ທ້າວ ລັດດາ ອາຍຸ 23 ປີ ຢູ່່ບ້ານກົ້ວ ເມືອງສັງທອງ ນະຄອນຫຼວງວຽງຈັນ ຖືກເຈົ້າໜ້າທີ່ພະແນກຕໍາຫຼວດ ປກສ ເມືອງສັງທອງ ກັກຕົວໃນວັນທີ 3 ພະຈິກ ຜ່ານມາ, ຂໍ້ຫາທໍາລາຍຊັບຂອງພົນລະເມືອງ (ຈູດກອງເຂົ້າ) ຜົນເສຍຫາຍ 7.000.000 ກວ່າກີບ.
ພັທ ສີວິໄລ ພູມນະໄຊ ຫົວໜ້າກອງບັນຊາການ ປກສ ເມືອງສັງທອງ ໃຫ້ຮູ້ວ່າ: ໃນວັນທີ 28 ຕຸລາ ຜ່ານມາ, ເຈົ້າໜ້າທີ່ ປກສ ເມືອງສັງທອງ ໄດ້ຮັບລາຍງານຈາກການຈັດຕັ້ງບ້ານກົ້ວ ວ່າ: ມີຄົນລັກລອບຈູດກອງເຂົ້າປະຊາຊົນ ທີ່ກອງໂຮມໄວ້ຢູ່່ບ້ານດັ່ງກ່າວ.
ຈິ່ງໄດ້ຈັດຕັ້ງໃຫ້ເຈົ້າໜ້າທີ່ພະແນກຕໍາຫຼວດ ປກສ ເມືອງສັງທອງ ລົງສົມທົບກັບ ປກສ ກຸ່ມ ແລະ ການການຈັດຕັ້ງບ້ານ ລົງເກັບກໍາຂໍ້ມູນ ແລະ ກໍານົດໄດ້ເປົ້າໝາຍ,ມາຮອດວັນທີ 3 ພະຈິກ 2021 ກໍໄດ້ກັກຕົວ ທ້າວ ລັດດາ ມາສອບສວນ.
ຜ່ານການສອບສວນ ຜູ້ກ່ຽວສາລະພາບວ່າ: ໄດ້ລົງມືກໍ່ເຫດຈູດກອງເຂົ້າໃນຄັ້ງນີ້ແທ້ ຍ້ອນມີຄວາມບໍ່ພໍໃຈ ທີ່ເຈົ້າຂອງກອງເຂົ້າ ບໍ່ຈ່າຍຄ່າແຮງງານ ທີ່ຕົນຮັບຈ້າງກູ້ເຂົ້າໃນມື້ນັ້ນ ເຊິ່ງເຈົ້າຂອງກອງເຂົ້າ ໄດ້ບອກຕົນວ່າ ຫັກເງິນທີ່ຕົນໄດ້ຢືມກ່ອນໜ້ານີ້ໝົດ, ຈິ່ງເກີດຄວາມບໍ່ພໍໃຈ ແລະ ໄດ້ລົງມືກໍ່ເຫດ.
ຕໍ່ກັບຄະດີດັ່ງກ່າວ, ກອງບັນຊາການ ປກສ ເມືອງສັງທອງ ນວ ຈະໄດ້ສືບຕໍ່ດໍາເນີນຄະດີຕາມກົດໝາຍ.
Discussion about this post