ເຈົ້າໜ້າທີ່ຈັບໂຕຍິງສາວ 6 ຄົນຫຼີ້ນພະນັນ (ກຸ້ງໄກ່) ໃນສວນ ນຳມາຕັກເຕືອນ ແລະ ເຮັດບົດບັນທຶກ.

ໃນເວລາ 15:00 ໂມງຂອງວັນທີ 10 ມິຖຸນາ 2021, ສະຖານີຮັບແຈ້ງ ແລະ ແກ້ໄຂເຫດສຸກເສີນ 1191 ໄຊສົມບູນ ໄດ້ຮັບແຈ້ງຄວາມຈາກປະຊາຊົນ ວ່າມີກຸ່ມຄົນຈໍານວນໜຶ່ງພາກັນມົ້ວສຸມຫຼິ້ນການພະນັນ ( ຫຼິ້ນກຸ້ງໄກ່ ) ຢູ່ເຂດບ້ານນາຂາວ ເມືອງໄຊທານີ ນະຄອນຫຼວງວຽງຈັນ, ເຈົ້າໜ້າທີ່ ສ.ນ 1191 ຈຶ່ງໄດ້ສົມທົບກັບ ປກສ ກຸ່ມຫ້ວຍຈຽມ ແລະ ອໍານາດການປົກຄອງບ້ານນາຂາວ ລົງແກ້ໄຂການຫຼິ້ນການພະນັນ.

ຜ່ານການລົງກວດກາສະຖານທີ່ຕົວຈິງ ພົບເຫັນກຸ່ມມົ້ວສຸມຫຼິ້ນການພະນັນ ( ໝາກກຸ້ງໄກ່ ) ຢູ່ສວນຂອງ ນາງ ດົກ ອາຍຸ 32 ປີ ຢູ່ບ້ານນາຂາວ ເມືອງໄຊທານີ ນະຄອນຫຼວງວຽງຈັນ ທັງໝົດ 6 ຄົນ ( ຍິງໝົດ ).ຕໍ່ການກະທໍາດັ່ງກ່າວ, ແມ່ນເປັນການລະເມີດຄໍາສັ່ງ ເລກທີ 15/ນຍ, ແຈ້ງການ02/ຈນວ ແລະ ເປັນການກະທໍາທີ່ແຕະຕ້ອງສາຍພົວພັນ ສັງຄົມທີ່ປະມວນກົດໝາຍອາຍາ ກຳນົດໄວ້ໃນມາດຕາ 141 ການຫຼິ້ນການພະນັນທີ່ຕ້ອງຫ້າມ ແຕ່ຍ້ອນເປັນການກະທໍາຄັ້ງທໍາອິດເລັກນ້ອຍ, ເບົາບາງ ບໍ່ທັນສ້າງຜົນສະທ້ອນ ເປັນຜົນກະທົບຕໍ່ສັງຄົມ ຈຶ່ງໄດ້ສຶກສາອົບຮົມກ່າວເຕືອນ ແລະ ປະຕິບັດຕາມລະບຽບບໍລິຫານ.

ກອງບັນຊາການ ປກສ ນວ ຮຽກຮ້ອງມາຍັງພໍ່-ແມ່ປະຊາຊົນບັນດາເຜົ່າ ເວົ້າສະເພາະຊາວ ນວ ໃຫ້ຢຸດຕິການກະທໍາທີ່ແຕະຕ້ອງກົດໝາຍ ແລະ ລະບຽບການກໍານົດໄວ້. ເພື່ອເປັນການປະກອບສ່ວນປະຕິບັດພັນທະຊ່ວຍກັນໃນການຄວບຄຸມ, ສະກັດກັ້ນ ການແຜ່ລະບາດຂອງພະຍາດໂຄວິດ-19 ຂໍໃຫ້ພ້ອມກັນປະຕິບັດພັນທະຂອງຕົນປະກອບສ່ວນເຂົ້າໃນວຽກງານຮັກສາຄວາມເປັນລະບຽບຮຽບຮ້ອຍຂອງສັງຄົມ ຖ້າຫາກພົບເຫັນການເຄື່ອນໄຫວທີ່ຜິດຕໍ່ກົດໝາຍ ແລະ ລະບຽບການ ອັນນໍາໄປສູ່ຄວາມບໍ່ສະຫງົບ ໃຫ້ຮີບຮ້ອນລາຍງານເຈົ້າໜ້າທີ່ ທີ່ຢູ່ໃກ້ທ່ານ ແລະ ສາມາດລາຍງານມາທາງເບີ WhatsApp 020 28899774 ຫຼື ແຈ້ງຜ່ານທາງເຟສບຸກ ປ້ອງກັນຄວາມສະຫງົບ ນະຄອນຫຼວງວຽງຈັນ.

ຂໍ້ມູນ: ປ້ອງກັນຄວາມສະຫງົບນະຄອນຫຼວງວຽງຈັນ.

Northern Times News