ປີ 2022 ປະລິມານການສົ່ງອອກກາເຟລາວ ຈະຫລຸດລົງ ເຫລືອ 20 ພັນໂຕນ

ປີ 2022 ປະລິມານການສົ່ງອອກກາເຟລາວ ຈະຫລຸດລົງ ເຫລືອ 20 ພັນໂຕນ

ວັນທີ 14 ມັງກອນ 2022 ທີ່ນະຄອນຫລວງວຽງຈັນ, ທ່ານ ສີສະໜຸກ ສີສົມບັດ ປະທານທີ່ປຶກສາສະມາຄົມກາເຟລາວ ໄດ້ໃຫ້ຮູ້ວ່າ:

ໃນປີ 2021 ທີ່ຜ່ານມາ ການສົ່ງອອກກາເຟລາວ ແມ່ນ 30 ພັນໂຕນ ແລະ ໃນປີ 2022 ປະລິມານການສົ່ງອອກກາເຟລາວ ຈະຫລຸດລົງເຫລືອ 20 ພັນໂຕນ ເນື່ອງຈາກຕະຫລາດກາເຟໃນໂລກ ມີການປ່ຽນແປງຫລາຍ, ຜົນຜະລິດຂອງກາເຟລາວກໍ່ຫລຸດລົງ, ເນື້ອທີ່ປູກກາເຟກໍ່ໜ້ອຍລົງ ເຊິ່ງຜູ້ປູກກາເຟເອງກໍ່ຫັນໄປປູກພືດຊະນິດອື່ນທົດແທນ ແມ່ນຕົ້ນແມ່ນມັນຕົ້ນ ແລະ ຢາງພາລາ ເຮັດໃຫ້ການຜະລິດການເຟໃນ ສປປ ລາວ ຫລຸດລົງ.

ທ່ານ ສີສະໜຸກ ສີສົມບັດ ກ່າວວ່າ: ການປູກກາເຟລາວໃນປັດຈຸບັນ ແມ່ນຫລຸດລົງ ແຕ່ຄວາມຕ້ອງການກາເຟໃນສັງຄົມຍັງເພີ່ມຂຶ້ນ ຕໍ່ກັບບັນຫາດັ່ງກ່າວ, ທາງສະມາຄົມກາເຟລາວກໍ່ບໍ່ໄດ້ນີ້ງນອນໃຈ ໂດຍໄດ້ມີການຈັດບຸນມະ ໂຫລານກາເຟຂຶ້ນ ຢູ່ນະຄອນປາກເຊ ແຂວງຈຳປາສັກ, ເຊິ່ງເປັນເຂດຜະລິດກາເຟຂອງປະເທດ ເພື່ອໂຄສະນາໃຫ້ສັງຄົມໄດ້ຮັບຮູ້ເຖິງຄຸນນະພາບຂອງກາເຟລາວ ແລະ ທັງເປັນການສົ່ງເສີມຜູ້ປູກກາເຟໃຫ້ຫລາຍຂຶ້ນ ເຊິ່ງໄດ້ເຊີນແຂກຕ່າງປະເທດທັງພາຍໃນພາກພື້ນ ແລະ ສາກົນເຂົ້າ ຮ່ວມ,

ພ້ອມນີ້ຍັງໄດ້ຈັດບຸນມະໂຫລານກາເຟ ຄັ້ງທີ 2 ຢູ່ ນະຄອນຫລວງວຽງຈັນ, ເຊິ່ງເປັນເຂດຊົມໃຊ້ກາເຟ ແລະ ຄັ້ງທີ່ 3 ກໍໄດ້ຈັດຢູ່ນະຄອນປາກເຊ ແຕ່ເນື່ອງຈາກພົບກັບສະພາບຄວາມຫຍຸ້ງຍາກໃນການລະບາດຂອງພະຍາດໂຄວິດ-19 ຈຶ່ງບໍ່ໄດ້ຮັບຜົນດີເທົ່າທີ່ຄວນ ແລະ ໃນ 10 ປີທີ່ຜ່ານມາ ລາຄາກາເຟແມ່ນຕົກຕ່ຳຫລາຍ ຈຶ່ງເຮັດໃຫ້ຊາວສວນຜູ້ປູກກາເຟ ຫັນໄປປູກພືດຊະນິດອື່ນ ທີ່ໃຊ້ເວລາສັ້ນໃນການເກັບຜົນຜະລິດ.