ຄາດຄະເນສະພາບອາກາດໃນໄລຍະເດືອນ ສິງຫາ-ຕຸລາ 2020 ລົມມໍລະສຸມຕາເວັນຕົກສ່ຽງໃຕ້ຈະມີກຳລັງແຮງພັດປົກຄຸມພ້ອມດຽວກັນນັ້ນຈະມີພາຍຸພັດຜ່ານ ເຊິ່ງຈະເຮັດໃຫ້ມີຝົນຕົກໜັກພ້ອມມີລົມພັດແຮງ ແລະ ຈະເຮັດໃຫ້ເກີດດິນເຈື່ອນ,ນ້ຳຖ້ວມຊຸ ແລະ ນ້ຳຖ້ວມອັ່ງຢູ່ບາງທ້ອງຖິ່ນໂດຍສະເພາະຢູ່ແຂວງພາກກາງແລະພາກໃຕ້
ອີງຕາມພະຍາກອນຍາວນານຈາກສູນພະຍາກອນຂອງອົງການອຸຕຸນິຍົມໂລກ ຄາດຄະເນພາຍຸມູນເຂດຮ້ອນຈະເຄື່ອນທີ່ ຜ່ານ ສປປ ລາວ ປະມານ 1-2 ຫົວ ເຊິ່ງສ່ວນໃຫຍ່ຈະຜ່ານພາກກາງ ແລະ ພາກໃຕ້ໃນໄລຍະວັນທີ 25 ກັນຍາ ຫາ 3 ຕຸລາ 2020
ໄລຍະກາງເດືອນສິງຫາ 2020 ບໍລິເວນຄວາມກົດດັນອາກາດຕ່ຳຈະປົກຄຸມຢູ່ທົ່ວທຸກພາກຂອງປະເທດລາວ ແລະສົມທົບກັບລົມມໍລະສຸມຕາເວັນຕົກສ່ຽງໃຕ້ພັດປົກຄຸມ ດ້ວຍກຳລັງປານກາງ ເຊິ່ງຈະເຮັດໃຫ້ອາກາດຮ້ອນ ແລະ ມີຝົນຕົກໃນລະດັບຄ່ອຍເປັນບໍລິເວນກວ້າງໃນແຕ່ລະພາກ ແລະ ຝົນຕົກປານກາງ ຫາ ຕົກໜັກຢູ່ບາງທ້ອງຖິ່ນ ມີແຂວງພາກເໜືອແລະພາກກາງໂດຍສະເພາະວັນທີ່ 13 – 15 ສິງຫາ 2020
ໄລຍະທ້າຍເດືອນສິງຫາ 2020 ສະພາບຝົນໂດຍລວມຈະມີຝົນຕົກໜ່ອຍ ເຊິ່ງສ່ວນໃຫຍ່ຈະຕົກໃນລະດັບຄ່ອຍໃນແຕ່ລະພາກແລະຕົກນັກເປັນບາງໂອກາດຢູ່ບາງທ້ອງຖິ່ນເຊັ່ນ: ໃນໄລຍະວັນທີ່ 27 ຫາ 28 ສິງຫາ 2020 ຈະມີຝົນຕົກໜັກຢູ່ເຂດພາກເໜືອແລະພາກກາງ
ໃນໄລຍະທ້າຍເດືອນກັນຍາຈະມີພາຍຸພັດຜ່ານເຂດພາກກາງເຊິ່ງຈະເຮັດໃຫ້ມີຝົນຕົກໃນລະດັບຄ່ອຍຫາປານກາງເປັນບໍລິເວນກວ້າງແລະຕົກໜັກຢູ່ເຂດພາກເໜືອດ້ານຕາເວັນອອກ ລົງຫາພາກກາງແລະພາກໃຕ້ໃນໄລຍະວັນທີ່ 25-30 ກັນຍາ 2020
Discussion about this post