ກະຊວງສາທາລະນະສຸກມອບວັກຊີນກັນໂຄວິດ ຈຳນວນ 7 ແສນໂດສໃຫ້ກັບ 5 ແຂວງພາກເໜືອ

ກະຊວງສາທາລະນະສຸກ ໄດ້ຈັດພິທີມອບ-ຮັບ ວັກຊີນປ້ອງກັນພະຍາດໂຄວິດ-19 ຈຳນວນ 7 ແສນໂດສ ແລະ ອຸປະກອນການແພດ ຈໍານວນ 10 ລ້ານຢວນ ຫຼື 17 ຕຶ້ກີບ ທີ່ລັດຖະບານ ແລະ ປະຊາຊົນຈີນໄດ້ຊ່ວຍເຫລືອ ແກ່ລັດຖະບານ ແລະ ປະຊາຊົນລາວ ເພື່ອນຳເຂົ້າໃຊ້ໃນວຽກງານການປ້ອງກັນພະຍາດໂຄວິດ ຢູ່ບັນດາ 5 ແຂວງ ຄື: ແຂວງບໍ່ແກ້ວ, ແຂວງອຸດົມໄຊ, ແຂວງຫລວງນໍ້າທາ, ແຂວງຜົ້ງສາລີ, ແລະ ແຂວງຫຼວງພະບາງ. ຕາງໜ້າໃຫ້ລັດຖະບານ ສປ ຈີນ ກ່າວມອບທາງກອງປະຊຸມທາງໄກ (ອອນລາຍ) ໂດຍທ່ານ Qian keming ຮອງລັດຖະມົນຕີກະຊວງການຄ້າຈີນ, ທ່ານ Deng Boqing ຮອງປະທານອົງການຮ່ວມມືສາກົນເພື່ອການພັດທະນາແຫ່ງ ສປ ຈີນ, ທ່ານ Li Malin ຮອງເຈົ້າແຂວງ ແຂວງຢຸນນານ, ທ່ານ ຈ່ຽງຈ່າຍ ຕຸ່ງ ເອກອັກຄະລັດທະທູດ ວິສາມັນຜູ້ມີອຳນາດເຕັມ ແຫ່ງ ສປ ຈີນ ປະຈຳລາວ, ຮັບໂດຍທ່ານ ປອ. ດຣ.ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ພ້ອມດ້ວຍຫົວຫນ້າຫ້ອງການ, ກົມກໍ່ໄດ້ເຂົ້າຮ່ວມ.

ໃນນັ້ນມີເຄື່ອງປ້ອງກັນພະຍາດໂຄວິດ-19 ຈຳນວນ 6 ລ້ານຢວນ ຫຼື 10 ຕື້ກີບ ທີ່ຈະມອບໃຫ້ແກ່ກະຊວງສາທາລະນະສຸກ ແລະ ອຸປະກອນການແພດຈຳນວນ 4 ລ້ານຢວນ ຫຼື 7 ຕື້ກີບ ແລະ ວັກຊີນຈຳນວນ 7 ແສນໂດສ ແມ່ນຈະມອບໃຫ້ບັນດາແຂວງພາກເຫນືອ. ນອກນັ້ນ ໃນວັນທີ 17 ພະຈິກ 2021 ທີ່ຜ່ານມາ ສປປ ລາວ ໄດ້ຮັບວັກຊີນຈຳນວນ 1,800,000 ໂດສ ແລະ ຍັງມີການຊ່ວຍເຫຼືອຈາກອົງການກາແດງ ແຫ່ງ ສປ ຈີນ ຈຳນວນ 1 ແສນໂດສ ເພື່ອນຳໃຊ້ເຂົ້າໃນການຕ້ານ ແລະ ສະກັດກັ້ນການແຜ່ລະບາດຂອງເຊື້ອພະຍາດໂຄວິດ-19 ຢູ່ ສປປ ລາວ ຕຶ່ມອີກ.