ກວດເບິ່ງ ສະຖານທີ່ໃຫ້ບໍລິການສັກວັກຊີນ ຟາຍເຊີ ແລະ ຊີໂນຟາມ ເຂັມ1 ຮອບໃໝ່ຢູ່ນະຄອນຫຼວງວຽງຈັນ

ທ່ານ ດຣ. ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ, ກະຊວງສາທາລະນະສຸກ ກ່າວໃນພິທີຖະແຫຼງຂ່າວປະຈຳວັນຂອງຄະນະສະເພາະກິດເພືອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ປະຈໍາວັນທີ 12 ມິຖຸນາ 2021 ໃຫ້ຮູ້ວ່າ: ການຈັດຕັ້ງປະຕິບັດວຽກງານການໃຫ້ວັກຊີນໃນຂອບເຂດທົ່ວປະເທດ ມາຮອດປັດຈຸບັນສັກເຂັມທີ 1 ແລ້ວ 712.793 ເຂັມ ກວມ 9,71%; ສັກເຂັມ 2 ໄດ້ 385.921 ເຂັມ ກວມ 5,26%.

ທ່ານ ດຣ. ພອນປະເສີດ ອຸນາພົມ ໃຫ້ຮູ້ຕື່ມວ່າ: ດ້ານການກະກຽມໃຫ້ວັກຊີນຟາຍເຊີ້ Pfizer ປັດຈຸບັນອຳນາດການປົກຄອງຂັ້ນບ້ານຢູ່ນະຄອນຫຼວງວຽງຈັນ ໄດ້ມີການລົງເກັບກຳເປົ້າໝາຍ ໂດຍສະເພາະກຸ່ມຜູ້ສູງອາຍຸ 60 ຂຶ້ນໄປຢູ່ໃນແຕ່ລະບ້ານ ໄດ້ກວມ 70-80% ແລ້ວ. ສະນັ້ນ, ການຈັດຕັ້ງປະຕິບັດວຽກຊີນຟາຍເຊີ້ເຂັມທີ 1 ຈະໄດ້ເລີ່ມຂຶ້ນໃນວັນທີ 15 ມິຖຸນາ ໂດຍໄດ້ກຳນົດສະຖານທີ່ບໍລິການສັກຄື:

1.ສະໂມສອນຫ້ອງວ່າການປົກຄອງ ເມືອງຈັນທະບູລີ , 2.ສະໂມສອນຫ້ອງວ່າການປົກຄອງເມືອງສີໂຄດຕະບອງ , 3.ໂຮງໝໍເມືອງໄຊເສດຖາ , 4.ໂຮງໝໍເມືອງສີສັດຕະນາກ , 5.ສະໂມສອນຫ້ອງວ່າການປົກຄອງເມືອງໄຊທານີ , 6.ໂຮງໝໍເມືອງຫາດຊາຍຟອງ, 7 ໂຮງໝໍເມືອງສັງທອງ ແລະ ໂຮງໝໍນ້ອຍປາກຕອນ, 8.ໂຮງໝໍເມືອງປາກງື່ມ , 9.ໂຮງໝໍເມືອງນາຊາຍທອງ.

ນອກນັ້ນໃນວັນທີ 15 ມິຖຸນານີ້ ກໍຈະໄດ້ມີການສັກວັກຊີນຊີໂນຟາມ ຮອບທີ 2 ເຂັມ 1 ເຊັ່ນກັນຕາມຈຸດບໍລິການເຊັ່ນ: 1.ສະມາຄົມຈີນ ເມືອງຈັນທະບູລີ 2.ໂຮງໝໍເມືອງສີໂຄດຕະບອງ, ມໍຕົ້ນ ສີໄຄ , 3.ມສ ມິດຕະພາບລາວ-ຫວຽດ ເມືອງໄຊເສດຖາ , 4.ສະໜາມກິລາໃນຮົ່ມບຶງຂະຫຍອງ ເມືອງສີສັດຕະນາກ 5.ໂຮງໝໍເມືອງໄຊທານີ , 6.ໂຮງໝໍເມືອງຫາດຊາຍຟອງ , 7 ຫ້ອງການສາທາລະນະສຸກເມືອງສັງທອງ , 8.ໂຮງໝໍເມືອງປາກງື່ມ , 9. ໂຮງໝໍນ້ອຍອີ່ໄລ, ໂຮງໝໍນ້ອຍບ້ານບົວ ເມືອງນາຊາຍທອງ