ບ້ານນາກະຕິບ ອະລິຍະທຳແຫ່ງເມືອງລັບແລ ຕ້ອງໄປຈັກຄັ້ງໃຈຊີວິດ

ຍອ້ນຄວາມສະລັບຊັບຊ້ອນທາງທຳມະຊາດ ແລະມີອະລິຍະທຳອັນເກົ່າແກ່ຈຶ່ງເຮັດໃຫ້ດິນແດນວັດຄີຣີວົງກົດຖືກຂະໜານນາມວ່າເປັນເມືອງລັບແລ ຫຼືເມືອງອາລັນ ຣັດຈະນາບູຮານ. ວັດຄີຣີວົງກົດ ຫຼືເມືອງລັບແລ ຕັ້ງຢູ່ບ້ານນາກະຕິບ ເມືອງຫີນບູນ ແຂວງຄຳມ່ວນ ກາຍນ້ຳທອນປະມານ 10 ກິໂລ ລ້ຽວເຂົ້າທາງເຂື່ອນຫີນບູນທາງໄປວັກຜາຄວກ, ຜານາງລຽງ, ທາງເຂົ້າບ້ານຢູ່ຖໍ້າງູໃຫຍ່.

ວັດຄີຣີວົງກົດ ເປັນວັດທີ່ມີຄວາມຮົ່ມເຢັນ, ອ້ອມຮອບໄປດ້ວຍພູຜາ, ສາຍນ້ຳ ແລະຕົ້ນໄມ້ນ້ອຍໃຫຍ່ຢ່າງຫຼວງຫຼາຍ. ພິເສດມີຕົ້ນໝາກຍົມປ່າທີ່ມີຄວາມໃຫຍ່ເຖິງ 5-6 ອຸ້ມ. ເຊິ່ງການເດີນທາງເຂົ້າມາວັດ ຫຼືເມືອງລັບແລແຫ່ງນີ້ຕ້ອງໄດ້ຍ່າງຜ່ານຖ້ຳເຂົ້າມາພາຍໃນ. ບ້ານນາກະຕິບ (ເມືອງລັບແລ) ໃນເມື່ອກ່ອນຕາມການບັນທຶກການກຳເນີດເມືອງສີໂຄດຕະບອງໄດ້ຂຽນໄວ້ວ່າ:

450ປີກ່ອນເມືອງອາລັນ ຣັດຈະນາບູຮານເປັນເມືອງທີ່ມີຄວາມຮຸ່ງເຮືອງ ມີເຈົ້າເມືອງປົກຄອງຊື່ ເຈົ້າເມືອງວຸ້ນ ແລະ ບໍລິເວນນັ້ນມີບ້ານທັງໝົດ 13 ບ້ານ ແລະມີວັດອ້ອມຮອບບ້ານໄວ້ 13 ວັດ ເຊິ່ງໃນປັດຈຸບັນບ້ານນາກະຕິບ ຫຼືເມືອງລັບແລ ຊ້ຳພັດມີປະຊາຊົນອາໄສຢູ່ພຽງ 11 ຫຼັງຄາເຮືອນເທົ່ານັ້ນ ແລະບ້ານແຫ່ງນີ້ຈະບໍ່ສາມາດມີຫຼັງຄາເຮືອນຫຼາຍກວ່າ 11 ຫຼັງຄາເຮືອນໄດ້ເຊິ່ງສິ່ງດັ່ງກ່າວກໍແມ່ນຄວາມເຊື່ອຂອງຊາວບ້ານທີ່ຍັງຫາຂໍ້ພິສູດບໍ່ໄດ້.

ນອກຈາກນີ້ ໃນເມື່ອກ່ອນສະຖານທີ່ແຫ່ງນີ້ຍັງເຄີຍເປັນຖານທັບທາງການທະຫານທີ່ນຳພາໂດຍເຈົ້າອະນຸວົງ, ພາຍຫຼັງການເຂົ້າຮຸກຮານຂອງສັດຕູເຮັດໃຫ້ເຂດດັ່ງກ່າວກາຍເປັນເມືອງຮ້າງ, ວັດວາອາຮາມ ແລະພະພຸດທະຮູບຖືກລັກ, ຖືກທໍາລາຍຢ່າງຫຼວງຫຼາຍ, ເຊິ່ງເຮົາຈະສັງເກດເຫັນວ່າ ວັດແຫ່ງນີ້ຄ້າຍຄືກັບເມືອງຮ້າງ. ເຖິງຢ່າງໃດກໍຕາມວັດຄີຣີວົງກົດ ຫຼືເມືອງລັບແລກໍເປັນສະຖານທີ່ ທີ່ຍັງຄົງຮັກສາຄວາມເປັນທຳມະຊາດ,

ມີອະລິຍະທຳທາງປະຫວັດສາດຫຼາຍຢ່າງໃຫ້ພວກເຮົາໄດ້ໄປກາບໄຫວ້ບູຊາ ແລະສຶກສາ ພ້ອມດຽວກັນນັ້ນຍັງເໝາະແກ່ການນັ່ງສະມາທິ, ກຳມະຖານ ແລະທຸດົງສຳຫຼັບຄູບາ, ແມ່ຂາວ ແລະອອກຕົນຍາດໂຍມຜູ້ທີ່ຕ້ອງການສະແຫວງບຸນ ແລະທຳ. ເຊິ່ງທຸກຂຶ້ນ 15 ຄ່ຳ ເດືອນ 4 ຂອງທຸກປີ ຈະໄດ້ມີການຈັດງານວັດເພື່ອທຳບຸນໃສ່ບາດເພື່ອລະນຶກ ແລະ ເປັນສິຣີມົງຄຸນແກ່ວັດແຫ່ງນີ້.

ສໍາລັບການເດີນທາງແມ່ນຈະມີພຽງທາງດຽວທີ່ເຂົ້າໄປເທິງວັດແຫ່ງດັ່ງກ່າວໄດ້ນັ້ນກໍຄືການຍ່າງຜ່ານສາຍນ້ຳ ແລະຖ້ຳຍາວປະມານ 8-10 ກິໂລແມັດ. ດັ່ງນັ້ນ ນັກທ່ອງທ່ຽວທີ່ຈະໄປຢ້ຽມຢາມສະຖານທີ່ແຫ່ງນີ້ກໍຄວນມີຄວາມພ້ອມທາງຮ່າງກາຍ ແລະຈິດໃຈທີ່ມຸ່ງໝັ້ນ ເພາະສະຖານທີ່ແຫ່ງນັ້ນຕິດພັນກັບທຳມະຊາດຢ່າງແທ້ຈິງ.