ບໍລິສັດ ພອນສິຣິກຮຸບ ມອບທຶນອຸປະກອນຕ້ານໂຄວິດ ໃຫ້ອົງການກາແດງລາວ

ວັນທີ 15 ພະຈິກ 2021 ນີ້, ບໍລິສັດ ພອນສິຣິກຮຸບ ຈຳກັດ ໄດ້ນຳເອົາ ຜ້າອັດປາກ-ດັງ ຈຳນວນ 51 ກັບ, ເຈວລ້າງມື 51 ຂວດ, ເຫລົ້າ 90 ຈໍານວນ 31 ຂວດ, ຊຸດປ້ອງກັນ 100 ຊຸດ, ຖົງມືຂ້າເຊື້ອ 31 ກັບ, ເຄື່ອງວັດແທກອຸນຫະພູມ 5 ຊຸດ, ໝີ່ 31 ແກັດ, ໄຂ່ໄກ່ 31 ແພັກ ແລະ ເງິນສົດຈໍານວນ 3 ລ້ານກວ່າກີບ, ລວມມູນຄ່າທັງໝົດ 17.633.000 ກີບ ມາມອບໃຫ້ ອົງການກາແດງລາວ ເພື່ອນຳໃຊ້ເຂົ້າໃນວຽກງານຕ້ານ ແລະ ສະກັດກັ້ນເຊື້ອພະຍາດໂຄວິດ-19, ຕາງໜ້າມອບໂດຍ ທ່ານ ແກ້ວ ຈັນທະວົງດ໌ ປະທານບໍລິຫານ ບໍລິສັດ ພອນສິຣິກຮຸບ ຈຳກັດ ແລະ ຮັບໂດຍ ທ່ານ ພູທອນ ເມືອງປາກ ປະທານອົງການກາແດງລາວ ໂດຍມີພະນັກງານກ່ຽວຂ້ອງ ເຂົ້າຮ່ວມ.

ໂອກາດນີ້, ທ່ານ ພູທອນ ເມືອງປາກ ໄດ້ສະແດງຄວາມຂອບໃຈມາຍັງ ບໍລິສັດ ພອນສິຣິກຮຸບ ຈຳກັດ ທີ່ໄດ້ປະກອບສ່ວນວັດຖຸ-ປັດໄຈຊ່ວຍເຫລືອໃນວຽກງານຕ້ານພະ ຍາດໂຄວິດ-19 ໃນຄັ້ງນີ້, ພ້ອມທັງລາຍງານໃຫ້ຮູ້ວ່າ: ໃນໄລຍະຜ່ານມາ ອົງການກາແດງລາວ ໄດ້ປະກອບສ່ວນໃນວຽກງານ ໂຄສະນາເຜີຍແຜ່ມາດຕະການປ້ອງກັນການຕິດເຊື້ອ, ແພ່ເຊື້ອຢູ່ໃນຊຸມຊົນ ແລະ ສູນຈຳກັດບໍລິເວນ, ໄດ້ນຳພາເຮັດກິດຈະກຳອອກກຳລັງກາຍ, ອະນາໄມ, ບຳບັດສຸຂະພາບຈິດ ໃຫ້ແກ່ຜູ້ຈຳກັດບໍລິເວນຢູ່ສູນຈຳກັດບໍລິເວນ, ພົ່ນຢາຂ້າເຊື້ອຢູ່ໃນຊຸມຊົນ-ສູນຈຳກັດບໍລິເວນ, ແຈກຢາຍອາຫານຢູ່ສູນຈຳກັດບໍລິເວນ ແລະ ໂຮງໝໍພາກສະໜາມບາງແຫ່ງ ທີ່ມີການຊ່ວຍເຫລືອຈາກອົງການກາແດງ, ຈັດຕັ້ງໃຫ້ມີລົດກູ້ໄພປະຈຳຢູ່ສູນຈຳກັດບໍລິເວນ ເພື່ອແກ້ໄຂສຸກເສີນ ແລະ ສົ່ງຄົນເຈັບ ຢູ່ສູນຈໍາກັດບໍລິເວນໄປໂຮງໝໍ ແລະ ອື່ນໆ.

ການປະກອບສ່ວນຊ່ວຍເຫລືອຂອງ ບໍລິສັດ ພອນສິຣິກຮຸບ ຈຳກັດ ໃນຄັ້ງນີ້, ແມ່ນສອດຄ່ອງກັບຄວາມຮຽກຮ້ອງຕ້ອງການຕົວຈິງ ຂອງສະພາບການໃນປັດຈຸບັນ ເຊິ່ງໄດ້ສະ ແດງເຖິງຄວາມມີສະຕິຕື່ນຕົວທາງດ້ານການເມືອງ, ຄວາມເສຍສະຫລະ, ຄວາມເອື້ອເຟື້ອເພື່ອແຜ່, ຄວາມເປັນຫ່ວງເປັນໃຍ, ຄວາມເປັນແບບຢ່າງທີ່ດີ ແລະ ກາຍເປັນກຳລັງແຮງອັນໃຫຍ່ຫລວງໃຫ້ແກ່ປະເທດຊາດ ແລະ ປະຊາຊົນ ໂດຍສະເພາະພະນັກງານ ແພດໝໍ, ອາສາສະໝັກ ແລະ ເຈົ້າໜ້າທີ່ທຸກຄົນ ທີ່ພວມປະຕິບັດໜ້າທີ່ຕ້ານການແພ່ລະບາດຂອງເຊື້ອພະຍາດໂຄວິດ-19 ຢູ່ໃນທົ່ວປະເທດ, ພ້ອມທັງໃຫ້ຄຳໝັ້ນສັນຍາວ່າ ຈະນຳໃຊ້ເງິນ ແລະ ເຄື່ອງຊ່ວຍເຫລືອດັ່ງກ່າວ ໃຫ້ຖືກກັບຈຸດປະສົງ ແລະ ເປົ້າໝາຍ ເພື່ອໃຫ້ເກີດປະ ໂຫຍດສູງສຸດ

.ຂ່າວ: ທະນູທອງ