ປກສ ແຂວງບໍ່ແກ້ວ​ ມອບ-ຮັບຕົວຜູ້ຮ້າຍຂ້າມແດນຂໍ້ຫາທຳຮ້າຍຮ່າງກາຍຜູ້ອື່ນດ້ວຍຮູບການໃຊ້ຄວາມຮຸນແຮງອາລະວາດ

ວັນທີ​ 12 ພະຈິກ 2021​ ພະແນກຕຳຫລວດສືບສວນ-ສອບສວນ ຫ້ອງຕຳຫຼວດ ກອງບັນຊາການ ປກສ ແຂວງບໍ່ແກ້ວ​ ໄດ້ມອບ-ຮັບຕົວຜູ້ຮ້າຍຂ້າມແດນ ຊື່ ທ້າວ ເມີງຊີງຮົວ ອາຍຸ 20​ ປີ ເຊິ່ງໄດ້ເຂົ້າຮ່ວມຂະບວນການ 11 ຄົນ​ ເຄື່ອນໄຫວຂົ່ມຂູ່ ທຳຮ້າຍຮ່າງກາຍຜູ້ອື່ນດ້ວຍຮູບການໃຊ້ຄວາມຮຸນແຮງອາລະວາດຜູ້ອື່ນຊ້ຳແລ້ວຊ້ຳອີກຢູ່ເຂດ ເມືອງຊີນຫົວ ແຂວງຫົວໜານ ສປ​ ຈີນ ແຕ່ປີ 2016, ຕົກມາຮອດວັນທີ 21 ເມສາ 2019 ຜູ້ກ່ຽວໄດ້ໃຊ້ໜັງສືຜ່ານແດນ​ EF8830414 ໂດຍຜ່ານດ່ານສາກົນບໍ່ຫານ-ບໍ່ເຕ່ນ ແຂວງຫຼວງນ້ຳທາ ມາລີ້ຊ້ອນຢູ່ເຂດເສດຖະກິດພິເສດສາມລ່ຽມຄຳ ເມືອງຕົ້ນເຜີ້ງ ແຂວງບໍ່ແກ້ວ.

ອີງຕາມ ໃບກິດສຳພັນຂອງກົມຕຳຫຼວດສືບຂ່າວອາຍາ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບສະບັບເລກທີ 318/ກສຂ ລົງວັນທີ 28/10/2021 ເຈົ້າໜ້າທີ່ຕຳຫຼວດສືບສວນ-ສອບສວນຄະດີອາຍາ ປກສ ແຂວງບໍ່ແກ້ວ​ ຈຶ່ງໄດ້ກັກຕົວຜູ້ກ່ຽວຢູ່ທີ່ເຂດເສດຖະກິດພິເສດສາມລຽມຄຳ. ຕາມທິດຊີ້ນຳຂອງຄະນະພັກ- ຄະນະບັນຊາ ປກສ ແຂວງບໍ່ແກ້ວ ຈື່ງໄດ້ມອບໃຫ້ ຫ້ອງຕຳຫລວດ​ ປກສ ແຂວງ ມອບຜູ້ຕ້ອງຫາຄົນດັ່ງກ່າວຄືນໃຫ້ກັບ ສປ​ ຈີນ ທີ່ດ່ານສາກົນບໍ່ເຕ່ນ-ບໍ່ຫານ.​

ຕາງໜ້າມອບໂດຍ​ ທ່ານ ພັທ ສົມລີ ວິໄລສານ ຮອງຫົວໜ້າຫ້ອງຕຳຫລວດ ປກສ ແຂວງບໍ່ແກ້ວ ພ້ອມດ້ວຍຄະນະ ຕາງໜ້າຮັບໂດຍ ທ່ານ ພັຕ ຈາງລີງ ຈູນ ຕຳຫຼວດ ປກສ ເມືອງ ຫຼາ ກີງ ແຂວງ ສີບສອງພັນນາ ສປ​ ຈີນ ພ້ອມດ້ວຍຄະນະ.ຂ່າວ: ໜັງສືພິມບໍ່ແກ້ວ

ທີ່ມາ:Youth Radio FM 90.0 Mhz