະກະນັບຖືພຣະພຸດທະສາສະໜາຕະຫລອດຊີວິດ.
✌️ #ການເຮັດບຸນຫໍ່ເຂົ້າປະດັບດິນ ມີມູນເຫດເກີດຈາກຄວາມເຊື່ອຕາມນິທານທໍາມະບົດວ່າ: ຍາດພີ່ນ້ອງ ຂອງພະເຈົ້າພິມພິສານໄດ້ສໍ້ໂກງເງີນວັດຂອງສົງຕ່າງໆໄປເປັນຂອງຕົນ ໃນສະໄໝພຣະກັດສະປະພຸດທະເຈົ້າ ພວກອະດີດຍາດພີ່ນ້ອງຂອງພະເຈົ້າພີມພິສານເຫຼົ່ານັ້ນ ຄັນຕາຍໄປແລ້ວໄດ້ໄປເກີດເປັນເຜດໃນນະຮົກຕະຫຼອດພຸດທະນິລັນດອນ ເມື່ອພະເຈົ້າພີມພິສານຖວາຍທານແດ່ພະສະມະນະ ໂຄດົມພຸດທະເຈົ້າ ໃນພັດທະກັບນີ້ ກໍ່ບໍ່ໄດ້ຢາດນໍ້າອຸທິດສ່ວນກຸສົນໄປໃຫ້ແກ່ພວກຍາດເຫຼົ່ານັ້ນ ພໍຕົກເຖີງກາງ ຄືນມາພວກເຜດຍາດພີ່ນ້ອງດັ່ງກ່າວໄດ້ມາສົ່ງສຽງຮ້ອງຄວນຄາງ, ອາໄລທຸກຂະເວທະນາ ແລະ ສະແດງ ຮ່າງອັນເປັນຕາຢ້ານໃຫ້ແກ່ພະເຈົ້າພີມພິສານເຫັນ, ພໍມື້ເຊົ້າວັນໃໝ່ຂື້ນມາພະເຈົ້າພິມພິສານ ກໍ່ສະເດັດໄປຖາມ ພະພຸດທະເຈົ້າເຖິງເລື່ອງດັ່ງກ່າວ ພະພຸດທະອົງກໍ່ຊົງໄດ້ເລົ່າເລື່ອງລາວ ທີ່ເປັນຕົ້ນເຫດໃຫ້ພະເຈົ້າພິມພິສານ ໄດ້ຊົງຊາບ ພະເຈົ້າພິມພິສານຈິ່ງໄດ້ເຮັດບຸນຖວາຍທານອີກ ແລ້ວໄດ້ຢາດນໍ້າ ແລະ ອຸທິດສ່ວນບຸນກຸສົນໄປໃຫ້ ບັນດາຍາດພີ່ນ້ອງ ເມື່ອພວກເຂົາໄດ້ຮັບສ່ວນບຸນກຸສົນຕາມການເອີ້ນມາແລ້ວນັ້ນ ພວກເຜດກໍໄດ້ມາປະກົດຕົນ ໃຫ້ພະເຈົ້າພິມພິສານເຫັນ ແລະ ຊາບວ່າທຸກທີ່ພວກເຂົາໄດ້ຮັບນັ້ນໄດ້ທຸເລົາເບົາບາງລົງແລ້ວ ເພາະການອຸທິດ ສ່ວນບຸນກຸສົນຂອງພະເຈົ້າພິມພິສານນັ້ນແລ ດັ່ງນັ້ນພຸດທະສາສະນິກະຊົນລາວຈິ່ງຖືເອົາມູນເຫດນີ້ ເຮັດບຸນ ຫໍ່ເຂົ້າປະດັບດິນ ນັບແຕ່ມື້ນັ້ນ ຕິດຕໍ່ກັນມາຈົນເຖິງປັດຈຸບັນ.
✌️☝️ #ການເຮັດບຸນຫໍ່ເຂົ້າປະດັບດິນເປັນອີກປະເພນີໜຶ່ງໃນຮີດສີບສອງທີ່ນິຍົມກັນເຮັດໃນມື້ແຮມສິບສີ່ຄໍ່າເດືອນ9 ເຊິ່ງບັນພະບຸຣຸດລາວເຮົາໄດ້ປະຕິບັດສືບກັນມາເປັນເວລາຍາວນານ,ຈົນກາຍເປັນຮີດຄອງປະເພນີແລະວັດທະນາທຳອັນດີງາມຂອງຊາດ.
ກ່ຽວກັບບຸນຫໍ່ເຂົ້າປະດັບດິນຂອງຄົນບູຮານທີ່ໄດ້ປະຕິບັດກັນມາຈົນເຖິ່ງປັດຈຸບັນນີ້ ກ່ອນມີການທຳບຸນ ປະຊາຊົນກໍມີການຫ້າງຫາກະກຽມເຄື່ອງໄທຍະທານຕ່າງໆ ເປັນຕົ້ນວ່າ ຫໍ່ເຂົ້າຕົ້ມເຂົ້າໜົມ ແລະ ວັດຖຸໄທຍະທານ ອື່ນໆໄວ້ພ້ອມ, ເຂົ້າຕົ້ມເຂົ້າໜົມເຫຼົ່ານັ້ນຈະແບ່ງອອກເປັນສ່ວນໆ ຄື: ສ່ວນໜື່ງແບ່ງໄວ້ ຮັບປະທານພາຍໃນຄອບ ຄົວ, ສ່ວນທີ່ສອງແບ່ງໃຫ້ຍາດພີ່ນ້ອງແລະມິດສະຫາຍ, ສ່ວນທີ່ສາມແບ່ງໄວ້ເຮັດບຸນຕັກບາດ ຖວາຍໃຫ້ແກ່ ພຣະສົງສາມະເນນ ອຸຸທິດຢາດນໍ້າໄປໃຫ້ແກ່ພວດເຜດ, ສ່ວນທີ່ສີ່ເອົາໃບຕອງກ້ວຍມາຫໍ່ເຂົ້າຕົ້ມເຂົ້າໜົມ ແລະ ວັດຖຸທານອື່ນໆລວມກັນ ເຮັດເປັນຫໍ່ນ້ອຍຫໍ່ໃຫຍ່ຕາມຄວາມຕ້ອງການ ແລ້ວກໍເອົາໄປວາງໄວ້ຕາມດິນ, ຕາມຫຍ້າ, ຕາມເຫງົ້າໄມ້, ຕາມໜ້າເຮືອນຂອງຕົນ, ຕາມທາດເຈດີ ແລະ ບ່ອນອື່ນໆ ຕັ້ງແຕ່ເຊົ້າມືດປະມານ 4-5 ໂມງເຊົ້າ ຂອງມື້ເດືອນ 9 ດັບ ເອີ້ນວ່າ ຫໍ່ເຂົ້າປະດັບດິນ.
👉©ວິທີເຮັດບຸນຫໍ່ເຂົ້າປະດັບດິນ ແລະ ກິດຈະກໍາຕ່າງໆ:
ບຸນຫໍ່ເຂົ້າປະດັບດິນ ແມ່ນຈັດຂຶ້ນໃນມື້ແຮມ 14 ຄໍ່າ ເດືອນ 9 ລາວ ຂອງທຸກໆປີ ເປັນມື້ເຮັດບຸນຫໍ່ເຂົ້າປະດັບດິນ, ວິທີຫໍ່ເຂົ້າປະດັບດິນນັ້ນ ຄວນຫໍ່ໃສ່ໃບຕອງກ້ວຍ, ໃບບົວ ຫຼື ໃບໄມ້ປະເພດຕ່າງໆ ບໍ່ຄວນເຮັດໃສ່ກ່ອງໂຟມ ຫຼື ຖົງຢາງ, ໃນຫໍ່ເຂົ້າປະດັບດິນນັ້ນປະກອບມີ ເຂົ້າຕົ້ມເຂົ້າໜົມ ເຂົ້າສຸກ ຊີ້ນແຫ້ງ ປາຕາຍ ອາຫານຫວານຄາວ ໝາກໄມ້ປະເພດຕ່າງໆທີ່ຊື້ມາຕາມຕະຫຼາດ ຫຼືໝາກໄມ້ປ່າ ເຊັ່ນ: ໝາກຫວດ, ໝາກເໝົ້າ, ໝາກພີພ່ວນ, ໝາກບົກ, ໝາກເຄັງ, ໝາກຂາມປ້ອມ, ໝາກສົ້ມມໍ ແລະ ອື່ນໆ ນອກນີ້ຍັງມີ ຄໍາໝາກ, ກອກຢາ ນໍາອີກ ເຫຼົ່ານີ້ເປັນຕົ້ນ. ຫຼັງຈາກທີ່ຫໍ່ຮຽບຮ້ອຍແລ້ວ ນໍາເອົາໄປບູຊາຕອນເຊົ້າກ່ອນຕາເວັນຂຶ້ນ ຂອງມື້ແຮມ 14 ຄໍ່າ ເດືອນ 9 ຫຼື ເດືອນ 9 ດັບ ໃຫ້ຖືເອົາເວລາປະມານ 04:00-05:00 ໂມງເຊົ້າ ຢ່າໄປບູຊາເດິກຫຼາຍເພາະເປັນເວລາບໍ່ເໝາະສົມ ໃນການໄປບູຊານັ້ນ ໃຫ້ນໍາເອົາໄປບູຊາໂລດ ໂດຍບໍ່ຕ້ອງເຄນໃຫ້ພຣະສົງ ເອົາໄປຢາຍບູຊາປະດັບໄວ້ ໃນສະຖານທີ່ບູຊາ ມີ ໜ້າເຮືອນຕົນເອງ ຕາມກຳແພງວັດ ຕາມທາດເຈດີ ຕາມຫົວໄຮ່ປາຍນາ ຕາມດິນຕາມຫຍ້າ, ເຫງົ້າໄມ້ ວາງລົງກັບພື້ນດິນໂລດ ແລ້ວໄຕ້ທູບທຽນບູຊາ ຢາດນໍ້າ ຫຼື ບໍ່ຢາດນໍ້າ ເວົ້າເອົາກະໄດ້ວ່າ: ຂ້າພະເຈົ້າຊື່…. ໄດ້ແຈກຢາຍຫໍ່ເຂົ້າປະດັບດິນ ບູຊາແຜ່ນດິນ ພຣະແມ່ທໍລະນີ, ຍາດພີ່ນ້ອງຊື່…. ຕລອດເຖິງຜີເຜດ ຜີທີ່ມີຍາດ ແລະ ບໍ່ມີຍາດ ກໍດີ ໃຫ້ມາຮັບເອົາຫໍ່ເຂົ້າປະດັບດິນນີ້ ໃຫ້ໄດ້ຢູ່ໄດ້ກິນ ແລ້ວໃຫ້ໄປເກີດທີ່ດີເຖິງສຸກ ຖືວ່າຈົບພິທີ, ເວລາຟ້າແຈ້ງຕາມາເຊົ້າ ຈິ່ງໄປເວນພາເຂົ້າ ແລະ ຕັກບາດ ຢາດນໍ້າອຸທິດສ່ວນບຸນກຸສົນ ໄປຫາບັນພະບຸລຸດ ຢູ່ໃນວັດ ຕາມປະເພນີ ທີ່ເຮັດສືບທອດກັນມາແຕ່ດົນນານ ຈົນເຖິງປັດຈຸບັນ.
ສ່ວນກິດຈະກໍາອື່ນໆ ໃນບຸນຫໍ່ເຂົ້າປະດັບດິນມີ ໄຫວ້ພຣະສູດມົນ, ຟັງເທດສະໜາ, ລົງອຸໂປສົດສັງຄະກັມ, ຈໍາສິນແປດ, ວຽນທຽນ ແລະ ປະເພນີບຸນຊ່ວງເຮືອແຂວງຫຼວງພະບາງ.
👉©ເວົ້າລວມແລ້ວ, ຄວາມເຊື່ອສັດທາຂອງຍາດໂຍມຕໍ່ກັບການເຮັດບຸນຫໍ່ເຂົ້າປະດັບດິນ. ຍາດໂຍມມີຄວາມເຊື່ອ ແລະ ສັດທາກັບການເຮັດບຸນຫໍ່ເຂົ້າປະດັບດິນມາແຕ່ອະດີດ ເຖິງປັດຈຸບັນ ບໍ່ມີວັນຈະເສື່ອມຄາຍລົງ ເພາະວ່າຍາດໂຍມມີຄວາມເຊື່ອວ່າ ການເຮັດບຸນໃນວັນດັ່ງກ່າວນັ້ນ ເປັນການ ອຸທິດສ່ວນບຸນກຸສົນໄປຫາ ເຜດ ຫຼື ຍາດພີ່ນ້ອງທີ່ລ່ວງລັບໄປແລ້ວ ໂດຍເຊື່ອກັນວ່າເປັນວັນທີ່ຈ່າຍົມພິບານເປີດປະຕູນະຣົກ ໃຫ້ແກ່ພວກຜີ ພວກເຜດ ທັງຫຼາຍ ຂຶ້ນມາຊອກຫາອາຫານກິນໃນມື້ນັ້ນ ເພາະອີກຄວາມເຊື່ອໜຶ່ງ ເຊື່ອກັນວ່າ ການເຮັດບຸນຫໍ່ເຂົ້າປະດັບດີນ ເປັນຮີດຄອງທີ່ມີມາກ່ອນສາສະໜາພຸດ ເປັນຮີດຄອງສືບເນື່ອງມາຈາກ ລັດທິຖືຜີ ມີຈຸດປະສົງເພື່ອກິນທານຫາບັນພະບຸລຸດຜູ້ລ່ວງລັບໄປແລ້ວ ໂດຍມີການຮ້ອງເຊີນວິນຍານຍາດພີ່ນ້ອງ ມາຮັບເອົາຕາມຄວາມເຊື່ອຖື ເມື່ອມີສາສະໜາພຸດເຂົ້າມາໃນອານາຈັກລ້ານຊ້າງ ຈຶ່ງໄດ້ມີການປັບເຂົ້າຫາກັນ ແລະ ຈຶ່ງເກີດມີພິທີກໍາພິທີການ ໄຫວ້ພຣະ ສະມະທານສິນ ຕັກບາດ ຖວາຍພັດຕະຫານ, ຟັງທໍາມະເທສະຫນາ, ວຽນທຽນ ແລະ ກິດຈະກໍາອື່ນໆ ສືບເນື່ອງມາຢ່າງເຂັ້ມແຂງ ແລະ ຍັງຄົງຄວາມເຊື່ອນີ້ໄວ້ຢ່າງຍືນຍົງຕໍ່ໄປອີກ.
🙏🙏🙏ຂໍໃຫ້ພວກເຮົາຊາວພຸດ ຈົ່ງມີສິຣິສຸຂສະຫວັດ ພິພັດທະນະສັບພະມິ່ງມຸງຄຸນ ສົມບູນພູນຜົນ ທຸກທ່ານທຸກຄົນເທີ້ນ.
ແຫລ່ງຂໍ້ມູນ: ເພຈ໌ ແອັງ ຢູ່ວັດ
Discussion about this post