ຄຳມ່ວນ ມອບຊາກເສືອໂຄ່ງ 3 ໂຕ ໃຫ້ແກ່ ມຊ

ຄຳມ່ວນ ມອບຊາກເສືອໂຄ່ງ 3 ໂຕ ໃຫ້ແກ່ ມຊ ເພື່ອການຄົ້ນຄວ້າ ! ກອງກວດກາປ່າໄມ້ ແຂວງຄຳມ່ວນ ໄດ້ຈັດພິທີ ມອບ-ຮັບ ຊາກເສືອໂຄ່ງ ຈຳນວນ 3 ໂຕ

ໃຫ້ແກ່ຄະນະວິທະຍາສາດປ່າໄມ້ ມະຫາວິທະຍາໄລແຫ່ງຊາດ (ມຊ) ຊຶ່ງຈັດຂຶ້ນໃນວັນທີ 24 ມີນາ ຜ່ານມາ ທີ່ແຂວງຄໍາມ່ວນ, ໃຫ້ກຽດກ່າວມອບໂດຍ ທ່ານ ສຸກັນ ອິນທະນູຮັກ ຮອງຫົວໜ້າພະ ແນກກະສິກຳ ແລະ ປ່າໄມ້ແຂວງຄຳມ່ວນ ແລະ ກ່າວຮັບໂດຍ ທ່ານ ສີທອງ ທອງມະນີວົງ ຮອງຄະນະບໍດີ ຄະນະວິທະຍາສາດປ່າໄມ້ ມຊ, ມີຜູ້ຕາງໜ້າຈາກກົມປ່າໄມ້, ບັນດາອົງການຕຸລາການ ແຂວງ, ເຈົ້າໜ້າທີ່ ປກຊ-ປກສ ແຂວງ ຕະຫຼອດເຖິງພະນັກງານ-ວິຊາການທີ່ກ່ຽວຂ້ອງເຂົ້າຮ່ວມ.

ຊາກເສືອໂຄ່ງຈຳນວນ 3 ໂຕນີ້ ແມ່ນເຈົ້າໜ້າທີ່ ປກສ ແລະ ເຈົ້າໜ້າທີ່ກອງກວດກາປ່າ ໄມ້ແຂວງຢຶດມາໄດ້ຈາກຜູ້ປະກອບການ ທີ່ກໍາລັງລັກລອບຂົນສົ່ງຢູ່ທີ່ເມືອງຍົມມະລາດ ແຂວງຄຳ ມ່ວນ ໃນວັນທີ 12 ມັງກອນ 2018 ຊຶ່ງແຕ່ລະໂຕແມ່ນຢູ່ໃນສະພາບທີ່ຕາຍແລ້ວ ແລະ ຖືກຄົວ ເອົາເຄື່ອງໃນອອກຈົນໝົດ, ລວມມີນໍ້າໜັກທັງໝົດ 434 ກິໂລ. ຈາກນັ້ນ, ເຈົ້າໜ້າທີ່ກ່ຽວຂ້ອງກໍ ໄດ້ສືບສວນ-ສອບສວນເຖິງທີ່ໄປທີ່ມາຂອງສັດ ພ້ອມທັງໄດ້ນຳຕົວຜູ້ກະທຳຜິດມາດຳເນີນຄະດີຕາມລະ ບຽບກົດໝາຍ. ຕໍ່ມາໃນໄລຍະໜຶ່ງກໍຈັດກອງປະຊຸມຂຶ້ນທີ່ກົມກວດກາປ່າໄມ້ ແລະ ກອງປະຊຸມກໍ ໄດ້ຕົກລົງເຫັນດີມອບຊາກເສືອດັ່ງກ່າວໃຫ້ແກ່ ມຊ ເພື່ອນຳໄປສຶກສາຄົ້ນຄວ້າ.ທ່ານ ສີທອງ ທອງມະນີວົງ ໄດ້ກ່າວຕໍ່ພິທີວ່າ: ໃນການທີ່ແຂວງຄຳມ່ວນ ໄດ້ມອບ ຊາກເສືອໃຫ້ແກ່ ມຊ ຄັ້ງນີ້ ແມ່ນເປັນການມອບຊັບສົມບັດທີ່ລໍ້າຄ່າທີ່ສຸດ ໂດຍສະເພາະໃນແງ່ຂອງ ການສຶກສາຄົ້ນຄວ້າ ຊຶ່ງທາງ ມຊ ຈະໄດ້ນຳເອົາຕົວຢ່າງເສືອໄປທົດລອງສຶກສາ, ຄົ້ນຄວ້າ ພ້ອມທັງ ມີການບັນທຶກເປັນຂໍ້ມູນ ເພື່ອໃຫ້ນັກສຶກສາ,

ນັກຄົ້ນຄວ້າ ກໍຄືສັງຄົມໄດ້ສຶກສາ, ຮຽນຮູ້ ແລະ ນຳໄປ ເປັນບົດຮຽນ ເພື່ອຮັບໃຊ້ເຂົ້າໃນການສິດສອນ-ຮຽນຮູ້. ສ່ວນທາງດ້ານໂຄງກະດູກ ແລະ ຊິ້ນສ່ວນເນື້ອ ໜັງ ກໍຈະຮັກສາໄວ້ໃນລັກສະນະທີ່ເປັນຊົງເດີມ ເພື່ອເປັນການອະນຸລັກໃຫ້ແກ່ຄົນຮຸ່ນຫຼັງໄດ້ເບິ່ງ ແລະ ສຶກສາຄົ້ນຄວ້າຕໍ່ໄປ.ຂ່າວ-ພາບ: ອາດສະພັງທອງປະຊາຊົນ