ລັດຖະບານອາດປັບຫລຸດອາກອນຊົມໃຊ້ນໍ້າມັນລົງ 50% ຫລື ບໍ່ຄິດໄລ່ອາກອນຊົມໃຊ້ເລີຍ ເພື່ອໃຫ້ສັງຄົມໄດ້ໃຊ້ ນໍ້າມັນລາຄາຖືກ

ວັນທີ 6 ເມສາ 2022 ນີ້ທີ່ກະຊວງອຸດສາຫະກຳ ແລະ ການຄ້າ, ກະຊວງການເງິນ, ກະຊວງອຸດສາຫະກຳ ແລະ ການຄ້າ, ບັນດາຜູ້ປະກອບການນຳເຂົ້າ ແລະ ສົ່ງອອກນໍ້າມັນເຊື້ອໄຟ ໄດ້ຮ່ວມກັນປຶກສາຫາລື ຊອກຫາວິທີການປະຄັບປະຄອງລາຄານໍ້າມັນບໍ່ໃຫ້ເໜັງຕີງສູງເກີນໄປ.

ທ່ານ ຄຳແພງ ໄຊສົມແພງ ລັດຖະມົນຕີກະຊວງ ອຄ ກ່າວວ່າ: ກອງປະຊຸມໄດ້ຫາລືຊອກວິທີທາງ ປັບບາງໂຄງສ້າງລາຄານໍ້າມັນເພື່ອເຮັດແນວໃດໃຫ້ສາມາດປະຄັບປະຄອງລາຄານໍ້າມັນໃຫ້ໄດ້ຕາມໂຄງສ້າງລາຄານໍ້າມັນເຊື້ອໄຟ ຄັ້ງວັນທີ 10/3/2022 ກໍຄືແຈ້ງການ ເລກທີ 0260/ອຄ ລົງວັນທີ 9/3/2022 ທີ່ກອງປະຊຸມນາຍົກ-ຮອງນາຍົກລັດຖະມົນຕີຕົກລົງ ແລະ ໃຫ້ທິດຊີ້ນຳ. ແນວໃດກໍດີພວກເຮົາຈະໄດ້ສັງ ລວມ ແລະ ບັນທຶກຄໍາຄິດຄຳເຫັນກໍຄືວິທີທາງແກ້ໄຂບັນຫາເພື່ອນໍາສະເໜີນາຍົກ-ຮອງນາຍົກລັດຖະມົນ ຕີ ເພື່ອພິຈາລະນາໃຫ້ເຮັດທົດລອງໃນໄລຍະ 3 ເດືອນ.

ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນໄດ້ສະເໜີບາງວິທີແກ້ໄຂວ່າ: ລັດຖະບານມີທິດທາງຈະຊ່ວຍໜູນຜູ້ປະກອບການ ແລະ ສັງຄົມ ກໍຄືປະຊາຊົນ ເພື່ອບໍ່ໃຫ້ລາຄານໍ້າມັນແພງກວ່ານີ້ໂດຍຢາກຮັກສາລາຄາໃນວັນທີ 10 ມີນາ2022 ເປັນລາຄາຂາຍໜ້າປໍ້າ ຊຶ່ງລັດຖະບານຈະສະໜັບສະໜູນຜູ້ປະກອບການຕ່າງຫາກໂດຍຄິດໄລ່ຈາກເຕັກນິກຂອງວິຊາການ ບໍ່ແມ່ນຄິດໄລ່ຈາກຜູ້ປະກອບການ.

ສ່ວນອີກວິທີໜຶ່ງແມ່ນການປັບຫລຸດອາກອນຊົມໃຊ້ລົົງ 50% ຕົວຢ່າງ ອາກອນຊົມໃຊ້ນໍ້າມັນກາຊວນ ປັດຈຸບັນ 21% ຈະຫລຸດລົງເຫລືອ 11%, ອາກອນຊົມໃຊ້ນໍ້າມັນແອັດຊັງທຳມະດາ 31% ຈະລົງປະມານ 16%… ແຕ່ຖ້າການເໜັງຕີງຂອງລາຄາເພີ່ມຂຶ້ນຫລາຍ ອາດຈະບໍ່ຄິດໄລ່ອາກອນຊົມໃຊ້ເລີຍ, ແຕ່ກໍຕ້ອງໄດ້ຮັບການເຫັນດີຈາກພາກລັດກ່ອນ.

ຂໍ້ມູນຈາກ: ໜັງສືພິມປະຊາຊົນ