ເພື່ອຜັນຂະຫຍາຍ ແລະຈັດຕັ້ງປະຕິບັດວາລະແຫ່ງຊາດ ກ່ຽວກັບ ການຜະລິດພືດເປັນສິນຄ້າ ເພື່ອສົ່ງອອກນໍາເອົາເງິນຕາເຂົ້າມາປະເທດ, ກົມປູກຝັງ ຂໍອະນຸຍາດລາຍງານໂດຍຫຍໍ້ ກ່ຽວກັບ ສະພາບການ ຜະລິດພືດຕະກຸນໝາກກ້ຽງ ເຊັ່ນ: ໝາກຜູກ, ໝາກກ້ຽງ, ແລະ ໝາກນາວ ເປັນສິນຄ້າ ເພື່ອສົ່ງອອກ ຈາກ ສປປ ລາວ ໄປ ສປ ຈີນ, ຊຶ່ງສາມາດສັງລວມ ດັ່ງລຸ່ມນີ້:
1. ສະພາບລວມ:ໃນປີ 2021, ເນື້ອທີ່ປູກພືດຕະກຸນໝາກກ້ຽງທົ່ວປະເທດມີທັງໝົດ 3,620 ຮຕ, ຜົນຜະລິດ 57,500 ຕ.ໃນນີ້, ເນື້ອທີ່ຜະລິດເປັນສິນຄ້າເພື່ອສົ່ງອອກມີ 2,500 ຮຕ ຫຼື ເທົ່າກັບ 70%, ຜົນຜະລິດ ປະມານ 50,000 ກວ່າໂຕນ ກວມເອົາ 9 ແຂວງ ຄື: ຫຼວງນ້ຳທາ, ບໍ່ແກ້ວ, ໄຊຍະບູລີ, ຫຼວງພະບາງ, ນະຄອນຫຼວງວຽງຈັນ, ບໍລິຄໍາໄຊ, ສະຫວັນນະເຂດ, ຈຳປາສັກ ແລະ ອັດຕະປື ໂດຍມີ 9 ບໍລິສັດ ພາຍໃນ ທັງພາຍໃນ ແລະ ຕ່າງປະເທດ ໄດ້ຊຸກຍູ້ ແລະ ລົງທຶນ ໃນຮູບແບບ 2 ບວກ 3 ແລະ ເຊົ່າດິນນຳປະຊາຊົນ, ຄາດຄະເນຜົນຜະລິດເບື້ອງຕົ້ນທີ່ຈະສົ່ງອອກ ໄປ ສປ ຈີນ ມີປະມານ 50,000 ໂຕນ ຄິດເປັນມູນຄ່າປະມານ 50 ລ້ານໂດລາສະຫະລັດໃນຕົ້ນປີ 2022ເປັນຕົ້ນໄປ.
![](https://kkklao.com/wp-content/uploads/2021/11/63.jpg)
ສຳລັບຕົວເລກການສົ່ງອອກພືດ ພາຍໃນ 10 ເດືອນ ຂອງປີ 2021 ຜ່ານມາ ມີທັງໝົດ 800 ກວ່າລ້ານໂດລາສະຫະລັດ ທຽບໃສ່ຊ່ວງເວລາດຽວກັນ ປີ 2020 ຜ່ານມາ (623 ລ້ານໂດລາສະຫະລັດ) ເຫັນວ່າເພີ້ມຂຶ້ນ 29 %ຫຼື ເທົ່າກັບ 148 ລ້ານໂດລາສະຫະລັດ, ໃນນີ້, ຫຼາຍກວ່າ 80% ຂອງມູນຄ່າສົ່ງອອກທັງໝົດ ແມ່ນ ຕະຫຼາດ ສປຈີນ ແລະ ພືດທີ່ສົ່ງອອກຫຼາຍກວ່າໝູ່ແມ່ນ ມັນຕົ້ນ, ໝາກກ້ວຍ, ໝາກໂມ, ອ້ອຍ,ຢາງພາລາ.
![](https://kkklao.com/wp-content/uploads/2021/11/62-2.jpg)
2. ການເຈລະຈາເຕັກນິກເປີດຕະຫຼາດພືດຕະກຸນໝາກກ້ຽງ:ກົມປູກຝັງ ໃນນາມເປັນອົງການປ້ອງກັນພືດແຫ່ງຊາດ (NPPO) ຂອງ ສປປ ລາວ ໄດ້ດຳເນີນການເຈລະຈາເຕັກນິກເປີດຕະຫຼາດ ກັບກົມກັກກັນພືດ ແລະ ສັດ, ອົງການບໍລິຫານພາສີ ສປ ຈີນ ເພື່ອສົ່ງອອກໝາກພຸກ, ໝາກກ້ຽງ ແລະ ໝາກນາວ ໄປ ສປ ຈີນ ໂດຍໃຊ້ເວລາເກືອບ 3 ປີ ເລີ້ມແຕ່ ປີ 2019 ເປັນຕົ້ນມາ ຈົນເຖິງມື້ນີ້ ໂດຍຜ່ານຂະບວນການເຈລະຈາ ແລະ ປະຕິບັດຕາມຂັ້ນຕອນ ຕາມຄຳສັ່ງ ຂອງລັດຖະມົນຕີ ເລກທີ 01017ກປ, ລົງວັນທີ 20 ມັງກອນ 2020 ແລະ ຄໍາແນະນຳ ຂອງລັດຖະມົນຕີ ກະຊວງກະສິກໍາ ແລະ ປ່າໄມ້ ເລກທີ1288/ກປ ລົງວັນທີ 30 ກັນຍາ 2021 ຊຶ່ງສາມາດ ສັງລວມຫຍໍ້ບັນດາໜ້າວຽກທີ່ໄດ້ເຄື່ອນໄຫວຕົວຈິງ ດັ່ງລຸ່ມນີ້:
![](https://kkklao.com/wp-content/uploads/2021/11/64.jpg)
1) ໃນເດືອນ 8 ປີ 2019, ກົມປູກຝັງ ໄດ້ສົມທົບກັບຂະແໜງປູກຝັງແຂວງ, ຜູ້ປະກອບການ ແລະ ພາກສ່ວນກ່ຽວຂ້ອງ ລົງສຳຫຼວດ ແລະ ເກັບກໍາຂໍ້ມູນ ເພື່ອສ້າງເປັນບົດລາຍງານເຕັກນິກ ກ່ຽວກັບການປະເມີນຄວາມສ່ຽງສັດຕູພືດ (PRA); ຫຼັງຈາກນັ້ນ, ກໍ່ໄດ້ນຳສົ່ງຂໍ້ມູນດັ່ງກ່າວ ໃຫ້ກົມກັກກັນພືດ ແລະ ສັດຂອງອົງການບໍລິຫານພາສີ ແຫ່ງ ສປ ຈີນ (GACC) ເພື່ອພິຈາລະນາ ໂດຍຜ່ານສະຖານເອກອັກຄະລັດຖະທູດແຫ່ງ ສປປ ລາວ ປະຈຳ ສປ ຈີນ ທີ່ ນະຄອນຫຼວງປັກກິ່ງ.
2) ເດືອນ 1 ໃນປີ 2020 ຝ່າຍຈີນ ໄດ້ສົ່ງຄະນະຊ່ຽວຊານສະເພາະດ້ານ (ແມງໄມ້, ພະຍາດ, ເຄມີ, ພາສີ) ມາສົມທົບ ແລະ ເຮັດວຽກຮ່ວມກັບກົມປູກຝັງ ເພື່ອກວດກາ ແລະ ປະເມີນບັນດານິຕິກຳ, ຄູ່ມືວິຊາການ ພ້ອມທັງລົງກວດກາ ແລະ ປະເມີນສະພາບການຜະລິດຕົວຈິງໂດຍການສຸ່ມເອົາ 5 ແຂວງ ຄື: ແຂວງ ຫຼວງນ້ຳທາ, ບໍ່ແກ້ວ, ໄຊຍະບູລີ, ອັດຕະປື ແລະ ນະຄອນຫຼວງວຽງຈັນ.
3) ເດືອນ 5 ປີ 2020, ຝ່າຍຈີນ ໄດ້ສົ່ງຮ່າງອານຸສັນຍາ (ພາສາອັງກິດ ແລະ ພາສາຈີນ) ໃຫ້ກົມປູກຝັງເພື່ອ ຄົ້ນຄ້ວາ ພິຈາລະນາທາງດ້ານໂຄງສ້າງ, ເນື້ອໃນ, ເຕັກນິກ ແລະ ແປ ເປັນພາສາລາວ ພ້ອມທັງໄດ້ກຳນົດແຜນລົງນາມເຊັນອານຸສັນຍາດັ່ງກ່າວ ໃນຊ່ວງເວລາງານວາງສະແດງສິນຄ້າ ຊຽງໄຮ, ສປ ຈີນ ໃນທ້າຍປີ 2020 ແຕ່ເນື່ອງຈາກ ມີການລະບາດຂອງພະຍາດໂຄວິດ-19 ຮຸ້ນແຮງ ຈຶ່ງຖືກເລື່ອນອອກໄປໂດຍບໍ່ມີກໍານົດ.
![](https://kkklao.com/wp-content/uploads/2021/11/611-1024x544.jpg)
4) ໃນຕົ້ນປີ 2011, ທາງຝ່າຍຈີນ ໄດ້ສົ່ງຮ່າງອານຸສັນຍາ ສະບັບປຸງໃໝ່ ໃຫ້ກົມປູກຝັງ ໂດຍຜ່ານສະຖານເອກອັກຄະລັດຖະທູດແຫ່ງ ສປປ ລາວ ປະຈຳ ສປ ຈີນ ທີ່ ນະຄອນຫຼວງປັກກິ່ງ ເພື່ອ ໃຫ້ປັບປຸງເນື້ອໃນ, ຄໍາສັບເຕັກນິກ ແລະ ໂຟເມັດ ແບບໃໝ່.
5) ໃນ 2 ວັນຜ່ານມານີ້ ຫຼື ວັນທີ 4 ເດືອນນີ້, ສະຖານເອກອັກຄະລັດຖະທູດລາວ ທີ່ ນະຄອນຫຼວງປັກກິ່ງແລະ ຝ່າຍຈີນ ໄດ້ຕອບເຫັນດີເປັນເອກະພາບ ແລະ ກໍານົດເອົາ ວັນທີ 5 ພະຈິກ 2021 ເປັນມື້ລົງນາມອານຸສັນຍາ ໂດຍໃຫ້ແຕ່ລະຝ່າຍຈັດສະເພາະໃຜແລະ ຖ່າຍຮູບລວມຂອງຝ່າຍຕົນ ເປັນສັກຂີພິຍານແລ້ວສົ່ງໃຫ້ອີກຝ່າຍໜຶ່ງເພື່ອລົງນາມ ແລະ ເກັບຮັກສາໄວ້ເປັນບ່ອນອີງ.
ຂໍ້ມູນຈາກ: ກົມປູກຝັງ, ກະຊວງກະສິກໍາ ແລະ ປ່າໄມ້
Discussion about this post