ບຸກດ່ຽວ ເຂົ້າປຸ້ນຊັບໃນຮ້ານອິນເຕີເນັດ ແລະ ຮ້ານມິນິມາກ ລົບໜີ, ແຕ່ບໍ່ລອດ ຖືກເຈົ້າໜ້າທີ່ຕໍາຫຼວດ ນຳຈັບຕົວໄດ້

ຊາຍໄວ 21 ປີ ຢູ່່ບ້ານຫວ້ຍຍາງຄຳ ນະຄອນປາກເຊ ແຂວງຈຳປາສັກ ນໍາໃຊ້ປືນສັ້ນ ( ປືນກັບໄຟ) ບຸກດ່ຽວ ເຂົ້າປຸ້ນຊັບໃນຮ້ານອິນເຕີເນັດ ແລະ ຮ້ານມິນິມາກ ໄດ້ເງິນ 1.700.000 ກວ່າກີບ ລົບໜີ, ແຕ່ບໍ່ລອດ ຖືກເຈົ້າໜ້າທີ່ຕໍາຫຼວດ ນຳຈັບຕົວໄດ້ ພ້ອມຂອງກາງ ທີ່ໃຊ້ໃນການກໍ່ເຫດປຸ້ນ ໄປດຳເນີນຄະດີໃນວັນທີ 2 ກັນຍາ ຜ່ານມາ.

ຄະດີປຸ້ນຊັບພົນລະເມືອງດັ່ງກ່າວນີ້,ໃນເບື້ອງຕົ້ນ ເຈົ້າໜ້າທີ່ ປກສ ກຸ່ມ6 ໄດ້ຮັບແຈ້ງຄວາມຈາກຜູ້ເສຍຫາຍ ຈຶ່ງສົມທົບກັບເຈົ້າໜ້າທີ່ວິຊາສະເພາະ ປກສ ນະຄອນປາກເຊ ລົງເກັບກຳຂໍ້ມູນຫຼັກຖານໃນຈຸດເກີດເຫດ ແລະ ໄດ້ຄັດຈ້ອນຂຶ້ນບັນຊີເປົ້າໝາຍຕິດຕາມ ມາຮອດວັນທີ 2 ກັນຍາ ຜ່ານມາ,ກໍສາມາດຈັບເປົ້າໝາຍກໍ່ເຫດໄດ້ ຊື່ ທ້າວ ສຸລິນທາ ອາຍຸ 21 ປີ ຢູ່່ບ້ານຫວ້ຍຍາງຄຳ ນະຄອນປາກເຊ ມາເນີນການສອບສວນ.

ຜ່ານການສອບສວນ ທ້າວ ສຸລິນທາ ສາລະພາບວ່າ: ໃນວັນທີ 25 ສິງຫາ 2021,ເວລາປະມານ 10:00 ໂມງ ຜູ້ກ່ຽວໄດ້ກະກຽມເອົາປືນສັ້ນ ( ປືນກັບໄຟ ອັດແກັດ ) 1 ກະບອກ ເພື່ອນຳໃຊ້ໃນການກໍ່ເຫດປຸ້ນຊັບ.ຈາກນັ້ນ, ຜູ້ກ່ຽວ ກໍໄດ້ຂັບຂີ່ລົດຈັກ ຮອນດ້າເວບ 100 ສີແດງດຳ ເລກທະບຽນ ຈບ 2762 ຈຳປາສັກ ອອກຈາກເຮືອນ ພໍໄປຮອດຮ້ານອິນເຕີເນັດ ຢູ່່ເຂດບ້ານຫ້ວຍຍາງຄຳ ໄດ້ສັງເກດເຫັນຄົນ ນັ່ງຢູ່່ໃນຮ້ານຄົນດຽວ ຈຶ່ງໄດ້ຍ່າງເຂົ້າໄປໃນຮ້ານ ແລ້ວໃຊ້ປືນສັ້ນທີ່ກຽມມາ ຈີ້ເອົາຊັບ, ໄດ້ເງິນ 1.600.000 ກີບ ແລ້ວເອົາໄປໃຊ້ຈ່າຍຈົນໝົດ.

ມາໃນວັນທີ 1 ກັນຍາ 2021 ຜູ້ກ່ຽວ ໄດ້ຂັບຂີ່ລົດຈັກ ພ້ອມເອົາປືນສັ້ນກະບອກດັ່ງກ່າວ ໄປປຸ້ນເອົາຊັບໃນຮ້ານໂຈໂຈ້ ມິລິມາກ ຢູ່່ເຂດບ້ານໂພນສະຫວັນ ນະຄອນປາກເຊ,ຄັ້ງນີ້ ໄດ້ໃຊ້ປຸ້ນຈີ້ຄົນ ທີ່ນັ່ງຢູ່່ເຄົາເຕີ້ໃນຮ້ານ ໄດ້ເງິນ 140.000 ກີບ,ມາຮອດວັນທີ 2 ກັນຍາ ກໍຖືກຈັບໄປດຳເນີນຄະດີ.

ຂ່າວ-ພາບ: ເພຈຄວາມສະຫງົບ LSN