ຫໍພັກລວມ ມຊ ຫ້າມເດັດຂາດບໍ່ໃຫ້ກິນເຂົ້າຮ່ວມກັນ ສ່ຽງແຜ່ໂຄວິດ-19 ເປັນວົງກວ້າງ

ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ລາຍງານໃນຖະແຫຼງຂ່າວປະຈຳວັນ ວັນທີ 21 ຕຸລາ 2021 ວ່າ: ປະຈຸບັນນີ້ ມີລາຍງານພົບການຕິດເຊື້ອໃນຖັນແຖວນັກສືກສາ,ພະນັກງານ, ກໍາມະກອນໂຮງຈັກໂຮງງານ ທີ່ຢູ່ຫໍພັກ ໂດຍລວມແລ້ວ ຖືວ່າເປັນອີກສະຖານທີ່ຢູ່ລວມກັນຂອງຫຼາຍຄົນທີ່ມີຄວາມສ່ຽງສູງໃນການແຜ່ເຊື້ອສະນັ້ນ ຂໍໃຫ້ທຸກຄົນ ມີສະຕິໃນການປ້ອງກັນຕົວເອງຢ່າງເຄັ່ງຄັດ ເຊັ່ນ: ໃສ່ຜ້າປິດປາກດັງ, ໝັ່ນລ້າງມືໃຫ້ສະອາດຢູ່ເລື້ອຍໆ ເວັ້ນໄລຍະຫ່າງ, ບໍ່ໃຊ້ເຄື່ອງຮ່ວມກັນ ແລະ ຫ້າມເດັດຂາດບໍ່ໃຫ້ກິນເຂົ້າຮ່ວມກັນ ເພາະນີ້ອາດເປັນຈຸດເລີ່ມຂອງການກະຈາຍເຊື້ອພະຍາດ

ຖ້າຫາກວ່າໃນກຸ່ມມີໃຜຜູ້ໜື່ງຕິດເຊື້ອ ແລະ ຖ້າໃຜມີອາການບໍ່ສະບາຍຄ້າຍຄືໄຂ້ຫວັດ ແມ່ນໃຫ້ແຍກຕົວອອກຈາກໝູ່ທັນທີ ແລະ ຮີບຮ້ອນໄປຫາແພດເພື່ອກວດຫາເຊື້ອພະຍາດ.

ດັ່ງນັ້ນ, ຫຼາຍຫໍພັກແມ່ນຈະຖືກປິດບໍ່ໃຫ້ມີການເຂົ້າ-ອອກ ເພາະຖືວ່າຄົນຢູ່ໃນແມ່ນຜູ້ສຳຜັດໃກ້ຊິດເປັນໄລຍະເວລາ 14 ວັນ, ສະນັ້ນ ຂໍສະເໜີໃຫ້ຄະນະຮັບຜິດຊອບຄຸ້ມຄອງຫໍພັກ ຈົ່ງໄດ້ອະທິບາຍໃຫ້ຜູ້ທີ່ອາໃສຢູ່ຫໍພັກ ໃຫ້ເຂົ້າໃຈ ແລະ ປະຕິບັດຕາມມາດຕະການປ້ອງກັນຢ່າງເຄັ່ງຄັດ ເດັດຂາດບໍ່ໃຫ້ອອກຈາກຫໍພັກໂດຍບໍ່ໄດ້ຮັບການອະນຸຍາດ ແລະ ມອບໃຫ້ຄະນະຮັບຜິດຊອບອຳນວຍຄວາມສະດວກສະໜອງເຄື່ອງອຸປະໂພ, ບໍລິໂພກໃຫ້ສະຖານທີ່ກັກກັນໃນຈຸດດັ່ງກ່າວ.