ສຸດແປກ ພົບແຂ້ວ 526 ເຫຼັ້ມ ໃນປາກຂອງເດັກນ້ອຍອິນເດຍ ອາຍຸ 7 ປີ

ແພດຈາກມະຫາວິທະຍາໄລ ແລະ ໂຮງໝໍທັນຕະກຳ ຊາວີທາ ໃນເມືອງເຈນໄນ ລັດທະມິນນາດູ (Tamil Nadu) ທາງພາກໃຕ້ຂອງອິນເດຍ ພົບແຂ້ວ 526 ເຫຼັ້ມ ງອກໃນປາກຂອງເດັກຊາຍຄົນໜຶ່ງອາຍຸ 7 ປີ ທີ່ມາຮັບການຮັກສາຢູ່ທີ່ໂຮງໝໍ ເມື່ອເດືອນຜ່ານມາ ຫຼັງຈາກມີອາການບວມ ແລະ ເຈັບປວດບໍລິເວນຄາງກະໄຕຂວາດ້ານລຸ່ມ.

ດຣ. ປຣາທິບາ ຣາມານີ ຫົວໜ້າພະແນກປາກ ແລະ ພະຍາດຄາງກະໄຕ ແລະ ໜ້າ ບອກວ່າ ແພດໄດ້ນຳໂຕເດັກຊາຍຄົນນີ້ໄປເອັກຊະເຣຄາງກະໄຕ ແລະ ປາກ ພົບວ່າ ຄາງກະໄຕເທິງມີແຂ້ວຊ້ອນກັນ ເຊິ່ງບໍ່ແມ່ນເລື່ອງທີ່ແປກຫຍັງ, ແຕ່ສິ່ງທີ່ໜ້າປະຫຼາດໃຈຄື ຄາງກະໄຕລຸ່ມ ນອກຈາກຈະມີແຂ້ວຊ້ອນກັນແລ້ວ ບໍລິເວນທີ່ເດັກຊາຍຄົນນີ້ເຈັບປວດຍັງມີແຂ້ວຂະໜາດນ້ອຍ ງອກພາຍໃນຄາງກະໄຕເປັນຈຳນວນຫຼາຍ.

ເຫດນີ້ເຮັດໃຫ້ທີມຂອງ ດຣ. ປຣາທິບາ ຕ້ອງໃຊ້ສັນຍະແພດ 2 ຄົນ ນຳແຂ້ວຂະໜາດນ້ອຍເຫຼົ່ານີ້ອອກຈາກຄາງກະໄຕ ໂດຍໃຊ້ເວລາດົນເຖິງ 4-5 ຊົ່ວໂມງ.
ດຣ. ປຣາທິບາ ບອກວ່າ “ມີແຂ້ວທັງໝົດ 526 ເຫຼັ້ມ ຂະໜາດຕັ້ງແຕ່ 0.1 ມິລລິແມັດ ໄປຈົນເຖິງ 15 ມິລລິແມັດ, ແມ່ນແຕ່ແຂ້ວເຫຼັ້ມນ້ອຍໆກໍຍັງມີຮາກ ແລະ ເຄືອບແຂ້ວ ທີ່ຢັ້ງຢືນໄດ້ວ່າ ພວກມັນບໍ່ແມ່ນພຽງເສດຫຼືຊິ້ນສ່ວນຂອງແຂ້ວ ແຕ່ເປັນແຂ້ວແທ້ໆ”.

ແພດຄົນດັ່ງກ່າວອະທິບາຍຕໍ່ວ່າ ສິ່ງທີ່ເດັກຊາຍຄົນນີ້ກຳລັງປະສົບ ເປັນສິ່ງທີ່ເກີດຂຶ້ນໄດ້ຍາກຫຼາຍ ແລະ ຕອນນີ້ກໍຍັງບໍ່ຊັດເຈນວ່າສາເຫດເປັນຍ້ອນຫຍັງ ແຕ່ກໍໜ້າຈະເປັນຍ້ອນພັນທຸກຳ ຫຼືບໍ່ກໍຍ້ອນປັດໄຈຈາກທຳມະຊາດ ເຊັ່ນ ລັງສີໃນອາກາດ.
ສ່ວນພໍ່ແມ່ຂອງເດັກຊາຍຄົນນີ້ ບອກກັບແພດວ່າ ສັງເກດເຫັນຄາງຂອງລູກບວມຕັ້ງແຕ່ອາຍຸ 3 ປີແລ້ວ ແຕ່ບໍ່ໄດ້ພາລູກມາຮັກສາເພາະລູກມັກຈະຂັດຂືນທຸກຄັ້ງທີ່ພາມາຫາໝໍ.