ຊາຍໄວ 40 ປີ ເສບຢາບ້າຫຼາຍ ເຮັດໃຫ້ປະສາດຫຼອນ ກໍ່ເຫດໃຊ້ຈົກຕີຫົວເມຍຕົນເອງ 3 ບາດ ສົ່ງຜົນເຮັດໃຫ້ເສຍຊີວິດຄາທີ່, ເຫດການດັ່ງກ່າວນີ້ເກີດຂຶ້ນໃນເວລາ 11:00 ໂມງ ຂອງວັນທີ 11 ກັນຍາ 2022, ທີ່ບ້ານນາເກືອ ເມືອງຊໍາໃຕ້ ແຂວງຫົວພັນ.
![](https://kkklao.com/wp-content/uploads/2022/09/1-26.jpg)
ເຈົ້າໜ້າທີ່ ປກສ ເມືອງຊໍາໃຕ້ ແຂວງຫົວພັນ ໃຫ້ຮູ້ວ່າ: ພາຍຫຼັງໄດ້ຮັບລາຍງານທາງໂທລະສັບ ຈາກອົງການປົກຄອງບ້ານນາເກືອ ເມືອງຊໍາໃຕ້ ແຂວງຫົວພັນ ວ່າມີເຫດການຄາດຕະກໍາຢູ່ທາງໄປຖຽງນາ ຫ້ວຍສົງ ເຂດບ້ານນາເກືອ. ຈາກນັ້ນ, ເຈົ້າໜ້າທີ່ວິຊາສະເພາະ ຈຶ່ງສົມທົບກັບພາກສ່ວນທີ່ກ່ຽວ ຂ້ອງລົງໄປກວດກາສັນລະສູດສະຖານທີ່ເກີດເຫດດັ່ງກ່າວ ພົບເຫັນຄົນເສຍຊີວິດ 1 ຄົນ ເພດຍິງ ຊື່ ນາງ ມີ້ ອາຍຸ 36 ປີ ປະຊາຊົນ ຢູ່ບ້ານນາເກືອ ນອນເສຍຊີວິດຢູ່ແຄມທາງ, ຜ່ານການກວດກາຊັນນະສູດພົບເຫັນຫົວມີຮ່ອງຮອຍບາດແຜ 2 ຮອຍ ແລະ ຕາເບື້ອງຊ້າຍແຕກຍ້ອນຖືກກະທົບຂອງແຂງ.
![](https://kkklao.com/wp-content/uploads/2022/09/2-25.jpg)
ຜ່ານການສອບຖາມ ຈຶ່ງຮູ້ວ່າ ຜູ້ລົງມືກໍ່ເຫດແມ່ນຜົວຂອງ ນາງ ມີ້ ຊື່ ທ້າວ ໄຊເກີ ອາຍຸ 40 ປີ; ຈາກນັ້ນ, ເຈົ້າໜ້າທີ່ ຈຶ່ງນໍາຈັບຕົວຜູ້ກ່ຽວໄດ້; ຜ່ານການສອບສວນ ທ້າວ ໄຊເກີ ຮັບສະລາພາບວ່າ: ໃນປີ 2000, ໄດ້ສ້າງຄອບຄົວກັບ ນາງ ມີ້. ຮອດປີ 2015, ເລີ່ມເສບຢາບ້າ ເຮັດໃຫ້ຄອບຄົວບໍ່ມີຄວາມສະຫງົບ ຜິດຖຽງກັນມາຕະຫຼອດຈົນເຖິງປັດຈຸບັນ ເຮັດໃຫ້ຜູ້ເປັນເມຍທົນຢູ່ນໍາບໍ່ໄດ້ ຈຶ່ງໄດ້ຍ້າຍໄປຢູ່ນໍາພໍ່ປູ່ແມ່ຍ່າທີ່ຖຽງນາ ຫ່າງກັນປະມານ 600 ແມັດ.
![](https://kkklao.com/wp-content/uploads/2022/09/3-14.jpg)
ມາຮອດວັນທີ 10 ກັນຍາ 2022, ທ້າວ ໄຊເກີ ກໍໄດ້ຍ່າງຈາກຖຽງນາຕົນໄປຫາເມຍ ພໍໄປຮອດກໍໄດ້ຜິດຖຽງກັນ. ມື້ຕໍ່ມາ, ທ້າວ ໄຊເກີ ໄດ້ເສບຢາບ້າ ແລ້ວຍ່າງໄປຫາເມຍ ແລະ ຜິດຖຽງກັນອີກ. ຮອດເວລາ 8:00 ໂມງ ຂອງວັນທີ 11 ກັນຍາ, ຈຶ່ງຍ່າງກັບຖຽງນາ ພໍຍ່າງມາຮອດໄຮ່ເຂົ້າຫ່າງຈາກຖຽງທີ່ເມຍຢູ່ປະມານ 150 ແມັດ. ຜູ້ກ່ຽວກໍໄດ້ນັ່ງພັກຜ່ອນກິນອ້ອຍ; ໃນເວລານັ້ນກໍໄດ້ພົບເຫັນ ນາງ ມີ້ ເປ້ກະຕ່າ ແລະ ມືຖືຈົກຍ່າງກາຍໄປ. ຜູ້ກ່ຽວ ຈຶ່ງຫາເລື່ອງຜິດຖຽງກັນອີກຢ່າງຮຸນແຮງ ເຮັດໃຫ້ ທ້າວ ໄຊເກີ ເກີດມີອາການໂມໂຫ ແລ້ວຍ່າງເຂົ້າໄປຫາ ນາງ ມີ້ ຍາດເອົາຈົກທີ່ ນາງ ມີ້ ຖືມາ ຕີໃສ່ຫົວ 1 ບາດ ເຮັດໃຫ້ ນາງ ມີ້ ລົ້ມລົງກັບທີ່ ແລ້ວຜູ້ກ່ຽວກໍເອົາຈົກຕີຊໍ້າໃສ່ຫົວອີກ 1 ບາດ ແລະ ຕີເຂົ້າທີ່ຕາເບື້ອງຊ້າຍອີກ 1 ບາດ ສົ່ງຜົນເຮັດໃຫ້ເສຍຊີວິດຄາທີ່.
![](https://kkklao.com/wp-content/uploads/2022/09/4-10.jpg)
ຕາມການສັນນິຖານຂອງເຈົ້າໜ້າທີ່, ແຮງຈູງໃຈພາໃຫ້ ທ້າວ ໄຊເກີ ກໍ່ເຫດຄາດຕະກໍາເມຍຕົນເອງໃນຄັ້ງນີ້ ແມ່ນເກີດຈາກຜູ້ກ່ຽວເມົາຢາບ້າທີ່ເສບເຂົ້າໄປ ແລະ ໂມໂຫທີ່ເມຍບໍ່ຍອມກັບໄປຢູ່ນໍາຜູ້ກ່ຽວ.