ອີຢູ ຊ່ວຍ ສປປລາວ 32ຕື້ກີບ ຕອບໂຕ້ການລະບາດ ຂອງ​ ໂ​ ຄ​ ວິ​ ດ -19

ສະຫະພາບເອີຣົບ ໃຫ້ການສະໜັບສະໜູນ 32 ຕື້ກີບ ຕອບໂຕ້ການລະບາດຂອງພະຍາດໂຄວິດ19 ຢູ່ ສປປ ລາວພິທີເປີດໂຄງການສະໜັບສະໜູນຈາກສະຫະພາບເອີຣົບ ໃນການຕອບໂຕ້ການລະບາດຂອງພະຍາດໂຄວິດ19 ຢູ່ ສປປ ລາວ ຈັດຂຶ້ນຕອນບ່າຍວັນທີ 17 ມິນາ 2021 ທີ່ໂຮງແຮມຄຣາວພລາຊາ ນະຄອນຫລວງວຽງຈັນ

ໂດຍການເຂົ້າຮ່ວມຂອງທ່ານພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ທ່ານນາງອີນາມາຈູລໍນີແຕ ເອກອັກຄະລັດຖະທູດສະຫະພາບເອີຣົບປະຈໍາ ສປປ ລາວ ແລະທ່ານ ດຣ. ມາກເຈຄອບສ໌. ຜູ້ຕາງໜ້າອົງການອະນາໄມໂລກປະຈໍາສປປລາວ ພ້ອມດ້ວຍພາກສ່ວນກ່ຽວຂ້ອງ.

ທ່ານ ຮສ. ດຣ. ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກກ່າວໃນພິທີວ່າ: “ພວກເຮົາມີຄວາມຍິນດີເປັນຢ່າງສູງທີ່ຈະສືບຕໍ່ຮ່ວມເຮັດວຽກກັບສະຫະພາບເອີຣົບ ແລະອົງການອະນາໄມໂລກ ເນື່ອງຈາກວ່າທັງສອງລ້ວນແລ້ວແຕ່ແມ່ນຄູ່ຮ່ວມມືທີ່ສຳຄັນໃນໄລຍະການແຜ່ລະບາດຂອງພະຍາດໂຄວິດ-19.

ພວກເຮົາພ້ອມແລ້ວທີ່ຈະເຮັດວຽກຮ່ວມກັນໃນການເສີມສ້າງແນວທາງການຮ່ວມມືໃນພາກພື້ນເພື່ອຍົກສູງສະມາຄົມອາຊຽນໃຫ້ເຂັ້ມແຂງຍິ່ງຂື້ນກວ່າເກົ່າໂດຍຄຽງຄູ່ໄປກັບການຟື້ນຟູຈາກການລະບາດຂອງພະຍາດດັ່ງກ່າວ.

”ທ່ານນາງອີນາມາຈູລໍນີແຕ ເອກອັກຄະລັດຖະທູດສະຫະພາບເອີຣົບປະຈໍາສປປລາວກ່າວວ່າ: “ເພື່ອແກ້ໄຂຜົນກະທົບດ້ານສຸຂະພາບແລະເສດຖະກິດ-ສັງຄົມທີ່ໄດ້ຮັບຈາກການລະບາດດັ່ງກ່າວນີ້, ສະຫະພາບເອີຣົບໄດ້ຈັດຕັ້ງແຜນງານຄືນໃໝ່ເພື່ອສຸມໃສ່ການເພີ່ມທະວີການຮ່ວມມືໃນພາກພື້ນເພື່ອໃຫ້ສາມາດເຂົ້າເຖິງຂໍ້ມູນຂ່າວສານ, ອຸປະກອນ ແລະວັກຊີນເຊິ່ງເປັນສິ່ງຈຳເປັນຢ່າງຍິ່ງຕໍ່ການເອົາຊະນະວິກິດການໃນຄັ້ງນີ້.

ພວກເຮົາທຸກຄົນລ້ວນແຕ່ມີສ່ວນຮ່ວມໃນການຕໍ່ສູ້ກັບບັນຫາດັ່ງກ່າວ ແລະໃນຖານະທີ່ເປັນຄູ່ຮ່ວມມືພວກເຮົາຫວັງຢາກໃຫ້ທຸກຄົນເຂັ້ມແຂງກ້າວໄປຂ້າງໜ້າພ້ອມໆກັນ.”ບັນດາບຸລິມະສິດຂອງໂຄງການນີ້ແມ່ນສອດຄ່ອງກັບແຜນຍຸດທະສາດເພື່ອການກຽມຄວາມພ້ອມ ແລະຕອບໂຕ້ດ້ານສຸຂະພາບແຫ່ງຊາດປີ 2020-2025. ເຊິ່ງຈະລວມເອົາບູລິມະສິດດ້ານການສືບຕໍ່ຮັບປະກັນການກວດພົບກໍລະນີຕິດເຊື້ອພະຍາດໂຄວິດ-19 ແຕ່ທໍາອິດໂດຍການສ້າງຄວາມເຂັ້ມແຂງໃຫ້ແກ່ຈຸດເຂົ້າອອກປະເທດ, ສູນປະຕິບັດງານສຸກເສີນໃນລະດັບສູນກາງ ແລະຂັ້ນແຂວງ;

ກຽມພ້ອມຮັບມືໃນສູນຈໍາກັດບໍລິເວນ ແລະສະຖານທີ່ໃຫ້ບໍລິການດ້ານສາທາລະນະສຸກ, ເພີ່ມຄວາມອາດສາມາດໃນການປ້ອງກັນ ແລະຄວບຄຸມການຕິດເຊື້ອ (IPC); ນໍ້າ, ສຸຂາພິບານ ແລະສຸຂະອະນາໄມ (WASH) ແລະການຄຸ້ມຄອງຈັດການສິ່ງເສດເຫຼືອ.ເອກອັກຄະລັດຖະທູດ ສະຫະພາບ ເອີຣົບ ຍັງໄດ້ປະກາດວ່າສະຫະພາບເອີຣົບ ແລະບັນດາປະເທດສະມາຊິກມີຄວາມຕັ້ງໃຈຢ່າງສູງທີ່ຈະຮັບປະກັນວ່າຈະບໍ່ມີໃຜຖືກປະຖີ້ມໃນໂຄງການສັກຢາກັນພະຍາດທົ່ວໂລກ ກໍ່ຄືຜ່ານCOVAX.

ຂ້າພະເຈົ້າຍິນດີ ແຈ້ງໃຫ້ບັນດາທ່ານຊາບວ່າ: ປະທານຄະນະກຳມະທິການເອີຣົບ ທ່ານນາງເອຊູລ້າຟອນເດີເຣເຢັນໄດ້ປະກາດໃນກອງປະຊຸມG7 ທີ່ຜ່ານມາວ່າ ທີມເອີຣົບໄດ້ສະໜອງການຊ່ວຍເຫຼືອ ແກ່ປະເທດທີ່ມີລາຍໄດ້ຕໍ່າ ແລະປານກາງ, ເຊິ່ງລວມທັງ ສປປລາວ, ເພື່ອຊ່ວຍໃຫ້ສາມາດເຂົ້າເຖິງການສັກຢາວັກຊິນກັນພະຍາດໂຄວິດ-19. ພວກເຮົາມີຄວາມພູມໃຈທີ່ທີມເອີຣົບເປັນຜູ້ປະກອບສ່ວນໃຫຍ່ທີ່ສຸດໃຫ້ກັບCOVAX”

ນອກຈາກນັ້ນ, ສະຫະພາບເອີຣົບມີຄວາມຍິນດີເປັນຢ່າງສູງທີ່ປະເທດລາວຈະໄດ້ຮັບວັກຊີນຊຸດທໍາອິດໃນຈຳນວນ 480,000 ໂດສ, ໂດຍຜ່ານCOVAX.ດຣ. ມາກເຈຄອບສ໌, ຜູ້ຕາງໜ້າອົງການອະນາໄມໂລກປະຈໍາ ສປປລາວ ກ່າວວ່າ: ໃນຊຸມປີທີ່ຜ່ານມາ, ອົງການອະນາໄມໂລກໄດ້ໃຫ້ການຊ່ວຍເຫຼືອທາງດ້ານວິຊາການແກ່ກະຊວງສາທາລະນະສຸກ ໃນການຕອບໂຕ້ກັບພະຍາດໂຄວິດ-19ພ້ອມທັງຊ່ວຍພັດທະນາ, ສະຫຼຸບແຜນຍຸດທະສາດແລະແຜນການການຕອບສະໜອງລະດັບຊາດ ເພື່ອຄວບຄຸມພະຍາດໂຄວິດ-19 ອັນມີບົດບາດສຳຄັນຕໍ່ການປະສານງານກັບບັນດາຄູ່ຮ່ວມມື.

ສິ່ງດັ່ງກ່າວນີ້ເປັນສານຕໍ່ການສະໜັບສະໜູນຂອງພວກເຮົາໃນໄລຍະເວລາຫຼາຍປີທີ່ຜ່ານມາເພື່ອຊ່ວຍໃຫ້ປະເທດສາມາດສ້າງຄວາມເຂັ້ມແຂງໃນລະບົບສາທາລະນະສຸກ ແລະມີຄວາມພ້ອມໃນການຮັບມືກັບໄພຂົ່ມຂູ່ຕ່າງໆກໍ່ຄືພະຍາດໂຄວິດ-19. ການຮ່ວມມືກັບສະຫະພາບເອີຣົບແມ່ນການຮ່ວມມືທີ່ສຳຄັນໃນການເພີ່ມທະວີຄວາມພະຍາຍາມດັ່ງກ່າວນີ້.

”ໂຄງການສະໜັບສະໜູນຈາກສະຫະພາບເອີຣົບ ໃນການຕອບໂຕ້ການລະບາດຂອງພະຍາດໂຄວິດ19 ຢູ່ ສປປ ລາວ ຈໍານວນ 2.800.000 ເອີໂຣ ຫລື ປະມານ 32 ຕື້ກີບ ຈະດໍາເນີນເປັນເວລາ3 ປີ ຄືແຕ່ປີ 2021 – 2023