ເວລາປະມານ 22 ໂມງ ຂອງວັນທີ 25 ພະຈິກ 2021 ພະແນກສັນຕິບານ ກອງບັນຊາການ ປກສ ເມືອງສີສັດຕະນາກ ນຳໂດຍ ພັທ ໂອໄດ ພິມມະຈັນ ຫົວໜ້າພະແນກຕໍາຫຼວດສັນຕິບານ ສົມທົບກັບອຳນາດການປົກຄອງບ້ານດົງສະຫວາດ ເມືອງສີສັດຕະນາກ ນວ ລົງແກ້ໄຂ ຮ້ານຂາຍເຄື່ອງຍ່ອຍ ທີ່ລັກລອບເປີດໃຫ້ບໍລິການເຕີມເຊີ ເພື່ອຫຼິ້ນເກມອອນລາຍ.
![](https://kkklao.com/wp-content/uploads/2021/11/3.11-1.jpg)
ການລົງແກ້ໄຂໃນຄັ້ງນີ້ ຮ້ານດັ່ງກ່າວເເມ່ນຂອງ ນາງ ຫງວຽນທີຮັງ ອາຍຸ 31 ປີ ອາຊີບຄ້າຂາຍ ແລະ ມີຜູ້ມາໃຊ້ບໍລິການອິນເຕີເນັດກາເຟ (ເຕີມເຊີ) 1 ຄົນ ຈື່ງໄດ້ເຮັດບົດບັນທຶກ ພ້ອມທັງຢຶດໃບບິນເຕີມເຊິ 1 ໃບ. ຕໍ່ກັບເຈົ້າຂອງຮ້ານດັ່ງກ່າວ ເຈົ້າໜ້າທີ່ ໄດ້ເຊີນຂຶ້ນມາຫ້ອງການ ກອງບັນຊາການ ປກສ ເມືອງສີສັດຕະນາກ ນວ ເພື່ອສຶກສາອົບຮົມປັບໃໝຕາມຂໍ້ຕົກລົງເລກທີ 828/ປກສ ນວ, ລົງວັນທີ 13 ມີນາ 2015 ເພາະການກະທຳຂອງຜູ້ກ່ຽວເປັນການລະເມີດຕໍ່ຄຳສັ່ງເລກທີ່ 40/ສພກ ນວ, ລົງວັນທີ 30 ຕຸລາ 2021 ວ່າດ້ວຍການເພີ່ມທະວີການຈັດຕັ້ງປະຕິບັດມາດຕະການປ້ອງກັນ,ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19.
ຕໍ່ກັບເຫດການດັ່ງກ່າວ ກອງບັນຊາການ ປກສ ນະຄອນຫຼວງວຽງຈັນ ຮຽກຮ້ອງໃຫ້ພໍ່ແມ່ປະຊາຊົນ ມີສະຕິ ແລະ ເອົາໃຈໃສ່ຕໍ່ຄວາມຮັບຜິດຊອບຂອງຕົນ ບໍ່ໃຫ້ມີການເຕີມເຊີ ເພື່ອຫຼິ້ນເກມທາງອອນລາຍ ຖ້າພົບເຫັນໃຫ້ແຈ້ງຕໍ່ເຈົ້າໜ້າທີ່ຢູ່ໃກ້ຄຽງ ຫຼື ຜ່ານ ວອດແອບ ປກສ ນະຄອນຫຼວງເບີ 02028899774 ຫຼື ຜ່ານຊ່ອງທາງເຟັດບຸກ ປ້ອງກັນຄວາມສະຫງົບ ນະຄອນຫຼວງວຽງຈັນ.
Discussion about this post