ກົມກົງສູນ ກະຊວງການຕ່າງປະເທດ ໄດ້ອອກແຈ້ງການມາຍັງບັນດາທ່ານຊາບ ວ່າ: ປັດຈຸບັນ ເຫັນວ່າມີປະຊາຊົນ ໄດ້ມາຍື່ນຄຳຮ້ອງຂໍໜັງສືຜ່ານແດນເປັນຈຳນວນຫລາຍ ເຊິ່ງເກີນຂີດຄວາມສາມາດໃນການຮອງຮັບຕົວຈິງຂອງລະບົບ ແລະ ສະຖານທີ່ຢູ່ກົມກົງສູນ; ຄຽງຄູ່ກັນນັ້ນ ຍັງເກີດຄວາມແອອັດ, ບໍ່ເປັນລະບຽບຮຽບຮ້ອຍ ແລະ ບັນຫາຫຍໍ້ທໍ້ຕ່າງໆ ເກີດຂຶ້ນຢ່າງຫລວງຫລາຍ.
ສະນັ້ນ, ເພື່ອແກ້ໄຂບັນຫາດັ່ງກ່າວ, ທັງເປັນການປະຢັດເວລາ ແລະ ຄ່າໃຊ້ຈ່າຍໃນການເດີນທາງ, ຄ່າກິນຢູ່ພັກເຊົາ ຂອງຜູ້ທີ່ມາຈາກຕ່າງແຂວງ, ກົມກົງສູນ ຈຶ່ງໄດ້ກຳນົດລະບຽບການຍື່ນຄຳຮ້ອງສະເໜີຂໍໜັງສືຜ່ານແດນ ດັ່ງນີ້: ສໍາລັບຜູ້ທີ່ອາໄສ ຢູ່ນະຄອນຫລວງວຽງຈັນ ແລະ ແຂວງໃກ້ຄຽງ(ອີງຕາມສໍາມະໂນຄົວ) ແມ່ນໃຫ້ຍື່ນຄໍາຮ້ອງຢູ່ກົມກົງສູນ ກະຊວງການຕ່າງປະເທດ, ສ່ວນຜູ້ທີ່ອາໄສ ຢູ່ຕ່າງແຂວງ (ອີງຕາມສຳມະ ໂນຄົວ) ແມ່ນໃຫ້ຍື່ນຄໍາຮ້ອງ ຢູ່ສູນຮັບຄໍາຮ້ອງຂໍໜັງສືຜ່ານແດນ ຂອງກົມກົງສູນ ປະຈຳຢູ່ແຂວງທີ່ຕົນອາໄສຢູ່ ຫລື ແຂວງໃກ້ຄຽງ ທີ່ເຫັນວ່າມີຄວາມສະດວກ ຊຶ່ງມີຢູ່ 6 ແຂວງ ດັ່ງນີ້:
ແຂວງ ອຸດົມໄຊ
ແຂວງ ໄຊຍະບູລີ
ແຂວງ ຊຽງຂວາງ
ແຂວງ ຄຳມ່ວນ
ແຂວງ ສະຫວັນນະເຂດ
ແຂວງ ຈຳປາສັກ
ແຕ່ໃນກໍລະນີ ມີຄວາມຈຳເປັນອັນຮີບດ່ວນ ເປັນຕົ້ນ ເຈັບເປັນ, ໄປປິ່ນປົວສຸຂະພາບ ຢູ່ຕ່າງ ປະເທດ ຫລື ຄວາມຈຳເປັນອື່ນ ທີ່ມີຫລັກຖານຢັ້ງຢືນຖືກຕ້ອງ ກໍສາມາດມາຍື່ນຢູ່ກົມກົງສູນ ທີ່ນະ ຄອນຫລວງວຽງຈັນ ໂດຍກົງ. ລະບຽບການດັ່ງກ່າວນີ້ ເລີ່ມຈັດຕັ້ງປະຕິບັດນັບແຕ່ວັນທີ 11 ກໍລະກົດ 2022 ເປັນຕົ້ນໄປ.
Discussion about this post