ສະພາການຄ້າແຂວງ, ບໍລິສັດສາລະວັນພັດທະນາ ມອບອຸປະກອນການຮຽນ ມູນຄ່າ 17 ລ້ານກວ່າກີບ ໃຫ້ໂຮງຮຽນປະຖົມບ້ານນາໂພໃຫຍ່

ສະພາການຄ້າ ແລະອຸດສາຫະກຳການຄ້າແຂວງສາລະວັນ ຮ່ວມກັບບໍລິສັດສາລະວັນພັດທະນາ ແລະອົງການປົກຄອງເມືອງສາລະວັນ ໄດ້ນຳເອົາອຸປະກອນການຮຽນ-ການສອນ, ອຸປະກອນກິລາ, ເຈວລ້າງມື ແລະຢາປົວພະຍາດຈຳນວນໜື່ງ ລວມມູນຄ່າ 14 ລ້ານກວ່າກີບ

ມອບໃຫ້ໂຮງຮຽນມູນລະປະຖົມ ບ້ານນາໂພໃຫຍ່(ຄຸ້ມໜອງສະໂນ) ແລະ ສະພາການຄ້າ ແລະອຸດສາຫະກຳການຄ້າແຂວງ ກໍ່ໄດ້ມອບເງິນອຸດໜູນໃຫ້ຄູສອນ(ຄູອາສະໝັກ) 1 ຄົນ ທີ່ສິດສອນນ້ອງໆນັກຮຽນຢູ່ໂຮງຮຽນບ້ານນາໂພໃຫຍ່ ມູນຄ່າ 2 ລ້ານກີບ ແລະ ຈະສືບຕໍ່ອຸດໜູນໃຫ້ຄູໃນແຕ່ລະປີ.

ນອກນັ້ນ ບໍລິສັດແສງເພັດ ເມືອງວາປີ ກໍ່ໄດ້ມອບເງິນຊ່ວຍເຫຼືອຕໍ່ເຕີມສ້າງໂຮງຮຽນ 1 ລ້ານກີບ. ລວມມູນຄ່າການຊ່ວຍເຫຼືອທັງໝົດ 17 ລ້ານກວ່າກີບ. ໂດຍຕ່າງໜ້າມອບຂອງ ທ່ານ ນາງ ອິນແປງ ຊາມຸນຕີ ປະທານສະພາອຸດສາຫະກຳ ແລະ ການຄ້າແຂວງສາລະວັນ ພ້ອມດ້ວຍທີມງານ, ທ່ານເຈົ້າເມືອງ, ອຳນາດການປົກຄອງບ້ານ, ພໍ່ແມ່ປະຊາຊົນ ແລະນ້ອງນ້ອຍນັກຮຽນເຂົ້າຮ່ວມເປັນສັກຂີພິຍານ.

ໂຮງຮຽນມູນລະປະຖົມບ້ານນາໂພໃຫຍ່( ຄຸ້ມໜອງສະໂນ) ແມ່ນເປັນໂຮງຮຽນໄມ້ 1 ຫຼັງ, ມີ 2 ຫ້ອງຮຽນຄື ຫ້ອງປໍ1 ແລະປໍ 2, ມີນັກຮຽນທັງໝົດ 48 ຄົນ, ຍິງ 28 ຄົນ, ມີຄູສອນ 1 ຄົນ(ຄູອາສາສະໝັກ).

ຄຸ້ມໜອງສະໂນ ແມ່ນໄກຈາກເທດສະບານເມືອງສາລະວັນປະມານ 45 ກິໂລແມັດ, ເປັນເສັ້ນທາງດິນແດງເຂົ້າເຖິງບ້ານສາມາດໄປມາໄດ້ທັງສອງລະດູ ສຳລັບການການເດີນໄປມາແມ່ນຄວາມຫຍຸ້ງຍາກພໍສົມຄວນ, ໃນບ້ານມີປະຊາກອນທັງໝົດ 135 ຄົນ,ຍິງ 69 ຄົນ, ມີ 15 ຫຼັງຄາເຮືອນ,ມີ 24 ຄອບຄົວ, ອາຊີບຕົ້ນຕໍຂອງປະຊາຊົນແມ່ນມີອາຊີບເຮັດນາ, ປູກຝັງ, ລ້ຽງສັດ.

ພິທີດັ່ງກ່າວໄດ້ຈັດຂຶ້ນໃນວັນທີ 3 ມີນາ 2021 ທີ່ໂຮງຮຽນມູນລະປະຖົມບ້ານ ນາໂພໃຫຍ່( ຄຸ້ມໜອງສະໂນ). ໂດຍການເຂົ້າຮ່ວມຂອງ ທ່ານ ຈັນສີລອນ ສີສົມບູນ ເຈົ້າໆເມືອງສາລະວັນ, ທ່ານ ນາງ ອິນແປງ ຊາມຸນຕີ ປະທານສະພາ ແລະອູດສາຫະກຳການຄ້າແຂວງ, ມີກຸ່ມທຸລະກິດ ແລະອຳນາດການປົກຄອງເມືອງ-ບ້ານ, ນັກຮຽນ ແລະພໍ່ແມ່ປະຊາຊົນເຂົ້າຮ່ວມ.