ອັດຕາເງິນເຟີ້ເພີ່ມຂຶ້ນ 4.​17% ໃນເດືອນກັນຍາຖ້າທຽບໃສ່ປີຜ່ານມາ

ອີງຕາມບົດລາຍງານອັດຕາເງິນເຟີ້ຂອງ ສປປ ລາວ ປະຈຳເດືອນກັນຍາ 2021 ຂອງສູນສະຖິຕິແຫ່ງຊາດ, ກະຊວງແຜນການ ແລະ ການລົງທຶນ ເລກທີ 255/ສຖຕ2.2, ລົງວັນທີ 17 ຕຸລາ 2021 ໃຫ້ຮູ້ວ່າ: ສະພາບລວມຂອງອັດຕາເງິນເຟີ້ປະຈຳເດືອນກັນຍາ 2021 ທຽບກັບເດືອນດຽວກັນຂອງປີຜ່ານມາ​ ເພີ່ມຂຶ້ນ 4,17% ຊຶ່ງໃນນີ້ແມ່ນມາຈາກການເໜັງຕີງຂອງ 12 ໝວດສິນຄ້າຕົ້ນຕໍຄື: ໝວດສິນຄ້າ ແລະ ບໍລິການອື່ນໆເພີ່ມຂຶ້ນ 7,39%; ໝວດຄົມມະນາຄົມແລະຂົນສົ່ງເພີ່ມຂຶ້ນ 6,97%; ໝວດຮ້ານອາຫານແລະໂຮງແຮມເພີ່ມຂຶ້ນ 6,76%; ໝວດເຫຼົ້າ ແລະ ຢາສູບເພີ່ມຂຶ້ນ 5,16%, ໝວດເຄື່ອງນຸ່ງ ແລະ ເກີບເພີ່ມຂຶ້ນ 4,31%, ໝວດຮັກສາສຸຂະພາບ ແລະ ຢາເພີ່ມຂຶ້ນ 4,30%; ໝວດທີ່ພັກອາໄສ, ນໍ້າປະປາ, ໄຟຟ້າ ແລະ ເຊື້ອເພີງຫຸງຕົ້ມເພີ່ມຂຶ້ນ 4,07%; ໝວດເຄື່ອງໃຊ້ໃນເຮືອນ ເພີ່ມຂຶ້ນ 4%; ໝວດສະບຽງອາຫານ ແລະ ເຄື່ອງດື່ມບໍ່ແມ່ນເຫຼົ້າເພີ່ມຂຶ້ນ 3,09%; ໝວດໄປສະນີ ແລະ ໂທລະຄົມມະນາຄົມເພີ່ມຂຶ້ນ 1,88%; ໝວດບັນເທີງ ແລະ ການພັກຜ່ອນເພີ່ມຂຶ້ນ 1,41% ແລະ ໝວດການສຶກສາ ເພີ່ມຂຶ້ນ 0,47%.

ປັດໄຈທີ່ສົ່ງຜົນໃຫ້ອັດຕາເງິນເຟີ້ເດືອນກັນຍາ 2021 ທຽບກັບເດືອນຜ່ານມາ ເໜັງຕີງເພີ່ມຂຶ້ນ ສືບເນື່ອງມາຈາກໃນເດືອນຜ່ານມາຄື: 1. ບັນຫາຂອງການແຜ່ລະບາດພະຍາດໂຄວິດ 19 ໃນລາວແມ່ນຍັງບໍ່ມີທ່າທີ່ຈະຫຼຸດລົງ ເຮັດໃຫ້ເປັນສາເຫດໜຶ່ງທີລາຄາສິນຄ້າຍັງສືບຕໍ່ເໜັງຕີງເພີ່ມຂຶ້ນຢູ່ໃນທຸກໝວດສິນຄ້າ; ຄະນະທີ່ລັດຖະບານ ຍັງມີມາດຕະການຜ່ອນຜັນ ແລະ ສືບຕໍ່ໃຫ້ປີດບ້ານ, ເມືອງ ແລະ ແຂວງ ເຊິ່ງເຮັດໃຫ້ການຂົນສົ່ງລະຫວ່າງແຂວງຕໍ່ແຂວງ ພົບຄວາມຫຍຸ້ງຍາກເຮັດໃຫ້ລາຄາສິນຄ້າ ມີລາຄາເພີ່ມຂຶ້ນສູງ ໂດຍສະເພາະໝວດສິນຄ້າ ແລະ ເຄື່ອງດື່ມທີ່ບໍ່ແມ່ນເຫຼົ້າແມ່ນເພີ່ມຂຶ້ນສູງເຊັ່ນ: ເຂົ້າສານ, ເຂົ້າຈີ່ ແລະ ທາດແປ້ງ, ນົມ, ເນີຍ ແລະ ໄຂ່, ນ້ຳມັນພືດ, ໝາກໄມ້ສົດ, ຜັກສົດ, ເຄື່ອງປຸງແຕ່ງອາຫານ.

2. ໝວດສິນຄ້າອື່ນໆທີ່ຍັງສືບຕໍ່ເພີ່ມຂຶ້ນເມືອທຽບໃສ່ຫຼາຍເດືອນທີ່ຜ່ານມາ ໂດຍສະເພາະແມ່ນລາຄາຄໍາຮູບປະພັນ ສາເຫດຍ້ອນລາຄາຄໍາໃນຕະຫຼາດໂລກ ເໜັງຕີງເພີ່ມຂຶ້ນ, ເຄື່ອງບຳລຸງຜິວ ແລະ ເຄື່ອງໃຊ້ປະຈໍາວັນ ເພີ່ມຂຶ້ນ ຊື່ງຕິດພັນກັບອັດຕາແລກປ່ຽນ (ເງິນກີບຍັງສືບຕໍ່ອ່ອນຄ່າ).3. ລາຄານ້ຳມັນເຊື້ອໄຟ.