ເຈົ້າໜ້າທີ່ ແຂວງຫຼວງພະບາງ ຈັບຜູ້ຖືກຫາໄດ້ 3 ຄົນພ້ອມຂອງກາງ 3.420.077 ເມັດ

ເມື່ອທ້າຍເດືອນສິງຫາ ຜ່ານມາ,ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຫຼວງພະບາງ ມ້າງຄະດີຢາເສບຕິດລາຍໃຫຍ່ໄດ້,ຈັບຜູ້ຖືກຫາໄດ້ 3 ຄົນ, ຢຶດຢາບ້າໄດ້ 3.420.077 ຈຳນວນ,ລົດໃຫຍ່ 3 ຄັນ ແລະ ເຄື່ອງຂອງກາງຄະດີອີກຈຳນວນໜຶ່ງ.

ເຈົ້າໜ້າທີ່ ປກສ ແຂວງຫຼວງພະບາງ ໃຫ້ຮູ້ວ່າ:ຜູ້ຖືກຫາທັງ 3 ຄົນ ຊື່: ທ້າວ ບີ ອາຍຸ 27 ປີ ຢູ່່ບ້ານໜອງແມງດາ ເມືອງໄຊ ແຂວງອຸດົມໄຊ, ທ້າວ ເບັງລີ ອາຍຸ 29 ປີ ຢູ່່ບ້ານສີບຸນເຮືອງ ເມືອງຮຸນ ແຂວງອຸດົມໄຊ ແລະ ທ້າວ ສີດາເລົ່າ ຫຼື ດາລີ ອາຍຸ 27 ປີ ຢູ່່ບ້ານຊົ່ງຈາ ເມືອງນ້ຳບາກ ແຂວງຫຼວງພະບາງ.

ພ້ອມຂອງກາງ ລວມມີຢາບ້າ ຈຳນວນ 1.710 ມັດ ເທົ່າກັບ 3.420.077 ເມັດ, ເງິນ 5 ລ້ານກີບ, ເງິນບາດ 1.075.000 ບາດ,ສາຍຄໍຄຳ ພ້ອມກີ້ ຈໍານວນ 1 ເສັ້ນ,ສາຍແຂນຄໍາ 1 ເສັ້ນ, ແຫວນຄໍາ 2 ວົງ, ແຫວນຍົກ(ສີຂຽວ)1 ວົງ,ລົດໃຫຍ່ 3 ຄົນ,ປືນສັ້ນ F92 ຈໍານວນ 1 ກະບອກ, ລູກປຶນ ຈໍານວນ 350 ລູກ, ຈັກບົດຢາບ້າ 1 ເຄື່ອງ ແລະ ໂທລະສັບ 6 ເຄື່ອງ.

ປັດຈຸບັນ,ຄະດີຢາເສບຕິດດັ່ງກ່າວນີ້ ກອງບັນຊາການ ປກສ ແຂວງຫຼວງພະບາງ ພວມສືບຕໍ່ດຳເນີນການສອບສວນຂະຫຍາຍຜົນ ຫາທີ່ໄປທີ່ມາຂອງຢາເສບຕິດຈຳນວນດັ່ງກ່າວ ແລະ ສືບຕໍ່ດຳເນີນຄະດີຕາມຂັ້ນຕອນຂອງກົດໝາຍຕໍ່ໄປ.