ເຈົ້າໜ້າທີ່ກັກຕົວເປົ້າໝາຍຄ້າ-ຂາຍຢາເສບຕິດ ພ້ອມຂອງກາງຢາບ້າ 50 ເມັດ

ເຈົ້າໜ້າທີ່ໜ່ວຍງານວິຊາສະເພາະ ກອງບັນຊາການ ປກສ ເມືອງໄຊເຊດຖາ ນະຄອນຫຼວງວຽງຈັນ ໄດ້ແກ້ໄຂເປົ້າໝາຍຄ້າ-ຂາຍຢາເສບຕິດ (ຢາບ້າ) ຢູ່ເຂດບ້ານອາມອນ ກັກຕົວ ທ້າວບຸນ ອາຍຸ 28 ປີ ວ່າງງານ ເກີດຢູ່ບ້ານເມືອງແອດ ເມືອງແອດ ແຂວງຫົວພັນ, ປັດຈຸບັນພັກເຊົາ ຢູ່ບ້ານຂາມງອຍ ເມືອງໄຊເຊດຖາ ພ້ອມຂອງກາງຢາບ້າ 50 ເມັດ ເມື່ອວັນທີ 12 ຕຸລາ 2021 ມາດໍາເນີນຄະດີ. ຜ່ານການສອບສວນເບື້ອງຕົ້ນ ຜູ້ກ່ຽວໃຫ້ການຮັບສາລະພາບວ່າ: ໃນວັນທີ 12 ຕຸລາ 2021 ເວລາປະມານ 8:00 ໂມງ ຕົນເອງໄດ້ໄປຊື້ຢາບ້ານໍາຊາຍຄົນໜຶ່ງ ຢູ່ເຂດບ້ານນາສ່າງໄຜ ຈໍານວນ 50 ເມັດ, ຫຼັງຈາກໄດ້ຢາບ້າມາແລ້ວຈະນໍາຢາບ້າໄປຂາຍ ຢູ່ເຂດບ້ານອາມອນ ຮອດເວລາ 10:00 ໂມງ ກໍຖືກເຈົ້າໜ້າທີ່ກັກຕົວ; ນອກຈາກນີ້ ຜູ້ກ່ຽວຍັງຮັບສາລະພາບອີກວ່າ: ຕົນເອງໄດ້ເລີ່ມເສບຢາບ້າມາແຕ່ປີ 2017 ໂດຍເສບມື້ລະ 3-4 ເມັດ; ສ່ວນຢາບ້າທີ່ນໍາມາເສບນັ້ນ ແມ່ນຊື້ຢູ່ຕາມຮ້ານອິນເຕີເນັດກາເຟ. ປັດຈຸບັນ, ໄດ້ກັກກັນຜູ້ກ່ຽວຕາມກໍານົດເວລາທີ່ຄະນະສະເພາະກິດວາງອອກ ພາຍຫຼັງຄົບກໍານົດ ແລະ ກວດບໍ່ພົບເຊື້ອພະຍາດໂຄວິດ-19 ຈິ່ງຈະໄດ້ສືບຕໍ່ດໍາເນີນການສຶບສວນ-ສອບສວນ ຂະຫຍາຍຜົນ ຊອກຫາກຸ່ມແກ້ງທີ່ຮ່ວມຂະບວນການມາດໍາເນີນຄະດີຕາມລະບຽບກົດໝາຍ.

ທີ່ມາ: ປ້ອງກັນຄວາມສະຫງົບນະຄອນຫຼວງວຽງຈັນ