ເກີດເຫດ!…ໄຟໄໜ້ເຮືອນປະຊາຊົນ ເຂດບ້ານຮ່ອງໄກ່ແກ້ວ ເສຍຫາຍໝົດຫຼັງ

ເວລາ 20:30 ໂມງ ຂອງວັນທີ 25 ຕຸລາ 2021, ໄດ້ເກີດເຫດການໄຟໄໝ້ເຮືອນ ຂອງ ນາງ ແວງ ອາຍຸ 73 ປີ ບ້ານຮ່ອງໄກ່ແກ້ວ ເມືອງຈັນທະບູລີ, ນະຄອນຫຼວງວຽງຈັນ ສົ່ງຜົນເຮັດໃຫ້ເຮືອນຫຼັງດັ່ງກ່າວເສຍຫາຍໝົດຫຼັງ. ເຈົ້າໜ້າທີ່ ພະແນກຕໍາຫຼວດສະກັດກັ້ນ ແລະ ຕ້ານອັກຄີໄພ ນະຄອນຫຼວງວຽງຈັນ ໃຫ້ຮູ້ວ່າ: ເມື່ອໄດ້ຮັບແຈ້ງ ເຈົ້າໜ້າທີ່ ພ້ອມທັງພາຫານະ ແລະ ກໍາລັງພົນ ໄດ້ອອກໄປຫາຈຸດເກີດເຫດ, ໂດຍໃຊ້ລົດມອດໄຟຈໍານວນ 2 ຄັນ, ພະນັກງານ 12 ສະຫາຍ, ໂດຍໄດ້ປະສານສົບທົບກັບ ກົມຕໍາຫຼວດສະກັດກັ້ນ ແລະ ຕ້ານອັກຄີໄພ ກະຊວງປ້ອງກັນຄວາມສະຫງົບ ລົດມອດໄຟ 1 ຄັນ ພະນັກງານ 6 ສະຫາຍ, ເມື່ອມາເຖິງຈຸດເກີດເຫດ ເຈົ້າໜ້າທີ່ວິຊາສະເພາະໄດ້ເຂົ້າປະຈັນບານທາມກາງແປວໄຟທີ່ລຸກໄໝ້ພາຍໃນຢ່າງຮຸນແຮງ ໃຊ້ເວລາປະມານ 1 ຊົ່ວຈຶ່ງສາມາດດັບມອດໄຟໄດ້, ຜ່ານການເກັບກໍາຂໍ້ມູນ ແລະ ຜົນຂອງການສືບສວນ – ສອບສວນຂອງເຈົ້າໜ້າທີ່ ເຮືອນຫຼັງທີ່ເກີດເຫດໄຟໄໝ້ ເປັນເຮືອນ 2 ຊັ້ນ,ຊັ້ນລຸ່ມກໍ່ດ້ວຍຊີມັງ, ຊັ້ນເທິງແອ້ມດ້ວຍໄມ້, ມຸງສັງກະສີ ກວ້າງ 6 x 9 ແມັດ, ປຸກສ້າງໃນປີ1981 – 2021 ໄດ້ປະມານ 40 ປີແລ້ວ, ນາງ ແວງ ທອງວັນ ແມ່ນອາໃສຢູ່ຫ້ອງນອນຊັ້ນທີ່ 2 ຂອງເຮືອນ, ພາຍໃນຫ້ອງຂອງຜູ້ກ່ຽວປະກອບມີເຄື່ອງໃຊ້ໄຟຟ້າເປັນຕົ້ນ ໂທລະພາບ ສີ 32 ນິວ 1 ໜ່ວຍ, ແອທໍາຄວາມເຢັນ ຂະຫນາດ 12.000 ທີຢູ່ 1 ໜ່ວຍ, ຕູ້ເຢັນ 6 ຄິວ 1 ໜ່ວຍ, ໝໍ້ຫຸງເຂົ້າ 1 ໜ່ວຍ, ຕົກນ້ໍາຮ້ອນ 1 ໜ່ວຍ, ພັດລົມຕັ້ງໂຕະ 1 ໜ່ວຍ, ດອກໄຟຟ້າໃຫ້ແສງສະຫວ່າງ 2 ດອກຂະໜາດ 40 ວັດ, ເຄື່ອງໄຟຟ້າດັ່ງກ່າວແມ່ນເປັນເຄື່ອງໃຊ້ເປັນປະຈໍາວັນຂອງຜູ້ກ່ຽວ.

ໃນມື້ເກີດເຫດວັນທີ 25 ຕຸລາ 2021ໃນເວລາປະມານ 19 ໂມງ 00 ນາທີ ຜູ້ກ່ຽວແມ່ນໄດ້ລົງມາຊັ້ນລຸ່ມຂອງເຮືອນຈຸດປະສົງແມ່ນລົງມາຫາພີ່ນ້ອງມາຢາມ ແລະ ໄດ້ນັ່ງລົມກັນປະມານ 40 ນາທີ, ຫຼັງຈາກພີ່ນ້ອງກັບແລ້ວ ກໍໄດ້ຍ່າງມາເຮືອນຂອງລູກຊາຍທີ່ຢູ່ທາງຂ້າງ ຊື່ ທ້າວ ອໍາໄພວັນ ແລະ ໄດ້ມານັ່ງລົມກັບລູກຫຼານອີກປະມານ 30 ນາທີ ຫຼັງຈາກນັ້ນຈຶ່ງເກີດເຫດການໄຟໄໝ້ ຂຶ້ນຢູ່ຊັ້ນ 2 ຂອງເຮືອນເຊິ່ງເປັນຫ້ອງນອນຂອງຜູ້ກ່ຽວ, ໃນຕອນເກີດເຫດຢູ່ພາຍໃນເຮືອນແມ່ນມີແຕ່ຫຼານຊາຍ ຊື່ທ້າວ ສຸລິສັກ ຫຼື ກີ້ ພ້ອມດ້ວຍໝູ່ຢູ່ພາຍໃນເຮືອນຊັ້ນລຸ່ມ ທ້າວ ສຸລິສັກ ໄດ້ຍິນສຽງຂອງຄົນຢູ່ດ້ານນອກຮ້ອງໃສ່ວ່າ: ມີໄຟໄໝ້! ເມື່ອໄດ້ຍິນເຊັ່ນນັ້ນ ຜູ້ກ່ຽວ ພ້ອມ ດ້ວຍໝູ່ ໄດ້ພາກັນແລ່ນຂຶ້ນໄປເທິງເຮືອນຊັ້ນ 2, ເມື່ອຂຶ້ນໄປຮອດ ກໍເຫັນ ຄວັນໄຟກຸ້ມຢູ່ພາຍໃນຫ້ອງ, ໃນຕອນທີ່ເຫັນເບື້ອງຕົ້ນໄຟແມ່ນຍັງບໍ່ໄດ້ໄດ້ໄໝ້ແຮງເທື່ອ ແລະ ຈຸດທີ່ໄໝ້ ແມ່ນຢູ່ກ້ອງໂທ ລະພາບເຊິ່ງເປັນປັກສຽບ ຜູ້ກ່ຽວພ້ອມດ້ວຍໝູ່ແມ່ນບໍ່ມີວິທີການດັບມອດຈຶ່ງໄດ້ແລ່ນລົງມາງັບສະວິກໄຟຟ້າຢູ່ຊັ້ນລຸ່ມຂອງເຮືອນ ແລ້ວພາກັນຫິ້ວຄຸນ້ໍາຂຶ້ນເມື່ອອີກ ເພື່ອຈະມອດໄຟແຕ່ກໍບໍ່ສາມາດມອດໄຟໄດ້ ເພາະວ່າໄຟເລີ່ມໄໝ້ແຮງແລ້ວ, ຫຼັງ ຈາກນັ້ນຈຶ່ງພາກັນອອກມາທາງ ນອກ ແລະ ອີກປະມານ 15 ນາທີ ລົດມອດໄຟກໍມາເຖິງສະຖານທີ່ເກີດເຫດ.

ທ້າວສຸລິສັກ ໃຫ້ການຕໍ່ເຈົ້າໜ້າທີ່ຂອງພວກເຮົາວ່າ: ຕົນເຫັນໄຟຟ້າຊ໋ອດຈາກປັກສຽບທີ່ສຽບໂທລະພາບ ເພາະຜູ້ກ່ຽວເຫັນໄຟໄໝ້ອອກຈາກຈຸດດັ່ງກ່າວ. ໃນເບື້ອງຕົ້ນເຈົ້າໜ້າທີ່ໄດ້ສັນນິຖານວ່າ ອາດເກີດຈາກໄຟຟ້າຊ໋ອດກະດານໄຟຟ້າພາຍໃນຫ້ອງ, ສ່ວນສາເຫດທີ່ເກີດຂຶ້ນ ເຈົ້າໜ້າທີ່ສືບສວນ-ສອບສວນ ຈະເກັບກຳຂໍ້ມູນ ເພື່ອພິສູດຫາຫຼັກຖານທີ່ເກີດຂຶ້ນຢ່າງລະອຽດຕື່ມອີກ.

ທີ່ມາຂ່າວ:ຄວາມສະຫງົບ Lao Security News