ປກສ ເມືອງສີສັດຕະນາກ ອອກກວດກາລາດຕາເວນ ພົບເຫັນຮ້ານອິນເຕີເນັດກາເຟ ລະເມີດຄຳສັ່ງ ແລະແຈ້ງການ

ເວລາປະມານ 20:00 ໂມງ ຂອງວັນທີ 11 ກັນຍາ 2021 ເຈົ້າໜ້າທີ່ ປກສ ເມືອງສີສັດຕະນາກ ນະຄອນຫຼວງວຽງຈັນ ລົງກວດກາລາດຕາເວນ ພົບເຫັນຮ້ານອິນເຕີເນັດກາເຟ ອອບເບດ 1818 ຢູ່ບ້ານ ດົງສະຫວາດ ເມືອງສີສັດຕະນາກ ລະເມີດຄໍາສັ່ງເລກທີ 15/ນຍ ແລະ ຄໍາສັ່ງເລກທີ 015/ຈນວ, ລົງວັນທີ 30 ສິງຫາ 2021 ວ່າດ້ວຍການເພີ່ມທະວີ ການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດໂຄວິດ-19 ຢູ່ ນະຄອນຫຼວງວຽງຈັນ.

ພັທ ໂອໄດ ພິມມະຈັນ ຫົວໜ້າພະແນກສັນຕິບານ ປກສ ເມືອງສີສັດຕະນາກ ນະຄອນຫຼວງວຽງຈັນ ໃຫ້ຮູ້ວ່າ: ການອອກກວດລາດຕາເວນ ແມ່ນປະຕິບັດຕາມທິດຊີ້ນຳຂອງ ຫົວໜ້າ ກອງບັນຊາການ ປກສ ເມືອງສີສັດຕະນາກ ຜ່ານການລົງກວດກາພົບເຫັນຮ້ານອິນເຕີເນັດກາເຟ ຂອງ ທ້າວ ກ້ວຍ ອາຍຸ 45 ປີ ອາຊີບທຸລະກິດ ຢູ່ບ້ານ ເກົ້າຍອດ ເມືອງສີສັດຕະນາກ ນວລະເມີດຂໍ້ຫ້າມທີ່ ຄະນະສະເພາະກິດວາງອອກ ຈຶ່ງໄດ້ສຶກສາອົບຮົມ ພ້ອມທັງຢຶດຄອມພິວເຕີ 1 ຊຸດ ມາຮັກສາໄວ້ ເພື່ອລໍຖ້າແກ້ໄຂ ແລະ ປະຕິບັດ.

ກອງບັນຊາການ ປກສ ນະຄອນຫຼວງວຽງຈັນ ຮຽກຮ້ອງມາຍັງພົນລະເມືອງທຸກຄົນ ຈົ່ງປະຕິບັດສິດພັນທະ ແລະ ໜ້າທີ່ຂອງຕົນເຂົ້າໃນວຽກງານຮັກສາຄວາມສະຫງົບ ຖ້າພົບເຫັນບັນດາຫ້າງຮ້ານທີ່ລະເມີດແຈ້ງການ, ຄໍາສັ່ນທີ່ຂັ້ງເທີງວາງອອກ ຮີບຮ້ອນລາຍງານເຈົ້າໜ້າທີ່ ຫຼື ແຈ້ງມາທາງວອດແອັບເບີ 02028899774 ຫຼື ແຈ້ງຜ່ານຊ່ອງທາງເຟສບຸກ ປ້ອງກັນຄວາມສະຫງົບ ນະຄອນຫຼວງວຽງຈັນ.

ທີ່ມາ: ປ້ອງກັນຄວາມສະຫງົບນະຄອນຫຼວງ