ແຈ້ງໃຫ້ຮູ້ວ່າ: ສປປ ລາວ ຍັງມີຄວາມສ່ຽງທີ່ອາດຈະເກີດການລະບາດຂອງພະຍາດໂຄວິດ-19 ຖ້າທຸກພາກສ່ວນຍັງຖືເບົາຕໍ່ກັບມາດຕະກັນປ້ອງກັນພະຍາດດັ່ງກ່າວ ເພາະບັນດາປະເທດອາຊຽນ ໂດຍສະເພາະປະເທດທີ່ມີຊາຍແດນຕິດກັບ ສປປ ລາວ ຍັງພົບຜູ້ຕິດເຊື້ອ ແລະ ມີການແຜ່ລະບາດຂອງພະຍາດນີ້ຢູ່, ໂດຍມີຜູ້ເສຍຊີວິດແລ້ວ 8.913 ຄົນ ສະເພາະຢູ່ບັນດາປະເທດອາຊຽນ.
ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດ COVID-19 ໄດ້ລາຍງານສະພາບການລະບາດຂອງພະຍາດ COVID-19 ຂອງບັນດາປະເທດໃກ້ຄຽງ ແລະ ໃນໂລກ ປະຈໍາວັນທິດ ວັນທີ 16 ສິງຫາ ປີ 2020 ວ່າ: ມາຮອດວັນທີ 16 ສິງຫາ 2020, ທົ່ວໂລກມີການລາຍງານການລະບາດ ທັງໝົດ 213 (ປະເທດ/ເຂດ), ເຊິ່ງມີການຢັ້ງຢືນຜູ້ຕິດເຊື້ອພະຍາດ COVID-19 ແມ່ນ 21.582.687 (247.431 ໃໝ່), ເສຍຊິວິດ767.817 (5.414 ໃໝ່).
ຢູ່ຂົງເຂດອາຊີ ຍັງແມ່ນປະເທດອິນເດຍ ທີ່ມີທ່າອ່ຽງ ໃນການຕິດເຊື້ອ COVID-19 ເພິ່ມຂຶ້ນ, ຈຳນວນຜູ້ຕິດເຊື້ອມື້ດຽວສູງເຖິງ 63.986 ຄົນ ແລະ ໃນບັນດາກຸ່ມປະເທດອາຊຽນ ມີການຢັ້ງຢືນ ຜູ້ຕິດເຊື້ອພະຍາດ COVID-19 ແມ່ນ 365.360 ຄົນ ແລະ ເສຍຊີວິດ 8.913 ຄົນ.
ສໍາລັບການເຝົ້າລະວັງ COVID-19 ຢູ່ ສປປ ລາວ ຮອດ 5 ໂມງແລງ ຂອງວັນທີ 15 ສິງຫາ 2020 ໂດຍການຕິດຕາມຜູ້ເດີນທາງຈາກຈຸດຜ່ານແດນຕ່າງໆທົ່ວປະເທດມີຜູ້ເດີນທາງເຂົ້າມາ ທັງໝົດ 2,391 ຄົນ, ທຸກຄົນແມ່ນໄດ້ແທກອຸນຫະພູມຮ່າງກາຍ, ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກໆຄົນມາກວດ (ຍົກເວັ້ນແຕ່ຜູ້ຂັບລົດຂົນສົ່ງ ແລະ ຜູ້ຕິດຕາມ) ແລ້ວໄດ້ນຳສົ່ງໄປຫາສະຖານທີ່ຈຳກັດບໍລິເວນ ທີ່ກຳນົດໄວ້ຈົນກວ່າຈະຄົບກຳນົດ 14 ວັນ.
ການຕິດຕາມຜູ້ຖືກຈຳກັດບໍລິເວນຢູ່ໃນສະຖານທີ່ ທີ່ກຳນົດໄວ້ໃນຂອບເຂດທົ່ວປະເທດ ຊຶ່ງປະຈຸບັນ ທົ່ວປະເທດມີສູນຈໍາກັດບໍລິເວນທີ່ຍັງເປີດຢູ່ ທັງໝົດ 53 ສູນ, ມີຜູ້ຖືກຈຳກັດບໍລິເວນຢູ່ສູນ 3.929 ຄົນ, ໄດ້ເກັບຕົວຢ່າງມາກວດວິເຄາະທັງໝົດ ແລະ ບໍ່ພົບຜູ້ຕິດເຊື້ອ.
ການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດໃນວັນທີ 15 ສິງຫາ 2020, ໄດ້ເກັບຕົວຢ່າງມາກວດວິເຄາະທັງໝົດ 526 ຄົນ, ໃນນັ້ນ ແຮງງານລາວມາແຕ່ໄທ 119 ຄົນ, ແຮງງານໄທ 05 ຄົນ, ແຮງງານຈີນ 317 ຄົນ, ບຸກຄົນທົ່ວໄປທີ່ມີອາການ 06 ຄົນ, ບຸກຄົນທົ່ວໄປທີ່ບໍ່ມີອາການ 79 ຄົນ, ຜົນກວດວິເຄາະທັງໜົດແມ່ນບໍ່ພົບເຊື້ອ,
ເລີ່ມແຕ່ເດືອນມັງກອນ 2020 ເຖິງປະຈຸບັນ ໄດ້ມີການເກັບຕົວຢ່າງ ເພື່ອກວດວິເຄາະຫາເຊື້ອພະຍາດ COVID-19 ທັງໝົດ 34.064 ຄົນ, ຜູ້ຖືກຢັ້ງຢືນການຕິດເຊື້ອ COVID-19 ຈາກການກວດວິເຄາະ ຢູ່ ສປປ ລາວ ມີທັງໝົດ 22 ຄົນ.
ຂ່າວ: ວຽງຈັນທາຍ
Discussion about this post