ດຣ.ຄໍາໃສ ເດດລືໄຊ ຮອງຫົວໜ້າກົມປິ່ນປົວ ແລະໜ້າທີ່ການ ກະຊວງສາທາລະນະສຸກ ຖະແຫລງຕໍ່ສື່ມວນຊົນ ຕອນເຊົ້າວັນທີ 3 ຕຸລາ 2021 ເຖິງຄວາມສາມາດຮອງຮັບຄົນເຈັບທີ່ຕິດເຊື້ອພະຍາດໂຄວິດ 19 ຢູ່ໃນນະຄອນຫລວງວຽງຈັນວ່າ ຄະນະສະເພາະກິດເພື່ອຄວບຄຸມ ແລະປ້ອງກັນການລະບາດຂອງພະຍາດໂຄວິດ19 ໄດ້ຂະຫຍາຍໂຮງໝໍພາກສະໜາມຂຶ້ນອີກ 3 ແຫ່ງ ສາມາດຮອງຮັບຄົນເຈັບໄດ້ອີກຈໍານວນຫລາຍຄື ໂຮງໝໍພາກສະໜາມດາວເຮືອງຢູ່ຂົວມິດຕະພາບ1 ສາມາດຮອງຮັບຄົນເຈັບໄດ້ 800 ຄົນ, ໂຮງໝໍສະໜາມກິລາ ຫລັກ16 ສາມາດຮອງຮັບໄດ້ 360 ຄົນ, ແລະໂຮງຮຽນເຝິກອົບຮົມວິຊາຊີບຄົນພິການສີເກີດ ສາມາດຮອງຮັບຄົນເຈັບໄດ້ທັງໝົດ 600 ກວ່າຄົນ.
![](http://kkklao.com/wp-content/uploads/2021/10/41-2-1024x682.jpg)
ດຣ.ຄໍາໃສ ເດດລືໄຊ ໃຫ້ຮູ້ວ່າ ທິມງານພະນັກງານວິຊາການ ແພດໝໍ ກຽມພ້ອມໄປຮັບຄົນເຈັບທີ່ຕິດເຊື້ອພະຍາດໂຄວິດ 19 ເພື່ອໄປປິ່ນປົວຈົນສຸດຄວາມສາມາດ ແຕ່ເນື່ອງຈາກ ປະຈຸບັນຄົນເຈັບມີຫລາຍ ແລະຢູ່ກະແຈກກະຈາຍ ຈຶ່ງມີຄວາມຫຍຸ້ງຍາກ ແລະບໍ່ສາມາດໄປຮັບໄດ້ຢ່າງທັນການ ແຕ່ເຖິງຢ່າງໃດກໍຕາມ ການນໍາກະຊວງສາທາລະນະສຸກ ກໍຄືຄະນະສະເພາະກິດ ໄດ້ມີຄວາມພະຍາຍຍາມສູງ ເພື່ອຄວບຄຸມການລະບາດຂອງພະຍາດໂຄວິດ19 ໂດຍການຈັດຫາສະຖານທີ່ຈໍາກັດບໍລິເວນ ແລະສະຖານທີ່ປິ່ນປົວ ໃຫ້ພຽງພໍກັບຜູ້ຕິດເຊື້ອໃນແຕ່ລະມື້
![](http://kkklao.com/wp-content/uploads/2021/10/42-2-1024x683.jpg)
ນອກນັ້ນ ຍັງໄດ້ສົມທົບ ຮ່ວມມືກັບອົງການອະນາໄມໂລກ ຮ່າງຂໍ້ແນະນໍາສໍາລັບຜູ້ຕິດເຊື້ອທີ່ບໍ່ມີອາການ, ສາມາດພັກຢູ່ໂຮງແຮມທີ່ມີເງື່ອນໄຂ ເຊິ່ງໄດ້ຮັບອະນຸຍາດຈາກຄະນະສະເພາະກິດແລ້ວ, ນອກນັ້ນ ຍັງໄດ້ຮ່າງຂໍ້ແນະນໍາ ສໍາລັບການຕິດຕາມປິ່ນປົວຢູ່ເຮືອນຂອງຜູ້ບໍ່ມີອາການ.
ຍ້ອນພະນັກງານແພດໝໍມີຈໍານວນຈໍາກັດ ເຊິ່ງການເປີດໂຮງໝໍພາກສະໜາມຫລາຍຂຶ້ນ ແລະ ມີຄວາມຈໍາເປັນຕ້ອງເອົາພະນັກງານແພດໝໍເຂົ້າປະຈໍາຫລາຍຂຶ້ນ ຂະນະດຽວກັນຢູ່ແຕ່ລະໂຮງໝໍຍັງຕ້ອງໄດ້ຮັບໃຊ້ປະຊາຊົນຢ່າງປົກກຕິ
![](http://kkklao.com/wp-content/uploads/2021/10/43-1-1024x576.jpg)
ດັ່ງນັ້ນ ການຮັບຄົນເຈັບທີ່ຕິດເຊື້ອພະຍາດໂຄວິດ19 ຈຶ່ງກໍານົດໃຫ້ຮັບພຽງແຕ່ 3ໂຮງໝໍ ຄື ໂຮງໝໍມິດຕະພາບ, ໂຮງໝໍ 103 ກອງທັບ ແລະໂຮງໝໍເຊດຖາທິລາດ, ເຊິ່ງທັງ 3 ໂຮງໝໍ ສາມາດຮັບໄດ້ 180 ຄົນ, ເຊິ່ງເປົ້າໝາຍແມ່ນຄົນເຈັບທີ່ມີອາການປານກາງ ຫາອາການໜັກ ເຊິ່ງໄດ້ນໍາໃຊ້ແພດໝໍຈໍານວນຫລາຍເພື່ອເບິ່ງແຍງປິ່ນປົວ, ດັ່ງນັ້ນຄົນເຈັບທີ່ມີອາການເບົາບາງ ຈະຖືກສົ່ງໄປປິ່ນປົວຢູ່ພາກສະໜາມ
![](http://kkklao.com/wp-content/uploads/2021/10/44-1-1024x768.jpg)
ດັ່ງນັ້ນຈື່ງຮຽກຮ້ອງເຖິງຄົນເຈັບຢູ່ໂຮງໝໍພາກສະໜາມຈົ່ງໃຫ້ການຮ່ວມມືກັບແພດໝໍ, ພວກເຮົາຮັບຮູ້ວ່າ ພວກທ່ານອາດຈະບໍ່ໄດ້ຮັບຄວາມສະດວກສະບາຍຄືກັບຢູ່ເຮືອນທ່ານ ຂໍໃຫ້ພວກທ່ານຈົ່ງມີຄວາມອົດທົນ ຜ່ານຜ່າວິກິດໄປພ້ອມກັບແພດໝໍ ເຊິ່ງຄົນເຈັບທີ່ບໍ່ມີອາຫານຫຍັງ ຈະໄດ້ຢູ່ໂຮງໝໍພຽງແຕ່ 14ມື້ ກໍຈະໄດ້ອອກໄປຢູ່ກັບຄອບຄົວ, ແຕ່ແພດໝໍທີ່ໄປຮັບໃຊ້ທ່ານ ຕ້ອງໄດ້ຫ່າງຈາກຄອບຄົວ, ຫ່າງຈາກຄົນທີ່ເພິ່ນຮັກ ເພື່ອມາຮັບໃຊ້ທ່ານ 14ມື້ , ຫລັງຈາກນັ້ນຕ້ອງໄດ້ກັກຕົວອີກ 14ມື້ ແຕ່ຖ້າເຂົາເຈົ້າຕິດເຊື້ອ ໃນເວລາປະຕິບັດໜ້າທີ່ ກໍຕ້ອງໄດ້ໄປປິ່ນປົວອີກ ເຊິ່ງສິ່ງນີ້ແພດໝໍທຸກຄົນແມ່ນບໍ່ປາຖະໜາ, ແຕ່ຍ້ອນໜ້າທີ່ ແລະຄວາມຮັບຜິດຊອບຕ້ອງໄດ້ປະຕິບັດ
ຕອນທ້າຍ ດຣ ຄໍາໃສ ເດດລືໄຊ ໄດ້ຮຽກຮ້ອງເຖິງໝົດທຸກຄົນໃນສັງຄົມ ຈົ່ງຊ່ວຍເຫລືອເຊິ່ງກັນແລະກັນ ເຮັດແນວໃດໃຫ້ພວກເຮົາທຸກຄົນຜ່ານວິກິດການນີ້ໄປໃຫ້ໄດ້ ຕາມທິດຊີ້ນໍາຂອງລັດຖະມົນຕີກະຊວງສາທາລະນະສຸກ ໃຫ້ແພດໝໍພະຍາຍາມສູ້ຊົນ ເຮັດແນວໃດບໍ່ໃຫ້ຄົນເຈັບທີ່ມີອາການເບົາບາງກ້າວໄປຫາປານກາງ, ບໍ່ໃຫ້ຄົນເຈັບອາການປານກາງກ້າວໄປຫາໜັກ ແລະບໍ່ໃຫ້ຄົນເຈັບໜັກກ້າວໄປຫາວິກິດ ຫລືເສຍຊີວິດ ນີ້ແມ່ນວຽກງານທີ່ໜັກໜ່ວງເຊິ່ງແພດໝໍຕ້ອງໄດ້ປະຕິບັດ ເຮັດໃຫ້ຄົນເຈັບທີ່ຕິດເຊື້ອໄດ້ຮັບການປິ່ນປົວໄວ , ເຮັດໃຫ້ຄົນເຈັບທີ່ກໍາລັງປິ່ນປົວບໍ່ໃຫ້ມີບັນຫາ ແລະກ້າວໄປເຖິງອາການຮ້າຍແຮງ ແລະອອກໂຮງໝໍໂດຍບໍ່ມີບັນຫາໃດໆ
Discussion about this post