ທ້າວ ເພັດ ຫຼື ອຸດ ອາຍຸ 40 ປີ ກໍາມະກອນ ຢູ່ບ້ານຫາດຊາຍຂາວ ເມືອງຫາດຊາຍຟອງ ນວ, ຖືກເຈົ້າໜ້າທີ່ຖືກຈັບຕົວໄດ້ ຢູ່ບ້ານໂພນສີນວນ ເມືອງສີສັດຕະນາກ ນວ ພ້ອມຂອງກາງລົດຈັກ 1 ຄັນ, ໃນຂໍ້ຫາ ຊື້-ຂາຍ ຊັບຜິດກົດໝາຍ (ຊື້ລົດລັກມາ) ປະເພດລົດຈັກ ມາດຳເນີນຄະດີ.
ເຈົ້າໜ້າທີ່ ພະແນກຕໍາຫຼວດ ປກສ ເມືອງສີສັດຕະນາກ ນວ ໃຫ້ຮູ້ວ່າ: ໃນວັນທີ 6 ກັນຍາ 2021, ໄດ້ຈັບຕົວເປົ້າໝາຍເຄື່ອນໄຫວລັກຊັບພົນລະເມືອງໄດ້ ຊື່ ທ້າວ ຄໍາພູ ອາຍຸ 31 ປີ ບ້ານດົງຊຽງດີ ເມືອງນາຊາຍທອງ ນວ (ລັກລົດຈັກ) ຮອນດ້າ ເວບ 100 ສີດໍາ ໝາຍເລກທະບຽນ ດຜ 9393 ກໍາແພງນະຄອນ ແລ້ວໄປຂາຍໃຫ້ ທ້າວ ເພັດ ຫຼື ອຸດ ອາຍຸ 40 ປີ ກໍາມະກອນ ຢູ່ບ້ານຫາດຊາຍຂາວ ເມືອງຫາດຊາຍຟອງ ນວ, ເຈົ້າໜ້າທີ່ຕໍາຫຼວດ ປກສ ເມືອງສີສັດຕະນາກ ນວ ໄດ້ສົມທົບກັບ ພາກສ່ວນກ່ຽວຂ້ອງຕິດຕາມເປົ້າໝາຍ. ຮອດວັນທີ 12 ພະຈິກ 2021 ສາມາດຈັບຕົວຜູ້ກ່ຽວ ພ້ອມທັງ ເກັບກູ້ຂອງກາງລົດຈັກ 1 ຄັນ ມາໄວ້ຢູ່ ປກສ ເມືອງສີສັດຕະນາກ ນວ ເພື່ອສືບສວນ-ສອບສວນ ແລະ ຕິດຕໍ່ພົວພັນຫາເຈົ້າຂອງລົດມາຮັບເອົາ.
ຕໍ່ກັບຄະດີດັ່ງກ່າວ, ເຈົ້າໜ້າທີ່ກຳລັງດໍາເນີນການ ສືບສວນ-ສອບສວນ ດຳເນີນຄະດີຕາມລະບຽບກົດໝາຍ.
Discussion about this post