ກໍາລັງລັກຊັບຖຶກປະຊາຊົນ ເຂົ້າຈັບຕົວກ່ອນ

ເຈົ້າໜ້າທີ່ ປກສ ກຸ່ມ ໂຄກສີວິໄລ ເມືອງໄຊທານີ ນະຄອນຫຼວງວຽງຈັນ ໃຫ້ຮູ້ວ່າ: ໃນວັນທີ 1 ພະຈິກ 2021 ກໍາລັງ ປກຊ ເມືອງໄຊທານີ ໄດ້ພົບເຫັນຊາຍ 2 ຄົນກໍາລັງຈະລັກຊັບຢູ່ ສູນຝຶກອົບຮົມ ພະນັກງານ ເສັ້ນທາງລົດໄຟລາວ-ຈີນ ຢູ່ບ້ານໂພຄໍາ ເມືອງໄຊທານີ ຈິ່ງໄດ້ເຂົ້າກັກຕົວໄວ້ໄດ້ 1 ຄົນຄື: ທ້າວ ແສງ ອາຍຸ 21 ປີ ກໍາມະກອນ ປັດຈຸບັນພັກເຊົາ ຢູ່ບ້ານນ້ອຍ ເມືອງໄຊເສດຖາ ນວ ແລ້ວສົ່ງໃຫ້ ປກສ ກຸ່ມ ໂຄກສີວິໄລ ດໍາເນີນການສອບສວນ. ສ່ວນຜູ້ຮ່ວມຂະບວນການອີກ 1 ຄົນ ແມ່ນໄດ້ເອົາຕົວຫຼົບໜີ.

ຜ່ານການສອບສວນ ເບື້ອງຕົນ ຜູ້ກ່ຽວໄດ້ໃຫ້ການຮັບສາລະພາບຕໍ່ເຈົ້າໜ້າທີ່ວ່າ: ໃນວັນທີ 1 ພະຈິກ 2021 ຕົນເອງກັບໜູ່ອີກ 1 ຄົນ ໄດ້ຊັກຊວນກັນ ເພື່ອເຂົ້າໄປລັກເອົາເຫຼັກ ຢູ່ສູນຝຶກອົບຮົມ ພະນັກງານເສັ້ນທາງລົດໄຟລາວ-ຈີນ ເພື່ອເອົາໄປຂາຍ ຊື້ຢາບ້າເສບ ແຕ່ບໍ່ທັນໄດ້ຫຍັງ ກໍ່ຖືກທະຫານ ເມືອງໄຊທານີ ທີ່ກໍາລັງປະຕິບັດໜ້າທີ່ປ້ອງກັນຢູ່ສູນ ດັ່ງກ່າວ ພົບເຫັນກ່ອນ ແລ້ວ ເຂົ້າກັກຕົວ.ສ່ວນຜູ້ທີ່ຮ່ວມຂະບວນການ ທີ່ໄດ້ເອົາຕົວຫຼົບໜີ ປັດຈຸບັນ ປກສ ກຸ່ມໂຄກສີວິໄລ ໄດ້ປະສານສົມທົບກັບພາກສ່ວນທີ່ກ່ຽວຂ້ອງຊອກຫາເປົ້າໝາຍ ເພື່ອນໍາມາດໍາເນີນຄະດີ ຕາມລະບຽບກົດໝາຍ.