ແຈ້ງຂ່າວເສົ້າສະຫລົດໃຈ ກ່ຽວກັບການມໍລະນະກໍາຂອງ ສະຫາຍ ວົງເພັດ ໄຊເກີຢາຈົງຕົວ

ຄະນະບໍລິຫານງານສູນກາງພັກ, ລັດຖະບານແຫ່ງ ສປປ ລາວ, ສະພາແຫ່ງຊາດ, ຄະນະກວດກາ ສູນກາງພັກ, ສູນກາງແນວລາວສ້າງຊາດ, ສູນກາງສະຫະພັນກໍາມະບານລາວ, ແຂວງຫລວງພະບາງ ແລະ ຄອບຄົວໄຊເກີຢາຈົງຕົວ ຂໍແຈ້ງຂ່າວຄວາມເສົ້າສະຫລົດໃຈມາຍັງສະມາຊິກພັກ, ພະນັກງານ, ນັກຮົບ ແລະ ພີ່ນ້ອງຮ່ວມຊາດຊາບທົ່ວເຖິງກັນວ່າ:

ສະຫາຍ ວົງເພັດ ໄຊເກີຢາຈົງຕົວ ພະນັກງານບໍານານ ອະດີດກໍາມະການສູນກາງພັກ ສະໄໝທີ III, IV, V, VI, VII ແລະ VIII ອະດີດເລຂາພັກແຂວງ-ເຈົ້າແຂວງຫລວງພະບາງ,

ອະດີດຮອງປະທານສູນກາງແນວລາວສ້າງຊາດ, ອະດີດຮອງປະທານສະພາແຫ່ງຊາດສະໄໝ ທີ III, IV, ອະດີດປະທານກວດກາສູນກາງພັກ ສະໄໝທີ VI, VII ແລະ ອະດີດປະທານສູນກາງ ສະຫະພັນກໍາມະບານລາວ, ພາຍຫລັງ ສະຫາຍໄດ້ມີການເຈັບເປັນ, ການຈັດຕັ້ງຄອບຄົວຍາດພີ່ນ້ອງ,

ຄະນະແພດໝໍໄດ້ເອົາໃຈໃສ່ປິ່ນປົວຈົນສຸດຄວາມສາມາດ ແຕ່ກໍ່ບໍ່ສາມາດກອບກູ້ເອົາຊີວິດຂອງສະຫາຍໄວ້ໄດ້ ສະຫາຍຈຶ່ງໄດ້ເສຍຊີວິດ ໃນເວລາ 12 ໂມງ 25 ນາທີ ຂອງວັນທີ 30/05/2021 ລວມອາຍຸໄດ້ 82 ປີ.

ເພື່ອຈາລຶກຄຸນງາມຄວາມດີຂອງ ສະຫາຍ ວົງເພັດ ໄຊເກີຢາຈົງຕົວ ທີ່ໄດ້ອຸດທິແກ່ປະເທດຊາດ ແລະ ການປະຕິວັດ, ດ້ວຍຄວາມອາໄລ ອາວອນຢ່າງສຸດຊຶ້ງຕໍ່ສະຫາຍ, ເຊິ່ງເປັນໜຶ່ງໃນບັນດາພະນັກງານການນໍາຂັ້ນສູງຂອງພັກ-ລັດ.

ຄະນະບໍລິຫານງານສູນກາງພັກ, ລັດຖະບານແຫ່ງ ສປປ ລາວ, ສະພາແຫ່ງຊາດ, ຄະນະກວດກາສູນກາງພັກ, ສູນກາງແນວລາວສ້າງຊາດ, ສູນກາງສະຫະພັນກໍາມະບານລາວ ແລະ ແຂວງຫລວງພະບາງ ໄດ້ຕົກລົງໄວ້ອາໄລຢ່າງເປັນທາງການ ເປັນເວລາ 03 ວັນ ນັບແຕ່ວັນທີ 31/05/2021 ເຖິງວັນທີ 02/06/2021.

ປັດຈຸບັນສົບຂອງເພິ່ນໄດ້ບໍາເພັນກຸສົນໄວ້ຢູ່ທີ່ເຮືອນຂອງເພີ່ນ ບ້ານຊຽງຍືນ, ໜ່ວຍ 10 ເມືອງຈັນທະບູລີ, ນະຄອນຫລວງວຽງຈັນ ສ່ວນວັນຊາປະນາກິດສົບ ຈະໄດ້ຈັດຂຶ້ນຢ່າງເປັນທາງການ ໃນວັນທີ 02/06/2021 ເວລາ 10 ໂມງ 00 ນາທີ ທີ່ເຮືອນຂອງເພີ່ນເອງ.

ຈາກນັ້ນ ຈະໄດ້ເຄື່ອນສົບໄປແຂວງຫລວງພະບາງ ແລະ ເຮັດພິທີປົງສົບ ເວລາ 15 ໂມງ 00 ນາທີ ຢູ່ທີ່ອານຸສາວະລີນັກຮົບນິລະນາມທະຫານ ແຂວງຫລວງພະບາງ.

ດັ່ງນັ້ນ, ຈຶ່ງແຈ້ງຂ່າວມາຍັງສະມາຊິກພັກ, ພະນັກງານ, ນັກຮົບ ແລະ ປະຊາຊົນລາວບັນ ດາເຜົ່າໃນຂອບເຂດທົ່ວປະເທດ ເພື່ອຊາບທົ່ວເຖິງກັນ.

ນະຄອນຫລວງວຽງຈັນ, ວັນທີ 30/05/2021