ພະແນກຕຳຫຼວດ ປ້ອງກັນເສດຖະກິດ ສຸມໃສ່ກວດກາຮ້ານອິນເຕີເນັດກາເຟ ທີ່ລັກລອບເປີດໃຫ້ບໍລິການ

ໃນວັນທີ 6 ພຶດສະພາ 2021 ກອງບັນຊາການ ປກສ ນະຄອນຫຼວງວຽງຈັນ ໄດ້ຮັບແຈ້ງຄວາມຜ່ານຊ່ອງທາງເບີວອດແອັບວ່າ:

ມີຮ້ານອິນເຕີເນັດກາເຟໄດ້ລັກລອບເປີດບໍລິການໃຫ້ລູກຄ້າເຂົ້າໄປຫຼິ້ນການພະນັນທາງອອນລ່າຍ, ດັ່ງນັ້້ນ ຫົວໜ້າກອງບັນຊາການ ປກສ ນວ ຈຶ່ງໄດ້ມອບໃຫ້ພະແນກຕຳຫຼວດປ້ອງກັນເສດຖະກິດ ຂຶ້ນກັບ ຫ້ອງຕຳຫຼວດ ລົງຕິດຕາມກວດກາ, ຜ່ານການກວດກາຕົວຈິງຈຶ່ງຮູ້ວ່າ:

ໃນເວລາ 21ໂມງ 00ນາທີ ຂອງວັນທີ 06 ພຶດສະພາ 2021 ໄດ້ພົບເຫັນຮ້ານອິນເຕີເນັດກາເຟຂອງ ທ້າວ ຄອນແກ້ວ ຕັ້ງຢູ່ບ້ານ ຈອມທອງ ເມືອງຫາດຊາຍຟອງ ນວ ໄດ້ເປີດບໍລິການໃຫ້ລູກຄ້າເຂົ້າມາຫຼິ້ນການພະນັນທາງອອນລ່າຍຢູ່ເຮືອນຜູ້ກ່ຽວເອງ, ກວດກາພົບເຫັນຄອມພິວເຕີ 01 ຊຸດ, ເຄື່ອງພິມ 1 ເຄື່ອງ, ນອກນີ້ຍັງພົບຮ້ານ ເຄ ອິນເຕີເນັດ ອອກຊີ່ທ້າວ ແຂກ ຕັ້ງຢູ່ບ້ານດົງນາໂຊກເໜືອ ເມືອງສີໂຄດຕະບອງ ນວ ໄດ້ເປີດບໍລິການໃຫ້ລູກຄ້າເຂົ້າໄປຫຼິ້ນການພະນັນທາງອອນລ່າຍ, ພົບເຫັນຄອມພິວເຕີ 1 ຊຸດ ແລະ ເຄື່ອງພິມ 1 ເຄື່ອງ.

ຜ່ານການກວດກາຂອງເຈົ້າໜ້າທີ່ເຫັນວ່າ: ທັງສອງຮ້ານແມ່ນບໍ່ມີໃບອະນຸດຍາດທະບຽນວິສາຫະກິດ ຈາກພາກສ່ວນທີ່ກ່ຽວຂ້ອງ ເຈົ້າໜ້າທີ່ຈຶ່ງໄດ້ສົມທົບກັບອຳນາດປົກຄອງບ້ານ ສຶກສາອົບຮົມກ່າວເຕືອນເຮັດບົດບັນທຶກພ້ອມທັງໃຫ້ຢຸດເຊົາ(ປິດຮ້ານ) ຖ້າພົບເຫັນຍັງມີການລະເມີດຈະໄດ້ດຳເນີຄະດີຕາມລະບຽບກົດໝາຍຢ່າງເຂັ້ມງວດ. ສ່ວນອຸປະກອນຮັບໃຊ້ທີ່ຕິດພັນກັບການຫຼິ້ນການພະນັນ ຈຳນວນ 2 ຊຸດນັ້ນແມ່ນໄດ້ຍຶດເອົາມາຮັກສາໄວ້ ເພື່ອຂໍທິດຊີ້ນຳໃນການແກ້ໄຂ.

ກອງບັນຊາການ ປກສ ນະຄອນຫຼວງວຽງຈັນ ຂໍຂອບໃຈ ແລະ ຍ້ອງຍໍຊົມເຊີຍພົນລະເມືອງດີທີ່ໄດ້ປະຕິບັດພັນທະຂອງຕົນຊ່ວຍເຈົ້າໜ້າທີ່, ຈິງໃຈລາຍງານມາໃຫ້ພວກເຮົາເພື່ອແກ້ໄຂໃຫ້ທັນສະພາບການ. ຮຽກຮ້ອງມາຍັງຊາວ ນວ ຈົ່ງປະຕິບັດພັນທະຂອງຕົນຊ່ວຍກັນ, ຖ້າເຫັນສະຖານທີ່ທຸລະກິດໃດຍັງລະເມີດ ແມ່ນໃຫ້ແຈ້ງມາທາງເບີວອດແອັບ 02028899774 ແລະ ແຈ້ງຜ່ານຊ່ອງທາງເຟສບຸກ ປ້ອງກັນຄວາມສະຫງົບ ນະຄອນຫຼວງວຽງຈັນ.