ກະຊວງສາທາລະນະສຸກຊີ້ໃຫ້ເຫັນຜູ້ບໍ່ໄດ້ສັກວັກຊີນ ມີການຕິດເຊື້ອໂຄວິດ ຫຼາຍກວ່າຜູ້ທີ່ສັກຄົບໂດສ

ທ່ານ ດຣ. ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ ກ່່າວໃນພິທີຖະແຫຼງຂ່າວປະຈຳວັນທີ 3 ພະຈິກ 2021 ທີ່ກະຊວງສາທາລະນະສຸກວ່າ: ມາຮອດປັດຈຸບັນທົ່ວປະເທດລາວ ມີຜູ້ໄດ້ຮັບສັກວັກແຊັງແລ້ວ 6,5 ລ້ານກວ່າຄົນ, ໃນນັ້ນເຂັມທີ 1 ສັກໄດ້ 3,3 ລ້ານຄົນ ກວມເອົາ 45,5% ແລະ ເຂັມທີ 2 ສັກໄດ້ 2,8 ລ້ານຄົນ ກວມເອົາ 39,4%.

ຜ່ານການຈັດຕັ້ງປະຕິບັດການສັກວັກແຊັງໃນປະເທດລາວເຮົາ ເຫັນວ່າມີຜູ້ທີ່ມີອາການຂ້າງຄຽງຈາກການສັກຢາທັງໝົດ 195 ກໍລະນີ, ໃນນີ້ອາການເບົາບາງ 170 ກໍລະນີ ແລະ ອາການຮຸນແຮງ 25 ກໍລະນີ ແຕ່ບໍ່ມີກໍລະນີເສຍຊີວິດ. ແຕ່ຍັງເຫັນວ່າພໍ່ແມ່ປະຊາຊົນຈຳນວນໜຶ່ງ ຍັງມີຄວາມກັງວົນໃນການຈະເຂົ້າໄປຮັບວັກແຊັງ ແຕ່ທຸກຄົນມີຄວາມຈຳທີ່ຈະຕ້ອງເຂົ້າເຖິງວັກແຊັງເພາະເຮົາຈະສ້າງພູມຄຸ້ມກັນລວມໝູ່ ແລະ ຫຼຸດຜ່ອນຄວາມສ່ຽງຂອງການລະບາດເຊື້ອຢູ່ໃນສັງຄົມ. ເວົ້າໄດ້ວ່າມາຮອດປັດຈຸບັນ ສປປ ລາວ ແມ່ນມີວັກແຊັງພຽງພໍກັບການແຈກຈ່າຍໄປທົ່ວຂອບເຂດໃນປະເທດທັງໂຮງໝໍແຂວງ, ໂຮງໝໍເມືອງ, ສຸກສາລາ. ສະນັ້ນການສັກຍັງເຫັນວ່າບາງແຂວງຍັງປະຕິບັດໄດ້ຊ້າ ຍັງມີອັດຕາການເຂົ້າເຖິງວັກແຊັງຫຼຸດ 30% ແມ່ນມີຜົ້ງສາລີ ແລະ ແຂວງຫົວພັນ; ສະນັ້ນຢາກໃຫ້ທຸກເຂດ, ທຸກແຂວງຈົ່ງຮີບຮ້ອນຈັດຕັ້ງປະຕິບັດ.

ທ່ານກ່າວຕື່ມວ່າ: ຈາກການຕິດຕາມກໍລະນີຜູ້ຕິດເຊື້ອສະສົມໃນທົ່ວປະເທດລາວ ຈຳນວນທັງໝົດ ມາຮອດວັນທີ 2 ພະຈິກ 2021 ມີຈຳນວນ 41.829 ຄົນ, ເສຍຊີວິດສະສົມ 70 ຄົນ ອັດຕາຄວາມຮຸນແຮງເທົ່າກັບ 0,16% ທັງໝົດຜູ້ຕິດເຊື້ອແມ່ນມີຜູ້ໄດ້ຮັບການສັກວັກແຊັງແລ້ວຕິດເຊື້ອ ກວມເອົາ 10.637 ຄົນ ກວມເອົາ 24,4%; ໃນນັ້ນມີຜູ້ທີ່ສັກຢາຄົບ 2 ເຂັມ 9.468 ຄົນ ກວມເອົາ 23% ແລະ ຜູ້ໄດ້ສັກ 1 ເຂັມ ( ສັກບໍ່ຄົບ ) ມີ 1.139 ຄົນ ກວມເອົາ 2,7%; ສ່ວນຜູ້ຕິດເຊື້ອທີ່ບໍ່ໄດ້ຮັບການສັກວັກແຊັງເລີຍກວມເອົາ 74,57% ຖືວ່າເປັນຕົວເລກທີ່ສູງຫຼາຍ.

ສຳລັບອັດຕາຜູ້ເສຍຊີວິດ 70 ຄົນ, ໃນນັ້ນຜູ້ທີ່ໄດ້ຮັບວັກແຊັງແລ້ວຕິດເຊື້ອເສຍຊີວິດ ມີ 20 ຄົນ ກວມເອົາ 28% ແລະ ຜູ້ທີ່ບໍ່ໄດ້ຮັບການສັກວັກແຊັງເລີຍ 32 ຄົນ ກວມເອົາ 46% ແລະ ມີຜູ້ທີ່ບໍ່ຮູ້ຂໍ້ມູນເລີຍມີ 18 ຄົນ ກວມ 26% ສະແດງໃຫ້ເຫັນວ່າຜູ້ທີ່ໄດ້ຮັບສັກວັກແຊັງຄົບແມ່ນມີອັດຕາການເສຍຊີວິດໜ້ອຍກວ່າຜູ້ທີ່ບໍ່ໄດ້ສັກ

ທັງໝົດນີ້ແມ່ນຜົນດີຂອງການຮັບການສັກວັກແຊັງ, ດັ່ງນັ້ນຂໍໃຫ້ປະຊາຊົນຢ່າລັງເລໃນການເຂົ້າໄປຮັບວັກແຊັງ, ໃນຕໍ່ໜ້ານີ້ຢາກຮຽກຮ້ອງໃຫ້ທຸກຄົວເຮືອນຈົ່ງເປັນເຈົ້າການໃນການນຳເອົາຜູ້ອາຍຸສູງ ແລະ ຜູ້ທີ່ຍັງບໍ່ໄດ້ສັກ ( ຢູ່ໃນເກນສັກໄດ້ ) ໃນເຮືອນທ່ານມາຮັບວັກແຊັງ ແລະ ຫາກເຮົາຈະຢູ່ກັບໂຄວິດຕໍ່ໄປໄດ້ເຮົາຕ້ອງເພີ່ມຄວາມເອົາໃຈໃສ່ຮ່ວມກັນຕື່ມ ປັດຈຸບັນພວກເຮົາມີວັກແຊັງແຈກຢາຍຢູ່ແຕ່ລະແຂວງແລ້ວ 1,5 ລ້ານໂດສ ແລະ ຍັງຈະນຳເຂົ້າມາອີກ 2,5 ລ້ານໂດສ, ສະນັ້ນແຂວງທີ່ກຽມເປີດຕາມແລວທາງລົດໄຟນີ້ໃຫ້ເອົາໃຈໃສ່ເພີ່ມລະດັບອັດຕາພູມຄຸ້ມກັນໃຫ້ປະຊາກອນຕົນເອງດ້ວຍ.

ທີ່ມາ: ເສດຖະກິດການຄ້າ