ເຫດຄົນແຂນຄໍຕາຍ ອາດຈະເກີດຄວາມຕຶງຄຽດຈາກການຕິດພະຍາດໂຄວິດ -19

ໃນເວລາ 17:00 ໂມງ ຂອງວັນທີ 29 ຕຸລາ 2021, ປກສ ກຸ່ມສີວິໄລ ໄດ້ຮັບແຈ້ງວ່າ: ມີຄົນເສຍຊີວິດແຂນຄໍຕາຍ ຢູ່ຫໍພັກໂຮງງານເວນເຈີ ຕັ້ງຢູ່ໜ່ວຍ 12 ບ້ານສາຍນໍ້າເງິນ ເມືອງໄຊທານີ ນະຄອນຫຼວງວຽງຈັນ ພາຍຫຼັງໄດ້ຮັບແຈ້ງ ປກສ ກຸ່ມປະສານສົມທົບກັບພະແນກຕໍາຫຼວດ ປກສ ເມືອງໄຊທານີ ລົງຈຸດເກີດເຫດ ພົບເຫັນຜູ້ເສຍຊີວິດ ເປັນເພດຍິງ ຊື່ ນາງແຕງໂມ ສີຊົມພູ ອາຍຸ 23 ປີ ອາຊີບກໍາມະກອນ ຢູ່ໂຮງງານດັ່ງກ່າວ ບ້ານເກີດບ້ານໂພນໂຮງ ແຂວງວຽງຈັນ.

ຜ່ານການເກັບກໍາຂໍ້ມູນກ່ອນ ແລະ ຫຼັງເກີດເຫດ ຮູ້ໄດ້ວ່າ: ຜູ້ເສຍຊີວິດເຂົ້າມາເຮັດວຽກຢູ່ໂຮງງານເວນເຈີ ໃນວັນທີ 8 ຕຸລາ 2020, ມາຮອດວັນທີ 24 ກັນຍາ 2021 ຜູ້ກ່ຽວໄດ້ຕິດເຊື້ອພະຍາດໂຄວິດ -19 ແລະ ໄດ້ອອກໂຮງໝໍ ວັນທີ 10 ຕຸລາ 2021 ຈາກນັ້ນກໍສືບຕໍ່ກັກໂຕຢູ່ໃນຫໍພັກອີກ 14 ວັນ ຢູ່ໃນຫ້ອງນໍາກັນທັງໝົດ 10 ຄົນ. ຮອດວັນທີ 27 ຕຸລາ 2021 ນາງ ແຕງໂມ ມີອາການຄຸ້ມຄັ່ງ ໃຊ້ມີດແຖໜວດປາດແຂນໂຕເອງ ໄດ້ຮັບບາດເຈັບ ພາຍຫຼັງໄດ້ຮັບການຮັກສາ ກໍອອກມາພັກພື້ນຢູ່ຫໍພັກ ມາຮອດຕອນທ່ຽງຂອງວັນທີ 29 ຕຸລາ 2021 ຜູ້ເສຍຊີວິດ ແລະ ໝູ່ ຍັງກິນເຂົ້າທ່ຽງນໍາກັນ ຈາກນັ້ນ, ໝູ່ຄູ່ກໍໄດ້ແຍກຍ້າຍໄປເຮັດວຽກໝົດ ມີແຕ່ຜູ້ເສຍຊີວິດຢູ່ຫ້ອງຄົນດຽວ ຫຼັງຈາກຮອດເວລາເລີກວຽກຕອນແລງ ໝູ່ຈຶ່ງໄດ້ພາກັນກັບມາຫ້ອງຈຶ່ງພົບເຫັນ ຜູ້ກ່ຽວແຂນຄໍຕາຍຢູ່ຂ້າງຕຽງນອນ.

ຕໍ່ກັບເຫດການທີ່ເກີດຂຶ້ນ ເຈົ້າໜ້າທີ່ກໍາລັງກວດກາຊັນນະສູດຊາກສົບ ຊອກຂໍ້ມູນຫຼັກຖານ ເພື່ອຕີລາຄາເຫດການ ຜູກຄໍຂອງ ນາງ ແຕງໂມ ລາຍລະອຽດຈະມານໍາສະເໜີໃຫ້ຊາບພາຍຫຼັງ. ກອງບັນຊາການ ປກສ ນວ ສະແດງຄວາມເສຍໃຈນໍາຄອບຄົວຂອງຜູ້ເສຍຊີວິດ ແລະ ຮຽກຮ້ອງມາຍັງທົ່ວສັງຄົມ ຂໍໃຫ້ດໍາລົງຊີວິດຢ່າງມີສະຕິ, ທຸ່ນທ່ຽນລະມັດລະວັງ ເຊື່ອຟັງການແນະນໍາຂອງຄະນະສະເພາະກິດ ໃນການປ້ອງກັນສະກັດກັ້ນເຊື້ອພະຍາດໂຄວິດ-19.