ເຊກອງ ດຳເນີນຄະດີພະນັກງານສໍ້ລາດບັງຫຼວງໄດ້ 2 ກໍລະນີ ເສຍຫາຍ 2 ຕື້ກີບ

ໃນປີ 2021 ຜ່ານມາ ແຂວງເຊກອງ ສືບສວນ-ສອບສວນດຳເນີນຄະດີ ພະນັກງານສໍ້ລາດບັງຫຼວງໄດ້ 2 ກໍລະນີ ເສຍຫາຍ 2 ຕື້ກີບ

ປີ 2021 ຜ່ານມາ ແຂວງເຊກອງ ສືບສວນ-ສອບສວນດຳເນີນຄະດີ ພະນັກງານສະມາຊິກພັກສໍ້ລາດບັງຫຼວງໄດ້ 2 ກໍລະນີ ມູນຄ່າເສຍຫາຍ 2 ຕື້ກີບ

ທ່ານ ປອ ສົມນິດ ສີລິບຸນລ້ຽງ ກໍາມະການປະຈໍາພັກແຂວງ, ປະທານກວດກາພັກ ແຂວງ ໄດ້ລາຍງານໃຫ້ຮູ້ວ່າ: ໃນໄລຍະ 1 ປີຜ່ານມາ ຄະນະກວດກາພັກ-ລັດແຂວງເຊກອງ ໄດ້ດຳເນີນການສືບສວນ-ສອບສວນຄະດີສໍ້ລາດບັງຫຼວງ ຈຳນວນ 2 ກໍລະນີ ພົບເຫັນມູນຄ່າ ເສຍຫາຍ 2 ຕື້ກວ່າກີບ.

ໃນນັ້ນ 1 ກໍລະນີ ແມ່ນສານປະຊາຊົນສູງສຸດກໍາລັງຄົ້ນຄວ້າ, ພິຈາລະນາ ແລະ ກໍາລັງດໍາເນີນການສືບສວນ-ສອບສວນ 1 ກໍລະນີ;

ນອກຈາກນັ້ນ ການເຄື່ອນໄຫວຕິດຕາມ, ກວດກາພະນັກງານສະມາຊິກພັກ ທີ່ມີພຶດຕິກໍາສໍ້ລາດບັງຫຼວງ ຢູ່ບັນດາຂະແໜງການອ້ອມຂ້າງແຂວງ ແລະ ບັນດາເມືອງ ແມ່ນດຳເນີນເປັນປົກກະຕິ ສາມາດພົບເຫັນພະນັກງານ,

ສະມາຊິກພັກ ທີ່ມີພຶດຕິກໍາ ສໍ້ລາດບັງຫຼວງ ຢູ່ຂັ້ນເມືອງມີ 1 ກໍລະນີ ລວມ 2 ຄົນ, ຍິງ 1 ຄົນລວມມູນຄ່າເສຍຫາຍ 286 ລ້ານກວ່າກີບ, ປະຈຸບັນໄດ້ເກັບກູ້ຄືນແລ້ວ ແລະ ແກ້ໄຂຕໍ່ບຸກຄົນທີ່ກະທໍາຜິດດັ່ງກ່າວ.

ຄະນະກວດກາພວກເຮົາ ຍັງໄດ້ເອົາໃຈໃສ່ຕິດຕາມ, ກວດກາ ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງ ແລະ ມະຕິກອງປະຊຸມໃຫຍ່ຂອງຄະນະພັກແຕ່ລະ ຂັ້ນ; ຕິດຕາມ ການຈັດຕັ້ງປະຕິບັດກົດລະບຽບພັກ; ການຕິດຕາມ, ກວດກາ ການດໍາເນີນຊີວິດການເມືອງພາຍໃນພັກ ຕາມທີ່ກົດລະບຽບຂອງພັກໄດ້ກໍານົດ;

ຕິດຕາມ, ຊຸກຍູ້ວຽກງານກວດກາລັດໃນຂອບເຂດທົ່ວແຂວງ ໃນການຕິດຕາມ ການຈັດຕັ້ງ-ປະຕິບັດກົດໝາຍ, ມະຕິ, ຄຳສັ່ງ, ດຳລັດ, ພາລະບົດບາດ, ໜ້າທີ່, ຂອບເຂດສິດ ການເຄື່ອນໄຫວຂອງບັນດາພະແນກການ, ອົງການອ້ອມຂ້າງແຂວງ ແລະ ບັນດາເມືອງ;

ຕິດຕາມ, ກວດກາຕາມຄຳສັ່ງ: ໄດ້ເຄື່ອນໄຫວ ກວດກາ ລັດວິສະຫະກິດນ້ຳປະປາແຂວງ ແລະ ອົງການກາແດງແຂວງ, ກວດກາການປ່ອຍເງິນກູ້ ເພື່ອເກັບຊື້ເຂົ້າແຮ, ແຊກແຊງລາຄາເຂົ້າ ແລະດັດສົມ ຕະຫຼາດແຕ່ ປີ 2010;

ຕິດຕາມ, ກວດກາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມເປັນຕົ້ນ: ຕິດຕາມ, ກວດກາໂຄງການລົງທຶນຂອງລັດ ຕາມແຜນການຂອງອົງການກວດກາລັດຖະບານ, ຕິດຕາມ, ກວດກາໂຄງການລົງທຶນນຂອງລັດເລີ່ມແຕ່ຫົວທີ;

ດຳເນີນການກວດກາການຈັດຕັ້ງປະຕິບັດຄຳສັ່ງ 13/ນຍ ໃນທົ່ວແຂວງ ສາມາດດຳເນີນການເລີກຊື້ ບັນດາຫົວໜ່ວຍ ທີ່ລັກລອບເຄື່ອນໄຫວຜິດກົດໝາຍວ່າດ້ວຍ ແຮ່ທາດ ດ້ວຍຮູບການ ໄດ້ຫຼາຍກໍລະນີ;

ໄດ້ສຸມໃສ່ຕິດຕາມ, ກວດກາ ແລະຊຸກຍູ້ການຄຸ້ມຄອງການຂຸດຄົ້ນໄມ້, ເຄື່ອນຍ້າຍໄມ້ ແລະ ທຸລະກິດໄມ້ ຕາມຄໍາສັ່ງ 15/ນຍ, ຍຶດໄມ້ 7 ພັນກວ່າແມັດກ້ອນ, ຍຶດ ແລະ ປັບໃໝພາຫະນະ 15 ຄັນ, ກ່າວເຕືອນເຈົ້າໜ້າທີ່ລັດຈຳນວນໜຶ່ງ;

ຕິດຕາມ, ກວດກາ ແລະຊຸກຍູ້ການແກ້ໄຂຜົນການກວດກາໂຄງການລົງທຶນຂອງລັດ ຕາມແຈ້ງການຂອງອົງການກວດກາລັດຖະບານ ຊຶ່ງໄດ້ດຳເນີນການກ່າວເຕືອນຄວາມຮັບຜິດຊອບຂອງພະນັກງານ, ສະມາຊິກພັກ ທີ່ມີສ່ວນກ່ຽວຂ້ອງ ຈຳນວນ 15 ຄົນ ແລະ ນຳສະເໜີຫັກລົບມູນຄ່າ ໂຄງການ ທີ່ຄິດໄລ່ບໍ່ຖືກລະບຽບການ 3 ໂຄງການ ມູນຄ່າ 7 ຕື້ກວ່າກີບ.

ນອກນີ້ ຍັງໄດ້ມອບໃບຍ້ອງຍໍ ໃຫ້ແກ່ພະນັກງານ-ລັດຖະກອນຂອງຄະນະກວດກາພັກແຂວງ ທີ່ມີຜົນງານດີເດັ່ນ ປະກອບສ່ວນທາງດ້ານເຫື່ອແຮງ ແລະສະຕິປັນຍາເຂົ້າໃນການຈັດຕັ້ງປະຕິບັດໜ້າທີ່ວຽກງານໃນໄລຍະ 1 ປີ ຜ່ານມາ, ເຊິ່ງປະເພດຍ້ອງຍໍ ມີຈໍານວນ 23 ຄົນ, ຍິງ 7 ຄົນ, ປະເພດຊົມເຊີຍ ມີ 1 ຄົນ.