ຈະລາຈອນ ນະຄອນຫຼວງວຽງຈັນ ຕັ້ງດ່ານກວດກາ ພົບຜູ້ລະເມີດຄໍາສັ່ງຈໍາຫຼາຍ

ປະຕິບັດຕາມຄໍາສັ່ງເລກທີ 015/ຈນວ ລົງວັນທີ 30 ສິງຫາ 2021, ວ່າດ້ວຍການເພີ່ມທະວີການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງ ໂຄວິດ-19 ຢູ່ນະຄອນຫຼວງວຽງຈັນ, ໃນວັນທີ 12 ກັນຍາ 2021, ເຈົ້າໜ້າທີ່ຕໍາຫຼວດ ຈະລາຈອນ ນວ ໄດ້ສົມທົບກັບຈະລາຈອນ 9 ຕົວເມືອງ ນໍາໂດຍ ພັທ ທອງສະຫວັນ ນາມວົງ ຮອງຫົວໜ້າພະແນກຕໍາຫຼວດຈະລາຈອນ ນະຄອນຫຼວງວຽງຈັນ ລົງຕັ້ງດ່ານກວດກາພາຫະນະ ຕາມຄໍາສັ່ງ, ພົບເຫັນຜູ້ລະເມີດ ຈໍານວນ 1,373 ຄົນ, ຍິງ 449 ຄົນ.

ພັທ ທອງສະຫວັນ ນາມວົງ ກ່າວວ່າ: ການລົງຕັ້ງດ່ານກວດກາພາຫະນະ ເຂົ້າ-ອອກ ນະຄອນຫຼວງວຽງຈັນ ມີທັງໝົດ 14 ຈຸດ, ເຮັດໜ້າທີ່ກວດກາພາຫະນະ ທັງໝົດ ຈໍານວນ 1,244 ຄັນ, ໃນນີ້ ລົດໃຫຍ່ 743 ຄັນ, ລົດຈັກ 139 ຄັນ ແລະ ລົດບັນທຸກສິນຄ້າ 362 ຄັນ ຜ່ານການກວດກາມີຜູ້ລະເມີດຄໍາສັ່ງ ຈໍານວນ 1,373 ຄົນ, ຍິງ 449 ຄົນ; ເຈົ້າໜ້າທີ່ໄດ້ສຶກສາອົບກ່າວເຕື່ອນ ໃຫ້ປະຕິບັດຄໍາສັ່ງ ເລກທີ 015/ຈນວ ແລະ ມາດຕະການຂໍ້ຫ້າມວາງອອກຢ່າງເຂັ້ມງວດ.

ເພື່ອເປັນການປ້ອງກັນສະກັດກັ້ນ ແລະ ຕ້ານການແຜ່ລະບາດຂອງໂຄວິດ-19 ຮຽກຮ້ອງມາຍັງນັກຂັບຂີ່ ຈົ່ງຊ່ວຍກັນເປັນເຈົ້າການໃນການປະຕິບັດຄໍາສັ່ງເລກທີ 015/ຈນວ ວ່າດ້ວຍການເພີ່ມທະວີການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງ ໂຄວິດ-19 ຢູ່ນະຄອນຫຼວງວຽງຈັນ.