ໜິບໍ່ລອດ ຈັບໄດ້ 2 ຄົນ ຮ່ວມກັນ ຄ້າຂາຍຢາ ພ້ອມຢາບ້າ60.000 ເມັດ

ວັນທີ 13 ຕຸລາ ຜ່ານມາ,ເຈົ້າໜ້າທີ່ ປກສ ແຂວງຈຳປາສັກ ຈັບເປົ້າໝາຍຢາເສບຕິດ ໄດ້ 2 ຄົນ ພ້ອມຢາບ້າ 30 ມັດ ເທົ່າກັບ 60.000 ເມັດ,ຢາໄອສ໌ 0,7 ກຼາມ, ລົດກະບະຟອດ ສີຂາວ ທະບຽນ ກຮ 6214 ຈຳປາສັກ,ເງິນ 500.000 ກີບ ແລະ ເຄື່ອງຂອງກາງອີກຈຳນວນ ໜຶ່ງ ໄປດຳເນີນຄະດີ.

ເຈົ້າໜ້າທີ່ ປກສ ແຂວງຈຳປາສັກ ໃຫ້ຮູ້ວ່າ: ຜູ້ຖືກຫາ ທັງສອງຄົນ ຊື່ ທ້າວ ຄິເຮັງ ອາຍຸ 25 ປີ ຢູ່່ບ້ານຈັດສັນ ນະຄອນປາກເຊ ແລະ ທ້າວ ເດດທະວີ ອາຍຸ 34 ປີ ຢູ່່ບ້ານໃໝ່ສິງສຳພັນ ເມືອງຊະນະສົມບູນ ແຂວງຈຳປາສັກ.

ຄະດີຢາເສບຕິດດັ່ງກ່າວນີ້,ໃນເບື້ອງຕົ້ນ ແມ່ນໄດ້ຮັບລາຍງານ ມີການລັກລອບຄ້າຂາຍຢາເສບຕິດ ໂດຍໃຊ້ຮູບການຊຸກເຊື່ອງຢາເສບຕິດໃສ່ໃນກ່ອງເຄື່ອງຝາກ ຜ່ານບໍລິສັດຂົນສົ່ງແຫ່ງໜຶ່ງ ຕັ້ງຢູ່່ບ້ານສະຜ່າຍ ເມືອງຊະນະສົມ ບູນ.

ຈາກນັ້ນ,ເຈົ້າໜ້າທີ່ວິຊາສະເພາະ ກໍໄດ້ລົງເກັບກຳຂໍ້ ມູນ ແລະ ຕິດຕາມຊອກຫາ ຈົນສາມາດຈັບເປົ້າໝາຍ ທີ່ເປັນເຈົ້າຂອງຢາບ້າຈຳນວນດັ່ງກ່າວໄດ້.

ປັດຈຸບັນຄະດີດັ່ງກ່າວ, ເຈົ້າໜ້າທີ່ ປກສ ແຂວງຈຳປາສັກ ພວມສືບຕໍ່ສອບສວນຂະຫຍາຍຜົນ ທີ່ໄປທີ່ມາຂອງຢາເສບຕິດຈຳນວນດັ່ງກ່າວ ເພື່ອຈະຕິດຕາມຈັບຜູ້ມີສ່ວນຮ່ວມ ໃນການຄ້າຂາຍຢາເສບຕິດໃນຄັ້ງນີ້ ມາດຳເນີນຄະດີຕາມກົດໝາຍ.

ຂ່າວ-ພາບ: ປກສ ແຂວງຈຳປາສັກ