ວັນທີ 3 ພະຈິກ 2021 ສໍານັກຂ່າວຕ່າງປະເທດຫຼາຍແຫ່ງ ລາຍງານຂ່າວກ່ຽວກັບ ເດັກນ້ອຍອາຍຸ 4 ປີ ທີ່ມີຊື່ວ່າ Cleo Smith, ເດັກນ້ອຍຜູ້ຍິງຊາວອົດສະຕຣາລີ ທີ່ຫາຍຕົວໄປ 18 ມື້ກ່ອນ. ໃນທີ່ສຸດ ຕຳຫຼວດອົດສະຕຣາລີກໍສືບພົບ Cleo Smith ຢູ່ເຮືອນຫຼັງໜຶ່ງ ໃນເມືອງ Carnarvon ເຊິ່ງເປັນຕົວເມືອງຊົນນະບົດ ໃນປະເທດອົດສະຕາລີຕາເວັນຕົກ, ໂດຍ Cleo Smith ແມ່ນປອດໄພ ຫຼັງຈາກໄດ້ຖືກຄົນຮ້າຍລັກພາຕົວໄປ ເປັນເວລາ 18 ມື້
ຊາຍຄົນຮ້າຍດັ່ງກ່າວມີຊື່ວ່າ Terry Kelly ອາຍຸ 36 ປີ ເປັນຄົນຊົນເຜົ່າພື້ນເມືອງ. ຂະນະນີ້ຢູ່ໃນການກັກຂັງ, ຄາດວ່າຈະຖືກຕຳຫຼວດດຳເນີນຄະດີໃນໄວໆນີ້. Terry Kelly ໄດ້ຖືກຈັບກຸມຫຼັງຈາກຕຳຫຼວດພົບ Cleo Smith ຢູ່ຄົນດຽວໃນເຮືອນຫຼັງໜຶ່ງໃນເມືອງ Carnarvon ປະມານ 3 ກິໂລແມັດ ຫ່າງຈາກບ້ານຂອງຄອບຄົວ Cleo Smith
ສໍານັກຂ່າວບາງແຫ່ງ ໄດ້ຂຸດຄົ້ນຂໍ້ມູນສ່ວນຕົວຂອງ Terry Kelly ແລະ ພົບຂໍ້ມູນວ່າຊາຍຄົນດັ່ງກ່າວ ມີບັນຊີອອນລາຍຊົນຫຼາຍອັນ, Terry Kelly ອ້າງວ່າມີຄວາມຫຼົງໄຫຼກັບ Bratz Dolls (Bratz Dolls ຈາກການອອກແບບ Isaac Larian ພາຍໃຕ້ໃບອະນຸຍາດຈາກ MGA Entertainment). ສໍານັກຂ່າວ ໄດ້ເຜີຍແຜ່ຮູບພາບຫ້ອງນອນຂອງ Terry Kelly ທີ່ເຕັມໄປດ້ວຍຕຸກກະຕາ, ເຊິ່ງຫ້ອງດັ່ງກ່າວ ກໍບໍ່ມີໃຜຮູ້ວ່າມັນຕັ້ງຢູ່ໃສ ສັນນິຖານວ່າ ອາດຈະເປັຮຫ້ອງທີ່ມີໃນບ້ານທີ່ Cleo Smith ຖືກລັກພາຕົວໄປ ຈາກການສອບຖາມ ບ້ານໃກ້ເຮືອນຄຽງ ແລະ ໝູ່ເພື່ອນຂອງ Kelly ກ່າວວ່າ ບໍ່ຮູ້ຫຍັງຫຼາຍກ່ຽວກັບຊີວິດສ່ວນຕົວຂອງ Kelly, ລວມທັງເລື່ອງທີ່ລາວມີລູກເປັນຂອງຕົນເອງ ຫຼື ບໍ່.
ຕຳຫຼວດກ່າວວ່າ ໃນຂະນະທີ່ບຸກເຂົ້າໄປໃນເຮືອນຢູ່ທີ່ຖະຫນົນ Tonkin Cres, ພວກເຂົາໄດ້ພົບເຫັນ Cleo ຢູ່ຄົນດຽວຢູ່ໃນເຮືອນ ແລະ ກໍາລັງນັ່ງຫຼີ້ນກັບຕຸກກະຕາຫຼາຍໂຕ. ກ້ອງບັນທຶກວິດີໂອຂອງຕຳຫຼວດເຜີຍໃຫ້ເຫັນວ່າ Cleo ມີຜົມທີ່ສະອາດ ແລະເປັນຫວີເປັນລະບຽບຮຽບຮ້ອຍ, ໃສ່ຊຸດນອນໃໝ່ ແລະ ມີຄວາມສະອາດຮຽບຮ້ອຍ. ນີ້ເຮັດໃຫ້ການຄາດເດົາວ່າ Kelly ເບິ່ງແຍງ Cleo ແລະ ເບິ່ງແຍງຄືກັນກັບເປັນຕຸກກະຕາໂຕໜຶ່ງ.
ເພື່ອນບ້ານ ແລະ ໝູ່ສະໜິດຍັງໄດ້ກ່າວຕື່ມວ່າ Kelly ເປັນຄົນສຸພາບ, ບໍ່ຄ່ອຍມັກເວົ້າກັບໃຜ ສອງອາທິດທີ່ຜ່ານມາເຫັນລາວຂັບລົດເຂົ້າອອກ ແລະ ມັກຍ່າງເລາະຕາມເມືອງເລື້ອຍໆ ໂດຍສະເພາະແມ່ນຢູ່ອ້ອມຂ້າງຮ້ານຄ້າໃຫຍ່.
ທາງດ້ານຕໍາຫຼວດ Rod Wide ກ່າວວ່າ ຜົນກວດຮ່າງກາຍ ແລະ ຈິດໃຈຂອງ Cleo ຢູ່ທີ່ໂຮງໝໍແມ່ນມີຜົນກວດອອກມາເປັນທີ່ໜ້າພໍໃຈ ແລະ ບໍ່ໄດ້ມີຄວາມຜິດປົກກະຕິໃດໆ.
ແຫຼ່ງຂ່າວ: Jingjonews
Discussion about this post