​ເຈົ້າແຂວງເຊກອງ ຊີ້ນຳຫລາຍບັນຫາຕໍ່ຄະນະພັກພະແນກອຸດສາຫະກຳ

ແຫລ່ງຂ່າວຈາກ ແຂວງເຊກອງ ໃຫ້ຮູ້ວ່າ: ໃນໂອກາດເຂົ້າຮ່ວມພິທີປະກາດການຈັດຕັ້ງ ແລະ ບົ່ງຕົວແຕ່ງຕັ້ງຄະນະພັກຮາກຖານ ພະແນກອຸດສາຫະກຳ ແລະການຄ້າແຂວງ ທ່ານ ເຫລັກໄຫລ ສີວິໄລ ເຈົ້າແຂວງເຊກອງ ໄດ້ໃຫ້ທິດຊີ້ນຳຕໍ່ຄະນະພັກ-ຄະນະພະແນກໃຫ້ເອົາໃຈໃສ່ຫລາຍບັນຫາ ເປັນຕົ້ນ ໃຫ້ຄະນະພັກຊຸດໃໝ່ ຖືເອົາວຽກງານການສຶກສາອົບຮົມການເມືອງນໍາພາແນວຄິດ ໃຫ້ຖັນແຖວສະມາຊິກພັກ-ພະນັກງານ ເປັນກົກ, ພ້ອມກັນເຄົາລົບກົດໝາຍ ແລະ ກຳແໜ້ນສອງວາລະແຫ່ງຊາດໃຫ້ໄດ້ຢ່າງເລິກເຊິ່ງເຖິງຖອງ.

ພ້ອມນີ້, ຕ້ອງໄດ້ສຸມໃສ່ປັບປຸງແບບແຜນການນຳພາ, ແບບແຜນວິທີເຮັດວຽກ, ປະ ຕິບັດຫລັກການລວມສູນປະຊາທິປະໄຕ, ພ້ອມແບ່ງງານ ແບ່ງຄວາມຮັບຜິດຊອບໃຫ້ລະ ອຽດຈະແຈ້ງ, ເພີ່ມຄວາມສາມັກຄີພາຍໃນໃຫ້ແໜ້ນແຟ້ນກວ່າເກົ່າ; ເອົາໃສ່ວຽກງານປັບປຸງພັກ, ສ້າງພັກໃຫ້ໄດ້ທັງປະລິມານ ແລະ ຄຸນນະພາບ ໃຫ້ສາມາດສ້າງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ ຕິດພັນການຊຸກຍູ້ການສ້າງຂະບວນການ ຂອງອົງການຈັດຕັ້ງມະຫາຊົນ; ໃຫ້ຖືສຳຄັນວຽກງານພະນັກງານ ຕິດພັນກັບການສ້າງແຜນກຳນົດພະນັກງານນຳພາຄຸ້ມຄອງ ເພື່ອສ້າງໃຫ້ໄດ້ພະນັກງານສືບທອດປ່ຽນແທນຢ່າງແຂງແຮງ, ຄຸ້ມຄອງ, ປ້ອງກັນພະນັກງານບໍ່ໃຫ້ເສຍທາດຂາດຄຸນ, ການແຕ່ງຕັ້ງ, ສັບຊ້ອນ, ປັບປຸງກົງຈັກການຈັດຕັ້ງ, ໃຫ້ຖືກຕ້ອງຕາມຫລັກການ, ພ້ອມຕີລາຄາປະເມີນພະນັກງານ, ປະຕິບັດນະໂຍບາຍຕໍ່ພະນັກງານ, ການປະຕິບັດວິໄນຕໍ່ພະນັກງານ ແລະ ຕ້ອງກວດກາພາຍໃນພັກ-ລັດຢ່າງເປັນປົກກະຕິ.

ນອກນີ້, ຕ້ອງກຳແໜ້ນມະຕິກອງປະຊຸມໃຫຍ່ຄັ້ງທີ XI ຂອງພັກ, ຄັ້ງທີ X ຂອງແຂວງ ກໍຄື ວຽກງາອຸດສາຫະກຳ ແລະ ການຄ້າ ເຮັດແນວໃດ ໃຫ້ແຂວງເຮົາໄດ້ຮັບຮອງສິນຄ້າໂອດັອບ ໃຫ້ໄດ້ຢ່າງໜ້ອຍ 2 ລາຍການຕໍ່ປີ, ສືບຕໍ່ເອົາໃຈໃສ່ນຳພາປະເມີນຜົນການຈັດຕັ້ງປະຕິບັດ ແຜນພັດທະນາວິສາຫະກິດຂະໜາດນ້ອຍ ແລະ ກາງ ແຕ່ປີ 2016-2020 ແລະ ສ້າງແຜນພັດທະນາ SME ປີ 2021-2025 ຂອງແຂວງໃຫ້ສຳເລັດ ເພື່ອເປັນບ່ອນອີງໃນການເຄື່ອນໄຫວວຽກງານ, ສືບຕໍ່ຊີ້ນຳກວດກາການຄຸ້ມຄອງລາຄາສິນຄ້າ ຕາມທ້ອງຕະຫລາດໃນທົ່ວແຂວງ ຢ່າງເປັນເປັນປົກກະຕິ, ບໍ່ໃຫ້ຜູ້ປະກອບການສວຍໂອ ກາດຂຶ້ນລາຄາສິນຄ້າຕາມລຳພັງໃຈໂດຍເດັດຂາດ.

ຂ່າວ-ພາບ: ພຸດທະສອນ