ເຈົ້າໜ້າທີ່!..ຈັບເປົ້າໝາຍໄດ້ 2 ຄົນພ້ອມຂອງກາງຢາບ້າ 11.919 ເມັດ

ວັນທີ 20 ຕຸລາ ຜ່ານມາ,ເຈົ້າໜ້າທີ່ ປກສ ເມືອງຄໍາເກີດ ແຂວງບໍລິຄໍາໄຊ ໄດ້ສົມທົບກັບ ປກສ ກຸ່ມທົ່ງແຄະ ຕິດຕາມຈັບເປົ້າໝາຍຢາເສບຕິດ ໄດ້ຊື່ ທ້າວ ທັນ ອາຍຸ 47 ປີ ຢູ່່ບ້ານທົ່ງວຽງຄໍາ ເມືອງຄໍາເກີດ ພ້ອມຂອງກາງ ຢາບ້າ 1.919 ເມັດ ໄປດຳເນີນການສອບສວນຂະຫຍານຜົນ.

ຜ່ານການສອບສວນ ຜູ້ຖືກຫາ ສາລະພາບວ່າ: ໃນວັນທີ 19 ຕຸລາ ນີ້,ໄດ້ຊື້ຢາບ້າ 1 ມັດ ລວມມີຢາ 10 ຖົງ ເທົ່າກັບ 2.000 ເມັດ ນຳນາງຂັນດອກໄມ້ ຄົນຢູ່່ບ້ານດຽວກັນ,ແລ້ວເອົາຢາໄປຂາຍໃຫ້ກຸ່ມໄວລຸ້ນມົ້ວສຸມເສບຢາ ຍັງເຫຼືອຢາບ້າ 1.919 ເມັດ ກໍຖືກຈັບ.

ໃນໄລຍະຜ່ານມາ ແມ່ນໄດ້ເຄື່ອນໄຫວຊື້ຂາຍຢາບ້າ ແຕ່ເດືອນ ມິຖຸນາ 2020, ເຊິ່ງເຄີຍຊື້ຢາບ້າ ມາຂາຍຈໍານວນ 5 ຄັ້ງ, ຄັ້ງລະ1 ຖົງ ເທົ່າ ກັບ 200 ເມັດ ໂດຍເອົາໄປຂາຍໃຫ້ກຸ່ມໄວລຸ້ນທີ່ມົ້ວສຸມເສບຢາ ຢູ່່ໃນພາຍເມືອງຄໍາເກີດ.

ຈາກນັ້ນ,ເວລາປະມານ 16:00 ໂມງ ຂອງວັນດຽວກັນ,ເຈົ້າໜ້າທີ່ ປກສ ເມືອງຄໍາເກີດ ກໍໄດ້ສົມທົບກັບພາກສ່ວນທີ່ກ່ຽວຂ້ອງ ເຂົ້າກວດຄົ້ນເຮືອນຂອງ ນາງຂັນດອກໄມ້ ຕາມການຊັດທອດຂອງຜູ້ຖືກຫາ ພົບຢາບ້າ ຈໍານວນ 5 ມັດ ເທົ່າກັບ 10.000 ເມັດ, ປຶນສັ້ນ 1 ກະ ບອກ ຈຶ່ງກັກຕົວຜູ້ກ່ຽວ ພ້ອມຂອງກາງ ໄປດໍາເນີນຄະດີ.

ປັດຈຸບັນຄະດີຢາເສບຕິດດັ່ງກ່າວ, ເຈົ້າໜ້າທີ່ ປກສ ເມືອງຄຳເກີດ ພວມສອບສວນຂະຫຍາຍຜົນ ເພື່ອສືບຕໍ່ດໍາເນີນຄະດີຕາມກົດໝາຍໃນຂັ້ນຕໍ່ໄປ.