ທ່ານນາງ ວັດທະນາ ດາລາລອຍ ຮອງຜູ້ວ່າການທະນາຄານແຫ່ງ ສປປ ລາວ ໄດ້ຊີ້ແຈງກ່ຽວກັບການປະຕິຮູບລັດວິສາຫະກິດ ຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນວັນທີ 22 ມິຖຸນາ ຜ່ານມາ, ໂດຍການເປັນປະທານຂອງທ່ານນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ.
ທ່ານນາງ ວັດທະນາ ດາລາລອຍ ກ່າວວ່າ: ການປະຕິຮູບລັດວິສາຫະກິດແຕ່ລະປະເພດ “ລັດວິສາຫະກິດໃດເຄື່ອນໄຫວບໍ່ມີປະສິດທິຜົນ ແລະ ລັດບໍ່ຈໍາເປັນເຂົ້າຖືຮຸ້ນໃຫ້ຫັນໄປສູ່ຮູບການອື່ນໂດຍໃຫ້ດຳເນີນການກວດກາປະເມີນມູນຄ່າຊັບສິນ ແລະ ໜີ້ສິນຄືນໃໝ່, ຖ້າຈຳເປັນຫັນ ຫຼືຮ່ວມທຶນ ກໍໃຫ້ດໍາເນີນການປັບປຸງໂຄງສ້າງວິສາຫະກິດທາງດ້ານການເງິນຕາມຂັ້ນຕອນ ທັງກຳນົດຮູບການ ແລະ ດຳເນີນການເຈລະຈາກັບພາກເອກະຊົນທີ່ມີເຈດຈໍານົງຢາກຮ່ວມທຶນ ກັບວິສາຫະກິດດັ່ງກ່າວ.
ສະນັ້ນ, ຈຶ່ງເວົ້າໄດ້ວ່າການປັບປຸງໂຄງສ້າງຂອງທະນາຄານພັດທະນາລາວ ແລະ ທະນາຄານສົ່ງເສີມກະສິກຳ ໃນໄລຍະຜ່ານມາໄລຍະປີ 2015-2018, ດຳເນີນການປັບປຸງຢ່າງຮອບດ້ານ, ໄປຄຽງຄູ່ກັນກັບການຊອກຫາຄູ່ຮ່ວມທຶນຍຸດທະສາດ ເພື່ອມາຮ່ວມທຶນໃນການປັບປຸງສອງທະນາຄານດັ່ງກ່າວແຕ່ກໍບໍ່ໄດ້ຮັບການຕອບຮັບ.
ມາຮອດຕົ້ນປີ 2021 ລັດຖະບານໄດ້ຄັດເລືອກ 2 ບໍລິສັດເອກະຊົນຄື: (ບໍລິສັດຈະເລີນເຊກອງພະລັງງານຈຳກັດ ແລະ ບໍລິສັດພົງຊັບທະວີກໍ່ສ້າງ) ເຂົ້າຮ່ວມທຶນຖືຮຸ້ນໃນ 2 ທະນາຄານດັ່ງກ່າວ 70% ແລະ ລັດຖືຮຸ້ນ 30%. ໃນຂະບວນການປັບປຸງ, ທັງສອງທະນາຄານແມ່ນໄດ້ຜ່ານການປະເມີນຊັບສິນຈາກບໍລິສັດກວດສອບພາຍນອກທີ່ມີຊື່ສຽງ ແລະ ເປັນທີ່ຍອມຮັບໃນລະດັບສາກົນ. ເພື່ອປະເມີນມູນຄ່າຮຸ້ນ, ປະເມີນມູນຄ່າຊັບສິນທີ່ເປັນອາຄານ ແລະ ທີ່ດິນ; ພ້ອມກັນນີ້, ສຳລັບຊັບສິນຄົງທີ່ ທີ່ໝົດອາຍຸການນໍາໃຊ້ແລ້ວ ກໍໄດ້ຖືກປະເມີນກວດກາໂດຍຄະນະຮັບຜິດຊອບເບື້ອງລັດຖະບານ.
ພາຍຫຼັງສຳເລັດການປັບປຸງໂຄງສ້າງ ແລະ ໄດ້ເຄື່ອນໄຫວດຳເນີນທຸລະກິດຕາມໂຄງສ້າງໃໝ່ທີ່ໄດ້ປັບປຸງ ໂດຍລວມເຫັນວ່າ: ທະນາຄານພັດທະນາລາວ ແລະ ທະນາຄານສົ່ງເສີມກະສິກຳ ໄດ້ມີທ່າອ່ຽງນັບມື້ນັບເຂັ້ມແຂງຂຶ້ນ ເມື່ອທຽບໃສ່ໄລຍະກ່ອນການປັບປຸງໂຄງສ້າງໃນເດືອນພຶດສະພາ 2022 ໃສ່ເດືອນກັນຍາ 2021 ເຫັນໄດ້ວ່າ:
ທະນາຄານພັດທະນາລາວ ສາມາດລະດົມເງິນຝາກໄດ້ເພີ່ມຂຶ້ນ ໄດ້ມີຍອດເຫຼືອເງິນຝາກເພີ່ມຂຶ້ນ 27%; ຍອດຊັບສິນໄດ້ເພີ່ມຂຶ້ນ 110,37%, ໃນນີ້, ສິນເຊື່ອໄດ້ມີການຂະຫຍາຍຕົວເພີ່ມຂຶ້ນຢ່າງຕໍ່ເນື່ອງ ແລະ ແຂງແຮງ, ອັດຕາສ່ວນໜີ້ບໍ່ເກີດດອກອອກຜົນໄດ້ຫຼຸດລົງຈາກ 3,81% ມາຢູ່ໃນລະດັບ 0,12% ຈາກທີ່ເຄີຍຢູ່ໃນລະດັບສູງກາຍ 3% ພ້ອມກັນນີ້, ທະນາຄານດັ່ງກ່າວກໍສາມາດສ້າງກໍາໄລ ຈາກທີ່ໄດ້ມີການຂາດທຶນສະສົມມາຢ່າງຕໍ່ເນື່ອງ ກ່ອນການປັບປຸງໂຄງສ້າງ. ສະເພາະໃນເດືອນພຶດສະພາ 2022 ໄດ້ມີກຳໄລ 78,51 ຕື້ກີບ. ອັດຕາສ່ວນຄວາມພຽງພໍຂອງທຶນຢູ່ໃນລະດັບເປັນບວກ ແລະ ນັບມື້ນັບເຂັ້ມແຂງຂຶ້ນ ຫຍັບໃກ້ເຂົ້າຫາລະດັບຕາມມາດຕະຖານວ່າດ້ວຍຄວາມໝັ້ນຄົງທີ່ທະນາຄານແຫ່ງ ສປປ ລາວ ໄດ້ກຳນົດໄວ້.
ທະນາຄານສົ່ງເສີມກະສິກຳ ໄດ້ສຳເລັດການປັບປຸງໂຄງສ້າງຊ້າກວ່າທະນາຄານພັດທະນາລາວໄລຍະໃດໜຶ່ງ ແຕ່ກໍສາມາດລະດົມເງິນຝາກໄດ້ເພີ່ມຂຶ້ນ ໄດ້ມີຍອດເຫຼືອເງິນຝາກເພີ່ມຂຶ້ນ 6%; ຍອດຊັບສິນກໍໄດ້ເພີ່ມຂຶ້ນ 86,98%. ພ້ອມກັນນີ້, ທະນາຄານດັ່ງກ່າວກໍສາມາດເລີ່ມສ້າງກຳໄລໄດ້ ສະເພາະໃນເດືອນພຶດສະພາ 2022 ໄດ້ມີກຳໄລ 7,56 ຕື້ກີບ. ອັດຕາສ່ວນຄວາມພຽງພໍຂອງທຶນຢູ່ໃນລະດັບເປັນບວກ ແລະ ໄດ້ຕາມມາດຕະຖານວ່າດ້ວຍຄວາມໝັ້ນຄົງທີ່ທະນາຄານແຫ່ງ ສປປ ລາວ ໄດ້ກຳນົດໄວ້.
ຂ່າວ: ບຸນຕອມ
Discussion about this post