ກະຊວງກະສິກຳເປີດການນຳໃຊ້ ລະບົບການຄຸ້ມຄອງ ຂໍ້ມູນຊັບພະຍາກອນດິນ

ໃນວັນທີ 18 ພະຈິກ ຜ່ານມາ, ກົມຄຸ້ມຄອງ ແລະ ພັດທະນາທີ່ດິນກະສິກຳ, ກະຊວງ ກະສິກຳ ແລະ ປ່າໄມ້ ຮ່ວມມືກັບ ອົງການອາຫານ ແລະ ການກະເສດ ປະຈຳ ສປປ ລາວ (FAO) ເປີດການນຳໃຊ້ລະບົບການຄຸ້ມຄອງຂໍ້ມູນຊັບພະຍາກອນດິນ (LRIMS) ເພື່ອນຳສະເໜີລະບົບດັ່ງກ່າວ, ໃຫ້ແກ່ການນຳຂັ້ນ ກະຊວງ, ບັນດາກົມ, ໂຄງການ ແລະ ອົງການຈັດຕັ້ງສາກົນ, ສະຖາບັນການສຶກສາ, ພະແນກກະສິກຳ ແລະ ປ່າໄມ້ ແຂວງ, ນະຄອນຫລວງວຽງຈັນ, ຫ້ອງການກະສິກຳ ແລະ ປ່າໄມ້ເມືອງ, ຜູ້ປະກອບການ, ປະຊາຊົນ ແລະ ພາກສ່ວນທີ່ກ່ຽວຂ້ອງ ໄດ້ຮັບຮູ້, ເຂົ້າໃຈ ແລະ ໃນການນຳໃຊ້ ລະບົບ LRIMS ທົ່ວເຖິງຢ່າງມີປະສິດທິພາບ.

ທ່ານ ກິແກ້ວ ສິງນາວົງ ຮອງລັດຖະມົນຕີ ກະຊວງ ກະສິກຳ ແລະ ປ່າໄມ້ ໄດ້ກ່າວວ່າ: ສະພາບການປ່ຽນແປງຂອງດິນຟ້າອາກາດ ໄດ້ສົ່ງຜົນກະທົບໂດຍກົງຕໍ່ການດຳລົງຊີວິດ ຂອງມວນມະນຸດ, ກະທົບຕໍ່ທຳມະຊາດ ແລະ ກະທົບຕໍ່ເສດຖະກິດ ໂດຍສະເພາະ ແມ່ນການຜະລິດກະສິກຳ ແລະ ປ່າໄມ້ ທີ່ມີລະດັບຄວາມຮຸນແຮງ ທີ່ແຕກຕ່າງກັນໃນແຕ່ລະເຂດ. ເພື່ອຮັບມືກັບສະພາບການປ່ຽນແປງດິນຟ້າອາ ກາດ ລັດຖະບານລາວ ໄດ້ເນັ້ນໃສ່ການວາງແຜນນໍາໃຊ້ທີ່ດິນ ແລະ ກຳນົດມາດຕະການທີ່ຈຳເປັນອັນເລັ່ງດ່ວນ ເພື່ອປ້ອງກັນໄພທຳມະຊາດ ທີ່ອາດຈະເກີດຂຶ້ນໃນອະນາຄົດ. LRIMS ແມ່ນໜຶ່ງເວັບໄຊຂອງລະບົບຂໍ້ມູນທາງພື້ນທີ່/ແຜນທີ່ ຂະໜາດໃຫຍ່ ໂດຍການລວບລວມເອົາຂໍ້ມູນ ກ່ຽວກັບ ການຄຸ້ມຄອງທີ່ດິນ ແລະ ການປ່ຽນແປງດິນຟ້າອາກາດ ສຳລັບການຜະລິດກະສິກຳ.ທ່ານ ຮອງລັດຖະມົນຕີ ກະຊວງ ກະສິກຳ ແລະ ປ່າໄມ້ ກ່າວຕື່ມວ່າ: ໄລຍະຜ່ານມາ, ກະຊວງ ກະສິກຳ ແລະ ປ່າໄມ້ ໄດ້ມີຄວາມພະຍາຍາມ ໃນການສ້າງລະບົບຂໍ້ມູນໃນ ສປປ ລາວ ໂດຍການຮ່ວມມືກັບອົງການ FAO ພາຍໃຕ້ໂຄງການສ້າງຄວາມເຂັ້ມແຂງ ໃຫ້ແກ່ລະບົບຂໍ້ມູນຂ່າວສານ ແລະ ການຕິດຕາມສະພາບອຸຕຸກະເສດ ເພື່ອຊ່ວຍໃນການປັບຕົວໃຫ້ເຂົ້າກັບການປ່ຽນແປງດິນຟ້າອາກາດ ແລະ ການຄໍ້າປະກັນສະບຽງອາຫານ ເຊິ່ງໄດ້ຈັດຕັ້ງປະຕິບັດມາແຕ່ເດືອນກໍລະກົດ 2017 ຫາ ກໍລະກົດ 2022 ໂດຍໄດ້ຮັບທຶນຊ່ວຍເຫລືອ ຈາກກອງທຶນສິ່ງແວດລ້ອມໂລກ ຜ່ານອົງການ FAO ຈໍານວນ 5,4 ລ້ານ ໂດລາ. ໂຄງການດັ່ງກ່າວ, ໄດ້ສຶກສາ ແລະ ພັດທະນາຂໍ້ມູນ ກ່ຽວກັບຜົນກະທົບ ຈາກການປ່ຽນແປງດິນຟ້າອາກາດ ຕໍ່ການຜະລິດກະສິກຳ. ເພື່ອຮັບມືກັບສິ່ງທ້າທາຍນີ້, ກົມຄຸ້ມຄອງ ແລະ ພັດທະນາທີ່ດິນກະສິກຳ ໄດ້ສ້າງແຜນທີ່ ຄວາມປົກຫຸ້ມທີ່ດິນກະສິກຳ, ປັບປຸງແຜນທີ່ດິນໃໝ່ ແລະ ບັນດາຂໍ້ມູນອື່ນໆທີ່ກ່ຽວຂ້ອງ. ພ້ອມນີ້, ຍັງໄດ້ຮ່ວມມືກັບກົມອຸຕຸນິຍົມ ແລະ ອຸທົກກະສາດ ສ້າງຂໍ້ມູນແຜນທີ່ພູມອາກາດ 30 ປີ ຜ່ານມາ ຂອງ ສປປ ລາວ ເພື່ອນຳໃຊ້ເຂົ້າໃນການກຳນົດແບ່ງເຂດລະບົບນິເວດກະສິກຳ ສຳລັບປູກພືດ ໃນປັດຈຸບັນ ແລະ ອະນາຄົດ.

ແຜນທີ່ດິນກະສິກຳ, ແຜນທີ່ພູມອາກາດ ແລະ ບັນດາຂໍ້ມູນຕ່າງໆ ທີ່ໄດ້ຮັບຈາກການຈັດຕັ້ງປະ ຕິບັດໂຄງການເທື່ອນີ້ ຈະເປັນຂໍ້ມູນສຳຄັນໃນການວາງແຜນປູກພືດໃນສະເພາະໜ້າ ແລະ ຍາວນານ, ເປັນຂໍ້ມູນໃນການວາງແຜນຄຸ້ມຄອງ ແລະ ພັດທະນາທີ່ດີນ, ພ້ອມທັງສາມາດກວດສອບຄວາມເໝາະສົມ ໃນການລົງທຶນກະສິກໍາຕໍ່ກັບທີ່ດິນໄດ້. ລະບົບດັ່ງກ່າວ, ຍັງຈະຊ່ວຍສະໜັບສະໜູນ ການກຳນົດນະໂຍບາຍ ແລະ ຍຸດທະສາດໃນການພັດທະນາເສດຖະກິດ-ສັງຄົມ ແຫ່ງຊາດ ກໍຄື ວາລະແຫ່ງຊາດ ໂດຍສະເພາະ ໃນວຽກງານການພັດທະນາ ກະສິກຳ, ປ່າໄມ້ ແລະ ພັດທະນາຊົນນະບົດ.

ຂ່າວ: ມະນີທອນຂໍ້ມູນ-ພາບ: ກະຊວງກະສິກຳ ແລະ ປ່າໄມ້