ແຂວງ ວຽງຈັນ ລົງວິໄນຕໍ່ສະມາຊິກພັກ, ພະນັກງານ – ລັດຖະກອນ, ທະຫານຕໍາຫຼວດ ທີ່ກະທຳຜິດ 216 ສະຫາຍ

ໃນວາລະກອງປະຊຸມ ວຽກງານຈັດຕັ້ງ, ກໍ່ສ້າງພັກ -​ ພະນັກງານ ທົ່ວແຂວງ ວຽງຈັນ ໃນວັນທີ 18 ມັງກອນ 2022, ທີ່ຫ້ອງປະຊຸມໃຫຍ່ຂອງແຂວງ.

ໂດຍພາຍໃຕ້ການເປັນປະທານ ຂອງ ສະຫາຍ ຄໍາພັນ ສິດທິດໍາພາ ກຳມະການສູນກາງພັກ, ເລຂາພັກ ແຂວງ ເຈົ້າແຂວງ ວຽງຈັນ, ເຂົ້າຮ່ວມມີຄະນະປະຈຳພັກແຂວງ, ກຳມະການພັກແຂວງ, ກຳມະການພັກເມືອງ ແລະ ຄະນະພັກຮາກຖານ ພະແນກການຕ່າງໆພາຍໃນແຂວງ ເຂົ້າຮ່ວມ.

ສະຫາຍ ນາງ ຈັນທະບູນ ໂພສະລາດ ຄະນະປະຈຳພັກແຂວງ ຫົວໜ້າຄະນະຈັດຕັ້ງ ແຂວງ ໄດ້ຂື້ນລາຍງານວຽກງານກໍ່ສ້າງພັກ – ພະນັກງານ ແລະ ປັບປຸງການຈັດຕັ້ງໃນໄລຍະ 5 ປີ ຂອງແຂວງ ວຽງຈັນ, ບາງຕອນທ່ານກ່າວວ່າ :

ທົ່ວອົງຄະນະພັກແຂວງ ມີ 11 ອົງຄະນະພັກເມືອງ, 2 ຄະນະພັກກອງບັນຊາການ, ມີການຈັດຕັ້ງຮາກຖານພັກ 1,360 ຮາກຖານພັກ, ປີ 2021 ມີສະມາຊິກພັກທັງໝົດ 21,673 ສະຫາຍ, ຍິງ 6,708 ສະຫາຍ, ຄະນະພັກແຂວງ ໄດ້ຍຶດໝັ້ນຕາມຫຼັກການລວມສູນປະຊາທິປະໄຕ, ນຳພາເປັນໝູ່ຄະນະ, ບຸກຄົນຮັບຜິດຊອບ, ນຳພາແຜ່ນງານ -​ໂຄງການ;

ປະຕິບັດລະບອບປະຊຸມ, ປຶກສາຫາລື, ໃກ້ຊິດຕິດແທດຮາກຖານ, ມີການຊຸກຍູ້, ຕິດຕາມ, ກວດກາ, ສະຫຼຸບ-ຖອດຖອນບົດຮຽນ ລາຍງານແຕ່ລະໄລຍະ ແລະ ຮັກສາຄວາມສາມັກຄີພາຍໃນຄະນະພັກ, ເຊິ່ງສະມາຊິກພັກຈຳນວນຫຼາຍມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ຈົງຮັກພັກດີຕໍ່ອຸດົມການຂອງພັກ, ຮັກສາໄດ້ຄວາມສາມັກຄີພາຍໃນພັກ ແລະ ໄດ້ຮັບຄວາມໄວ້ວວາງໃຈຈາກມະຫາຊົນ.