ວັນທີ 26 ກັນຍາ 2021,ທ່ານ ບຸນນາກ ເພັດສຸພັນ ຮອງຫົວໜ້າອົງການກາແດງລາວ ປະຈຳແຂວງຫຼວງພະບາງ, ພ້ອມຄະນະ ໄດ້ນໍາເອົາເຄື່ອງຊ່ວຍເຫຼືອໄປມອບໃຫ້ປະຊາຊົນ ທີ່ໄດ້ຮັບຜົນກະທົບຈາກການລະບາດພະຍາດໂຄວິດ-19 ຢູ່່ບ້ານນາອວນ ນະຄອນຫຼວງພະບາງ, ມີຄະນະນຳຂອງນະຄອນ ແລະ ອົງການປົກຄອງບ້ານ ເຂົ້າຮ່ວມ.
ປັດຈຸບັນ, ບ້ານນາອວນ ຖືກກຳນົດເປັນບ້ານເຂດແດງ ຫຼື ບ້ານທີ່ເປັນພື້ນທີ່ສ່ຽງຕໍ່ການລະບາດຂອງພະຍາດໂຄວິດ-19 ເຊິ່ງຄະນະສະເພາະກິດຂັ້ນນະຄອນ ໄດ້ມີການອອກຄໍາສັ່ງປິດການເດີນທາງເຂົ້າ-ອອກ ຂອງປະຊາຊົນ ເພື່ອກັນການລະບາດຂອງເຊື້ອພະຍາດ ບໍ່ໃຫ້ຂະຫຍາຍເປັນວົງກວ້າງ.
ກ່າວມອບເຄື່ອງຊ່ວຍເຫຼືອ,ໂດຍ ທ່ານ ບຸນນາກ ເພັດສຸພັນ ຮອງຫົວໜ້າອົງການກາແດງລາວ ປະຈຳແຂວງຫຼວງພະບາງ ແລະ ກ່າວຮັບໂດຍ ທ່ານ ຄຳຜູຍ ສີຫານາດ ຫົວໜ້າຫ້ອງການແຮງງານ ແລະສະຫວັດດີການ-ສັງຄົມ ນະຄອນຫຼວງພະບາງ ສົ່ງມອບຕໍ່ໃຫ້ອົງການປົກຄອງບ້ານ ນາອວນ ເພື່ອນໍາໄປແຈກຍາຍໃຫ້ທົ່ວເຖິງ.
ເຄື່ອງທີ່ມອບ ປະກອບມີ ເຂົ້າສານ, ໄຂ່ໄກ່, ໝີ່ສຳເລັດຮູບ,ປາກະປ໋ອງ, ສະບູ,ແຟັບ ແລະ ເຄື່ອງໃຊ້ປະຈຳວັນຈຳນວນໜື່ງ, ໂດຍຈັດເປັນຖົງມອບໃຫ້ທຸກຄອບຄົວ ລວມທັງໝົດ 83 ຖົງ ລວມມູນຄ່າ 7 ລ້ານກວ່າກີບ.
Discussion about this post