ເຈົ້າໜ້າທີ່ຈັບເປົ້າໝາຍຢາເສບຕິດ 2 ຄົນ ພ້ອມຂອງກາງຈຳນວນ 4.800 ເມັດ

ວັນທີ 18 ຕຸລາ ຜ່ານມາ,ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຊຽງຂວາງ ສົມທົບກັບພາກສ່ວນທີ່ກ່ຽວຂ້ອງ ລົງຕິດຕາມຈັບເປົ້າໝາຍຢາເສບຕິດ ທີ່ກຳລັງເຄື່ອນໄຫວຊື້ຂາຍຢາບ້າ ຢູ່່ເຂດບ້ານໂພນສະຫວັນໄຊ ເມືອງແປກ ແຂວງຊຽງຂວາງ ໄດ້ 2 ຄົນ, ພ້ອມຂອງກາງ ລວມຢາບ້າ 24 ຖົງ ເທົ່າກັບ 4.800 ເມັດ ໄປດຳເນີນຄະດີ.

ເຈົ້າໜ້າທີ່ ປກສ ແຂວງຊຽງຂວາງ ໃຫ້ຮູ້ວ່າ: ຜູ້ຖືກຫາ ທັງ 2 ຄົນ ຊື່ ນາງ ປາຊົງ ອາຍຸ 30 ປີ ຢູ່່ບ້ານພູໄຊ ເມືອງວຽງໄຊ ແຂວງຫົວພັນ ກວດຄົ້ນພົບຢາບ້າ 21 ຖົງ ເທົ່າກັບ 4.200 ເມັດ ແລະ ທ້າວ ຈືຮົວວາງ ອາຍຸ 32 ປີ ຢູ່່ບ້ານໂພນສະຫວັນໄຊ ເມືອງແປກ ກວດຄົ້ນພົບຢາບ້າ 3 ຖົງ ເທົ່າກັບ 6.00 ເມັດ.

ພວກກ່ຽວສາລະພາບວ່າ: ໄດ້ຊື້ຢາບ້າຈຳນວນດັ່ງກ່າວ ນຳຄົນຮູ້ຈັກ ເພື່ອຈະເອົາມາຂາຍໃຫ້ຜູ້ສັ່ງຊື້ ຢູ່່ພາຍໃນເມືອງແປກ,ແຕ່ຖືກເຈົ້າໜ້າທີ່ ປກສ ຕິດຕາມຈັບໄດ້ກ່ອນ.

ປັດຈຸບັນຄະດີຢາເສບຕິດດັ່ງກ່າວ,ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຊຽງຂວາງ ພວມສືບຕໍ່ສອບສວນຂະຫຍາຍຜົນ ເພື່ອຕິດຕາມຈັບຜູ້ທີ່ຖືກຊັດທອດໃນການມີສ່ວນພົວພັນຊື້ຂາຍຢາບ້ານຳກັນ ມາດຳເນີນຄະດີຕາມກົດໝາຍ.