ການປະກວດ Miss Grand International 2020 ຈົບລົງໄປຕັ້ງແຕ່ຄືນວັນເສົາທີ່ຜ່ານມາ, ນອກຈາກເລື່ອງລາວຂອງການແຂ່ງຂັນເຟ້ນຫາສາວງາມຜູ້ມີຄວາມສາມາດມາຄອງມຸງກຸດປະຈຳປີ ແລະ ເລື່ອງຂອງດຣາມາຊຸດປາກັດແລ້ວ ອີກເລື່ອງທີ່ຖືກກ່າວເຖິງເປັນວົງກວ້າງກໍຄົງໜີບໍ່ພົ້ນການກ່າວສຸນທອນພົດຂອງ Han Lay (ຮັ່ນ ເລ) ນາງງາມຈາກມຽນມາ ທີ່ໄດ້ເວົ້າກ່ຽວກັບສະຖານະການທີ່ໂຫດຮ້າຍເຊິ່ງກຳລັງເກີດຂຶ້ນທີ່ປະເທດບ້ານເກີດຂອງຕົນ
![](https://kkklao.com/wp-content/uploads/2021/03/Screenshot_2021-03-29-14-07-38-42.jpg)
ປັດຈຸບັນ ມຽນມາກຳລັງປະສົບກັບວິກິດການດ້ານປະຊາທິປະໄຕ ຫຼັງຈາກທີ່ກອງທັບໄດ້ເຮັດລັດຖະປະຫານຕັ້ງແຕ່ວັນທີ 1 ກຸມພາ 2021 ພ້ອມທັງກັກໂຕ ອອງ ຊານ ຊູ ຈີ ອະດີດທີ່ປຶກສາແຫ່ງລັດ ລວມທັງສະມາຊິກຄົນອື່ນໆຂອງ National League for Democracy.
![](https://kkklao.com/wp-content/uploads/2021/03/Screenshot_2021-03-29-14-07-50-93.jpg)
ຕັ້ງແຕ່ນັ້ນເປັນຕົ້ນມາ ປະຊາຊົນມຽນມາໄດ້ອອກມາຊຸມນຸມຢູ່ເທິງທ້ອງຖະໜົນ ເພື່ອປະທ້ວງການຢຶດອຳນາດຂອງກອງທັບ ແລະ ຍອດຜູ້ເສຍຊີວິດຕັ້ງແຕ່ລັດຖະປະຫານມາຈົນຮອດຕອນນີ້ແມ່ນມີຢ່າງໜ້ອຍ 400 ຊີວິດແລ້ວ
ໃນວັນທີ 27 ມີນາເຊິ່ງເປັນມື້ຕັດສິນຂອງການປະກວດ Miss Grand International 2020 ເຊິ່ງຈັດຂຶ້ນທີ່ບາງກອກ ປະເທດໄທ, ມີປະຊາຊົນມຽນມາ 64 ຄົນ ເສຍຊີວິດຈາກການສັງຫານຂອງກຳລັງປ້ອງກັນຄວາມປອດໄພຂອງມຽນມາ ໃນນັ້ນລວມມີເດັກນ້ອຍນຳ.
![](https://kkklao.com/wp-content/uploads/2021/03/Screenshot_2021-03-29-14-08-02-23.jpg)
“ເປັນເລື່ອງຍາກສຳລັບຂ້ອຍທີ່ຈະຢືນຢູ່ເທິງເວທີໃນຄືນນີ້ໄດ້,” ຮັ່ນ ເລ ກ່າວ ທ່າມກາງບັນຍາກາດທີ່ງຽບສະຫງົບໃນລະຫວ່າງການປະກວດ “ມື້ນີ້ ໃນມຽນມາ ປະເທດຂອງຂ້ອຍ ໃນຂະນະທີ່ຂ້ອຍກ່າວສຸນທອນພົດເທິງເວທີນີ້ ມີຄົນຈຳນວນຫຼາຍເສຍຊີວິດລົງ” ນາງກ່າວ ພ້ອມທັງນໍ້າຕາ “ຂ້ອຍຮູ້ສຶກສະຫຼົດໃຈເປັນຢ່າງຍິ່ງຕໍ່ກັບຜູ້ທີ່ສູນເສຍຊີວິດຂອງພວກເຂົາ.”
![](https://kkklao.com/wp-content/uploads/2021/03/Screenshot_2021-03-29-14-08-13-92.jpg)
ນາງກ່າວຕໍ່ວ່າ ໃນຂະນະທີ່ປະຊາຊົນໃນປະເທດຂອງຕົນກຳລັງອອກມາສູ່ຖະໜົນຫົນທາງເພື່ອຮຽກຮ້ອງປະຊາທິປະໄຕ ຕົນເອງກໍຢືນເທິງເວທີນີ້ເພື່ອເຮັດສິ່ງດຽວກັນ
![](https://kkklao.com/wp-content/uploads/2021/03/Screenshot_2021-03-29-14-08-34-59.jpg)
ນີ້ບໍ່ແມ່ນຄັ້ງທຳອິດທີ່ ນາງງາມມຽນມາຄົນນີ້ອອກມາສ້າງຄວາມຮັບຮູ້ກ່ຽວກັບຄວາມຮຸນແຮງຢູ່ມຽນມາ ໃນໂພສທີ່ຜ່ານມາໃນໂຊຊຽວມີເດຍຂອງນາງ, ຮັ່ນ ເລ ໄດ້ແບ່ງປັນການລະດົມທຶນໃຫ້ກັບຂະບວນການເພື່ອການປະທ້ວງທີ່ໄຮ້ຄວາມຮຸນແຮງຕໍ່ກັບອຳນາດຂອງທະຫານຢູ່ມຽນມານຳອີກ
ນອກນັ້ນ ນາງຍັງໄດ້ອອກມາໂພສກ່າວເຖິງຜູ້ທີ່ເສຍຊີວິດໃນການປະທ້ວງ ລວມທັງໂພສຂໍ້ມູນກ່ຽວກັບການຈັບໂຕຜູ້ປະທ້ວງ ເຊິ່ງໃນນັ້ນມີເພື່ອຮ່ວມສະຖາບັນການສຶກສາຂອງນາງຢູ່ທີ່ມະຫາວິທະຍາໄລຢ້າງກຸ້ງນຳ
![](https://kkklao.com/wp-content/uploads/2021/03/Screenshot_2021-03-29-14-08-47-03.jpg)
ຂ່າວສານ ເວທີຂ່າວ ; ທີມບັນນາທິການ muan.la
Discussion about this post