ຈັບເປົ້າໝາຍ ໄດ້ຄາລົດ 6 ລໍ້ ພ້ອມຂອງກາງ ລວມ 36.051 ເມັດ

ວັນທີ 11 ຕຸລາ ນີ້,ເຈົ້າໜ້າທີ່ ປກສ ນະຄອນໄກສອນ ແຂວງສະຫວັນນະເຂດ ຈັບເປົ້າໝາຍຢາເສບຕິດໄດ້ ຊື່ ທ້າວ ຄອນສະຫວັນ ຫຼື ບີດ ອາຍຸ 24 ປີ ຢູ່່ບ້ານສອນໄຊ ແລະ ທ້າວ ວັນມະນີ ຫຼື ຕາໂລ້ ອາຍຸ 23 ປີຢູ່່ບ້ານໂພນສະອາດ ທັງສອງບ້ານຂຶ້ນກັບນະຄອນໄກສອນ,ພ້ອມ ຢາບ້າ ຈຳນວນ 2.023 ເມັດ ທີ່ບັນຈຸໄວ້ໃນກ່ອງເຄື່ອງຝາກ.

ຜ່ານການສອບສວນ,ມື້ຕໍ່ມາ ເວລາປະມານ 16:00 ໂມງ,ເຈົ້າໜ້າທີ່ ປກສ ນະຄອນໄກສອນ ກໍຕິດຕາມຈັບຜູ້ຖືກຊັດທອດ ຊື່ ທ້າວ ສູນທອນ ອາຍຸ 36 ປີ ຢູ່່ບ້ານທ່າພະລານໄຊ ເມືອງສີສັດຕະນາກ ນະຄອນຫຼວງວຽງຈັນ ໄດ້ຄາລົດ 6 ລໍ້ ສີປອນ ໝາຍເລກທະບຽນ ບຂ 9250 ກຳແພງນະຄອນ ຢູ່່ເສັ້ນທາງເລກ 9 ເຂດບ້ານອຸດົມວິໄລ ນະຄອນໄກສອນ ແລະ ກວດຄົ້ນລົດ ພົບເຫັນຢາບ້າ ຈຳນວນ 17 ມັດ ກັບອີກ 28 ເມັດ ລວມມີຢາບ້າ 34.028 ເມັດ ໄປດຳເນີນຄະດີ.

ຈາກນັ້ນ,ຮອດເວລາປະມານ 19:00 ໂມງຂອງວັນດຽວກັນ,ກໍຕິດຕາມຈັບພັກພວກທີ່ຮ່ວມຂະບວນການຊື້-ຂາຍຢາບ້ານຳກັນ ໄດ້ອີກ 1 ຄົນຊື່ ທ້າວ ສັກດາ ຫຼື ຕົ້ນ ແລະ ລົບໜີໄດ້ 1 ຄົນ.ປັດຈຸບັນເຈົ້າໜ້າທີ່ ພວມສືບຕໍ່ຕິດຕາມຈັບ ເພື່ອສອບສວນຂະຫຍາຍຜົົນຫາກຸ່ມແກ໋ງ ແລະ ສືບຕໍ່ດຳເນີນຄະດີກັບຜູ້ຖືກຫາ ຕາມຂັ້ນຕອນກົດໝາຍ.