ທ່ານ ຄໍາຫລ້າ ສຸນນະລັດ ຫົວໜ້າກົມຄວາມປອດໄພໄຊເບີ, ກະຊວງເຕັກໂນໂລຊີ ແລະ ການສື່ສານ ໃຫ້ຮູ້ເມື່ອບໍ່ດົນມານີ້ວ່າ: ປັດຈຸບັນ, ເຖິງແມ່ນວ່າຈະຢູ່ໃນສະພາບການແຜ່ລະບາດຂອງ ພະ ຍາດໂຄວິດ-19 ກໍຕາມ, ແຕ່ການນໍາໃຊ້ເຕັກໂນໂລຊີການສື່ສານຂໍ້ມູນຂ່າວສານ ຜ່ານລະບົບອິນເຕີເນັດ ກໍຍິ່ງມີບົດບາດ ແລະ ຄວາມສຳຄັນໃນຊີວິດປະຈຳວັນຂອງສັງຄົມເຮົາ ເພາະເຮັດໃຫ້ພວກເຮົາຢູ່ໃນໂລກສາມາດສື່ສານກັນໄດ້ຢ່າງສະດວກ ແລະ ວ່ອງໄວ ບໍ່ວ່າຈະເປັນການເຂົ້າເຖິງຂໍ້ມູນ ການເຜີຍແຜ່ຂໍ້ມູນຂ່າວສານຜ່ານທາງເວັບໄຊ ການເຮັດທຸລະກຳທາງການເງິນ ການສົ່ງຂໍ້ຄວາມພາບ-ສຽງ ຫລື ການຈັດປະ ຊຸມອອນລາຍ ລ້ວນແລ້ວແຕ່ສ້າງຜົນປະໂຫຍດ ແລະ ລາຍຮັບ ໃຫ້ແກ່ຜູ້ຊົມໃຊ້ ລວມໄປເຖິງຫົວໜ່ວຍທຸລະກິດຕ່າງໆ ທີ່ນຳໃຊ້ນຳເຄື່ອງມືໄອຊີທີເຂົ້າໃນການບໍລິການ.
![](https://kkklao.com/wp-content/uploads/2022/04/1-20.jpg)
ທ່ານ ຄໍາຫລ້າ ສຸນນະລັດ ໃຫ້ຮູ້ຕື່ມວ່າ: ແຕ່ເຖິງຢ່າງໃດກໍຕາມ, ພວກເຮົາບໍ່ສາມາດຫລີກລ້ຽງບັນຫາໄພຄຸກຄາມ ຫລື ການຂົ່ມຂູ່ທີ່ເກີດຂຶ້ນທາງອິນເຕີເນັດ/ໄຊເບີ ຢູ່ໃນພາກພື້ນ ແລະ ສາກົນ ເປັນຕົ້ນແມ່ນ ການເຈາະລະບົບເຄືອຂ່າຍ, ການເຈາະລົບຖານຂໍ້ມູນສໍາຄັນ, ການແຜ່ກະຈາຍໂປຣແກຣມປະສົງຮ້າຍ,
ການໂຈລະກໍາຂໍ້ມູນທາງດ້ານການເງິນ, ການປອມແປງ ຫລື ປັບປ່ຽນ ໜ້າຕາເວັບໄຊ, ການຫລອກລວງທາງສື່ສັງຄົມອອນລາຍ ແລະ ອີເມວ, ການເຜີຍແຜ່ຂໍ້ມູນໂດຍບໍ່ໄດ້ຮັບອະນຸຍາດ ເປັນຕົ້ນການໂຈມຕີທາງໄຊເບີ ທີ່ເຮັດໃຫ້ລະບົບພື້ນຖານໂຄງລ່າງຂໍ້ມູນຂ່າວສານທີ່ສຳຄັນ ບໍ່ສາມາດໃຫ້ບໍລິການໄດ້ ເຊິ່ງບັນຫາເຫລົ່ານີ້ ໄດ້ສ້າງຄວາມເສຍຫາຍທາງດ້ານຊື່ສຽງ ແລະ ຊັບສິນຂອງບຸນຄົນ, ນິຕິບຸກຄົນ ລວມໄປເຖິງອົງການຈັດຕັ້ງຕ່າງໆທີ່ຢູ່ພາຍໃນ ແລະ ຕ່າງປະເທດ.
![](https://kkklao.com/wp-content/uploads/2022/04/2-20.jpg)
ສະນັ້ນ, ການໃຫ້ຄວາມຮູ້ກ່ຽວກັບ ການຮັກສາຄວາມປອດໄພໄຊເບີ ແກ່ສັງຄົມ ແລະ ການຍົກລະ ດັບຄວາມຮູ້ທາງດ້ານເຕັກນິກວິຊາການຂອງຂະແໜງການຕ່າງໆ ພ້ອມທັງການແລກປ່ຽນຄວາມຮູ້ ແລະ ປະສົບການໃນດ້ານນະໂຍບາຍດັ່ງກ່າວ ເພື່ອຈະນໍາເອົາມາປັບໃຊ້ເຂົ້າໃນການພັດທະນາອົງກອນຂອງຕົນ ກໍຍິ່ງມີຄວາມຈຳເປັນໃນການລິເລີ່ມ ແລະ ພັດທະນາໄປເລື້ອຍໆ ເພື່ອໃຫ້ສາມາດຮັບມື ແລະ ແກ້ໄຂ ຕໍ່ກັບໄພຄຸກຄາມທາງໄຊເບີໃນແຕ່ລະໄລຍະໄດ້.
ຂ່າວ: ມະນີທອນ, ຂໍ້ມູນ: ກະຊວງ ຕສ
Discussion about this post