ເຂດບ້ານທົ່ງກາບ ເມືອງຊຽງຮ່ອນ ຈະໄດ້ນໍາໃຊ້ນໍ້າປະປາໄວໆນີ້

ຕາມການລາຍງານຈາກ ຫ້ອງການໂຍທາທິການ ແລະ ຂົ່ນສົ່ງ ເມືອງຊຽງຮ່ອນ ແຂວງໄຊຍະບູລີ ໄດ້ໃຫ້ຮູ້ວ່າ: ໂຄງການກໍ່ສ້າງນໍ້າປະປາ ຢູ່ເຂດບ້ານທົ່ງກາບ ເມືອງຊຽງຮ່ອນ ມາຮອດປັດຈຸບັນແມ່ນສໍາເລັດແລ້ວ 90%, ຄວດວ່າຈະສຳເລັດ ແລະເປີດການນຳໃຊ້ໃນເດືອນທັນວາ 2021 ທີ່ຈະມາເຖິງ.

ໂຄງການດັ່ງກ່າວ, ເປັນໂຄງການຂອງ ລັດວິສາຫະກິດນໍ້າປະປາ ແຂວງໄຊຍະບູລີ ໂດຍມີຈຸດປະສົງເພື່ອສະໜອງນໍ້າປະປາ ໃຫ້ແກ່ປະຊາຊົນເຂດບ້ານທົ່ງກາບ ຈຳນວນ 7 ບ້ານຄື: ບ້ານທົ່ງກາບ, ປົ່ງແປ້ນ, ນໍ້າລ້ອມ, ແກສີພົມ, ພູລ້ານ, ສີນົກໄຊ ແລະ ບ້ານລັບ. ສຳລັບອົງປະກອບຂອງການກໍ່ສ້າງມີ: ລະບົບຫົວງານ, ໂຮງງານຜະລິດນໍ້າ, ຕາຂ່າຍທໍ່ບໍລິການໜ້າດິນ, ລະບົບໄຟຟ້າ ແລະ ຫ້ອງການ, ກຳລັງການຜະລິດແມ່ນ 60 ເເມັດກ້ອນຕໍ່ຊົ່ວໂມງ, ອ່າງເກັບນໍ້າບັນຈຸ 250 ເເມັດກ້ອນ, ຕາຂ່າຍທໍ່ບໍລິການ 48,5 ກິໂລແມັດ, ທໍ່ສົ່ງນໍ້າດິບ 9.800 ແມັດ.

ມາຮອດປະຈຸບັນ ວຽກງານການກໍ່ສ້າງລະບົບຫົວງານ ສຳເລັດແລ້ວ 92%, ວຽກງານການກໍ່ສ້າງໂຮງານ ສຳເລັດແລ້ວ 90%, ວຽກງານກາກໍ່ສ້າງຫ້ອງການສຳເລັດແລ້ວ 100%, ວຽກງງານການກໍ່ສ້າງລະບົບຕາຄ່າຍວາງທໍ່ສຳເລັດແລ້ວ 93% ແລະ ວຽກໄຟຟ້າ ສຳເລັດແລ້ວ 18% ລວມມູນຄ່າການກໍ່ສ້າງທັງໝົດ 8,2 ຕື້ກີບ ໂດຍແມ່ນບໍລິສັດ ທໍ່ນໍ້າລາວ ອຸດສາຫະກຳເຕັກໂນໂລຊີ ຈຳກັດຜູ້ດຽວ ເປັນຜູ້ຮັບເໝົາກໍ່ສ້າງໂດຍໃຊ້ເວລາໃນການກໍ່ສ້າງ 180 ວັນ. ປັດຈຸບັນ ກໍາລັງຕໍ່ທໍ່ຂ້າມຫ້ວຍ, ກໍ່ບ໋ອກປະຕູນໍ້າ, ວາງທໍ່ຂ້າມທາງປູຢາງ, ກໍ່ສ້າງເຮືອນປໍ້າ, ເຮືອນເຄມີ ແລະ ອະນາໄມອ່າງ ຄາດວ່າຈະໃຫ້ສໍາເລັດ ແລະ ນໍາໃຊ້ 100% ໃນເດືອນທັນວາທ້າຍປີນີ້.